Historyk Alaksandr Smalančuk uhanaravany sumiesnaj premijaj dźviuch polska-litoŭskich arhanizacyj
Premijaj za zasłuhi ŭ halinie historyi i zachavańnia histaryčnaj pamiaci, zasnavanaj Forumam supracoŭnictva i dyjałohu Polšča — Litva i polska-litoŭskaha Forumu dyjałohu i supracoŭnictva imia Ježy Hiedrojcia ŭhanaravany biełaruski historyk prafiesar Alaksandr Smalančuk, paviedamlaje «Pozirk».
U svaim vystupie na ŭračystaj cyrymonii ŭručeńnia premii ŭ muziei «Karaleŭskija Łazienki» ŭ Varšavie Smalančuk adznačyŭ, što traktuje atrymanuju im uznaharodu jak «pryznańnie pracy ŭsich biełaruskich historykaŭ, vymušanych pakinuć svaju krainu, u jakoj ciapier niama svabody navukovych daśledavańniaŭ u halinie humanitarnych i hramadskich navuk, a ich udzielnikam pahražajuć represii».
Na cyrymonii vystupiŭ namieśnik kiraŭnicy Abjadnanaha pierachodnaha kabinieta Pavieł Łatuška. Jon adznačyŭ, što sioleta premija ŭpieršyniu «pašyranaja na pradstaŭnikoŭ demakratyčnaj Biełarusi».
«Vaša praca pa viartańni praŭdzivaj historyi — padmurak našaj hodnaści. Vaša ŭznaharoda — znak taho, što Biełaruś — Jeŭropa, i Jeŭropa heta pryznaje, nie žadajučy novaj «žaleznaj zasłony» pa linii Buha», — adznačyŭ Łatuška, źviartajučysia da łaŭreata.
Smalančuk — doktar histaryčnych navuk, prafiesar. Daśleduje ahulnuju historyju Biełarusi, Litvy i Polščy. Pracuje ŭ Instytucie słavistyki Polskaj akademii navuk.
Cyrymonija ŭručeńnia premij forumu supracoŭnictva i dyjałohu Polšča — Litva i Forumu dyjałohu i supracoŭnictva imia Ježy Hiedrojcia źjaŭlajecca adnym z najvažniejšych mierapryjemstvaŭ, pryśviečanych pabudovie dyjałohu, uzajemarazumieńnia i supracoŭnictva pamiž Polščaj i Litvoj, a taksama narodami Centralnaj i Uschodniaj Jeŭropy.
Kamientary