Viktar Šejman — były dziaržsłužačy, jakoha nazyvali najbližejšym paplečnikam Łukašenki i jaho pravaj rukoj. Pačaŭšy sumiesny šlach z pracy ŭ štabie palityka na samych pieršych prezidenckich vybarach 1994 hoda, paźniej jon uznačalvaŭ jaho Kiraŭnictva spravami, a paśla adstaŭki apynuŭsia na niezvyčajnaj pasadzie «śpiecyjalnaha pasłańnika», jaki kuryruje prajekty ŭ Afrycy i viadzie staronnija biznesy. Dvoje jaho darosłych dziaciej taksama, vidavočna, šukajuć siabie ŭ biznesie. Pryčym abodva — u niestandartnych śfierach: dačka ŭkłałasia ŭ ezateryčny prajekt, a syn zaśviaciŭsia ŭ zdabyčy zołata i ŭ kiraŭnictvie firmy-adnadzionki z upłyvovym partnioram, piša «Lusterka».
«Siła rodu» i varažbitnyja karty
Dačka Šejmana Volha zaraz nosić proźvišča Kiryjenka, vynikaje z dadzienych aficyjnych rejestraŭ, atrymanych «Lusterkam» pry dapamozie «Kibierpartyzan». Jana pracavała ŭ roznych śfierach, z 2017 da 2020 hoda była suzasnavalnicaj adnaho ź minskich baraŭ, jaki paśla zakryŭsia.
Jak daviedałasia «Lusterka», u lipieni 2023 hoda Volha Kiryjenka stała adnoj z čatyroch saŭładalnikaŭ kampanii «Hudsport», jakaja źbirałasia zajmacca «padtrymkaj spartsmienaŭ» i «mianiać realii spartyŭnaha sponsarstva». Imavierna, hety kirunak nie atrymaŭ raźvićcia, Instagram prajekta pierastaŭ abnaŭlacca ŭžo praź niekalki miesiacaŭ paśla zapusku.
Paralelna z hetym zasnavalnicy kampanii raźvivali prajekt Terica, pryśviečany «roznym kirunkam u ezaterycy i psichałohii». U jaho Instagram — parady pa miedytacyi, astrałahičnyja prahnozy, anons kansultacyj «kiniezijołaha i kosmaenierhieta» i prodaž «transfarmacyjnaha kursu» «Siła rodu» — stvaralniki abiacali, što tyja, chto kupić jaho za 190 rubloŭ, zabuduć «pra ŭsie svaje prablemy i biaskoncyja svarki sa svajakami».
U liku stvaralnic i idejnych natchnialnic hetaja škoła ŭkazvała Volhu Kiryjenku i Juliju Chartanovič, suzasnavalnicu biznes-partała goodstart.by. U minułym pradprymalnicy sumiesna zapuścili niekalki prajektaŭ dapamohi žyviołam.
U 2024 hodzie ezateryčny prajekt vypuściŭ nabor varažbitnych kart z «premijalnych materyjałaŭ», jakija mohuć dapamahčy «pačuć svaju intuicyju» (va ŭsiakim razie, pa abiacańni pradaŭcoŭ). Na starcie prodažaŭ adna kałoda kaštavała 180 biełaruskich rubloŭ, zaraz jaje možna kupić za 105. Aŭtary prapanoŭvali taksama prajści kurs pa varažbie na «zornych kartach».
U siaredzinie 2024 hoda jurydyčnaja asoba źmianiła nazvu na «TerykaChab» i razyšłasia z dvuma inšymi suzasnavalnikami. U lipieni 2025 hoda Kiryjenka taksama vyjšła ź liku ŭłaśnikaŭ, kampanija zastałasia pad kantrolem Chartanovič.
Prajekt-pustyška, jaki kamuści patrebny
Siarhiej Šejman — syn eks-čynoŭnika — čałaviek niepubličny: u jaho niama staronak u sacsietkach, jon nie źjaŭlajecca na mierapryjemstvach. U minułym niekalki hadoŭ jon pracavaŭ u Minabłvykankamie, taksama ŭ jaho byli doli ŭ minskaj burhiernaj i karaokie.
Sa śniežnia 2009 hoda ŭ rasijskich rejestrach jon fihuruje jak saŭładalnik TAA «Tiep-chołdinh» — nievialikaj kampanii ŭ horadzie Taljaci. Farmalna heta mikrapradpryjemstva sa statutnym kapitałam usiaho 40 tysiač rasijskich rubloŭ (kala 1,3 tysiačy dołaraŭ na momant zasnavańnia).
U Siarhieja Šejmana tam 25% doli. Jašče stolki ž — u adstaŭnoha hienierał-majora FSB Anatola Tkačuka i dvuch inšych niepubličnych rasijan.
