Polskaja padatkovaja inśpiekcyja nakiravała biełarusu list na minski adras
«Z tym ža pośpiecham jany mahli dasłać jaho na Mars», — kaža jon.
Padatkovaja inśpiekcyja adnaho z rajonaŭ Varšavy dasłała Valancinu (imia źmienienaje) list na minski adras. Z palityčnych pryčyn biełarus žyvie ŭ Polščy, nie viartajecca na radzimu i ličyć, što takija dziejańni orhana mohuć być dla jaho niebiaśpiečnymi. Ciapier jon namahajecca, kab polskija čynoŭniki nie dasyłali listy pa adrasach biełaruskaj prapiski. Valancin apisaŭ Most situacyju, u jakoj apynuŭsia.
U Polščy Valancin zarehistravaŭ fond. Jon uspaminaje, što jašče tady nataryus pierapisaŭ adras rehistracyi ź jaho biełaruskaha pašparta. A čynoŭniki ŭnieśli jaho ŭ sistemu.
— Ja ŭvohule tady pytaŭsia: «Navošta vam hetyja danyja? Vy što, źbirajeciesia tudy štości słać?» «Nie, prosta farmalna. Chaj budzie».
Asnoŭny ž adras jurydyčnaj asoby Valancin paznačyŭ virtualny — u Varšavie. Jon pryznaje: moh pra štości zabycca i «niedazaklučyć». Ale nie vielmi turbavaŭsia nakont taho, što jaho nie znojduć: u pradastaŭlenaj infarmacyi byli jaho numar telefona i elektronnaja pošta. Jon mierkavaŭ, što, kali ŭźniknuć pytańni, čynoŭniki znojduć sposab ź im źviazacca.
«Ja nie abaviazany tam u Minsku pilnavać hety list»
Adnak niečakana svajaki ź Biełarusi paviedamili Valancinu, što list z polskaj padatkovaj pryjšoŭ pa jaho miescy rehistracyi ŭ Minsku. U paviedamleńni viedamstva prasiła zapoŭnić farmular, dadaŭšy tudy peŭnyja danyja pra fond, u tym liku adras praviadzieńnia dziejnaści.
Mužčyna ličyć, što samo dasyłańnie takich listoŭ u Biełaruś dla jaho i jaho svajakoŭ niebiaśpiečnaje, a da taho ž prosta nieefiektyŭnaje.
— Ja nie abaviazany tam u Minsku pilnavać hety list. Z tym ža pośpiecham jany mahli dasłać jaho na Mars.
Ciapier Valancin kansultujecca ź jurystami i płanuje napisać skarhu ŭ padatkovuju, a taksama namahajecca, kab polskija čynoŭniki bolš nie dasyłali listy pa adrasach biełaruskaj prapiski, kali heta sistemnaja praktyka.
— Zadača zrazumieć, heta čałaviek niedapietryŭ, što ŭ Biełaruś takoje nielha słać, ci heta sistemny zboj, — kaža Valancin.
Ci možna ŭ takich spravach abapiracca na rehłamienty ES
Biełarus spasyłajecca na spravu 2011 hoda suprać kiraŭnika pravaabarončaha centra «Viasna» Alesia Bialackaha. Tady padstavaj dla jaje stali danyja ab bankaŭskich rachunkach, pradastaŭlenyja na zapyt biełaruskaha boku čynoŭnikami Litvy i Polščy ŭ miežach dvuchbakovych pahadnieńniaŭ ab pravavoj dapamozie.
Hety vypadak staŭ adnym z tryhieraŭ dla pierahladu palityki ES pa pieradačy piersanalnych danych u inšyja krainy. Biełaruś trapiła ŭ śpis krain, kudy nielha pieradavać piersanalnuju infarmacyju prosta pa zapycie dziaržaŭnych orhanaŭ. Zhodna z pryniatym u 2016 hodzie rehłamientam General Data Protection Regulation (GDPR) i adpaviednaj dyrektyvaj, dla hetaha patrabujecca niezaležnaja jurydyčnaja acenka adpaviednaści standartam ES. U 2020 hodzie było pryniataje rašeńnie Schrems II, jakoje ŭviało patrabavańnie ŭličvać realnyja ryzyki dla pravoŭ čałavieka ŭ krainie pryznačeńnia.
Tearetyčna pryncypy GDPR nie musiać tyčycca tolki zapytaŭ dziaržaŭnych orhanaŭ, ale taksama i nie pavinny skasoŭvać zvyčajnuju kamunikacyju pamiž orhanam adnoj krainy i hramadzianami druhoj, asabliva kali heta nieabchodna dla vykanańnia słužbovych abaviazkaŭ.
Zaraz razam ź jurystami Valancin sprabuje vyśvietlić, ci mohuć pryniatyja rehłamienty ES tyčycca jahonaj spravy.
Kamientary