Tkačuk — hienierał-major FSB u adstaŭcy. U minułym jon zajmaŭsia vajennaj kontrraźviedkaj, paśla Čarnobylskaj katastrofy ŭznačalvaŭ hrupu kontrraźviedki na zabrudžanych terytoryjach, potym syšoŭ u biznes. Zaraz uvachodzić u kiraŭnictva dvuch dziasiatkaŭ rasijskich kampanij, uklučajučy «Rustytan», «Ruśminresursy» i «Centrbud», a taksama ŭ praŭleńnie Rasijskaha sajuza pramysłoŭcaŭ i pradprymalnikaŭ.
Rasśledavalniki ŭkazvali, što «Tiep-chołdinh» maje ŭsie prykmiety firmy-prakładki. Kampanija zarehistravanaja ŭ zvyčajnaj kvatery ŭ panelnym šmatpaviarchoviku. Dyrektaram ličycca Siarhiej Śmirnoŭ — typovy «zicstaršynia», jaki za apošnija dziesiać hadoŭ značyŭsia kiraŭnikom 19 roznych kampanij u roznych haradach Rasii i žyvie nie ŭ Taljaci, a ŭ Jekaciarynburhu. Aficyjna kampanija zajmajecca arendaj nieruchomaści, choć u rejestry ŭ jaje ŭkazana jašče 46 dadatkovych vidaŭ dziejnaści. Pa papierach, tam amal nie było supracoŭnikaŭ — to adzin, to dva.
Čym by ni zajmaŭsia hety prajekt, padobna, jaho dziejnaść syšła na ništo. Zhodna z dadzienymi spravazdačnaści, najbolšyja dachody jon pakazvaŭ u 2017 hodzie — 14 miljonaŭ rasijskich rubloŭ (kala 240 tysiač dołaraŭ), čysty prybytak skłaŭ 605 tysiač rubloŭ (kala 10 tysiač dołaraŭ). 2022 hod staŭ dla kampanii rekordnym pa prybytku — 5,5 miljona rubloŭ (kala 80 tysiač dołaraŭ), ale tolki tamu, što ŭ dakumienty naohuł nie ŭnieśli vydatki. U nastupnyja hady dachody praciahnuli skaračacca, pakul u 2025‑m nie dasiahnuli nula.
U listapadzie 2024 hoda Arbitražny sud Samarskaj vobłaści vynies sudovy zahad ab spahnańni z «Tiep-chołdinha» zapazyčanaści pa damovie arendy. Kampanija apynułasia vinavataja Inavacyjnamu fondu Samarskaj vobłaści 67 194 rasijskija rubli (na toj momant — 680 dołaraŭ). Heta byŭ doŭh pa arendnych płaciažach ź lutaha 2015 hoda plus pracenty za praterminoŭku. Jakoje mienavita pamiaškańnie arandavałasia i dla jakich metaŭ — u dakumiencie nie ŭkazana.
U śniežni 2024 hoda pravierka padatkovaj słužby pakazała, što niejkija sa źviestak pra kampaniju «Tiep-chołdinh» niesapraŭdnyja. Praz heta jurydyčnuju asobu źbiralisia vyklučyć z aficyjnaha rejestra, ale ŭ kastryčniku 2025 hoda praceduru spynili «ŭ suviazi z pastupleńniem zajaŭ ad zacikaŭlenych asob».
Brytanskaja kampanija-pryvid, jakaja zdabyvaje zołata ad imia «biełarusaŭ»
Taksama Siarhiej Šejman u 2017 hodzie staŭ zasnavalnikam siejšelskaj kampanii, jakaja apynułasia bienieficyjaram biznesu pa zdabyčy zołata ŭ Zimbabve. Partnioram Šejmana-małodšaha vystupiŭ biznesmien ź Biełarusi Alaksandr Zinhman, viadomy prajektami ŭ Afrycy.
Kali ŭ sakaviku 2018 hoda Viktar Šejman z aficyjnym vizitam naviedaŭ Zimbabve, u składzie delehacyi prysutničaŭ i jaho syn Siarhiej. Zimbabvijskaje vydańnie The Herald tady pradstaviła jaho jak savietnika kiraŭnika delehacyi. Praŭda, Kiraŭnictva spravami Łukašenki paźniej zajaviła, što Siarhiej u ich nie pracuje i ŭ skład delehacyi jany jaho nie ŭklučali.
U 2020 hodzie siejšelskaja firma Šejmana-małodšaha i Zinhmana i jaje brytanskaja «dačka» spynili dziejnaść. Pry hetym sumiesnaje ź Biełaruśsiu pradpryjemstva pa zdabyčy zołata Zimbabwe GoldFields praciahnuła pracu. Ci ličycca tam Siarhiej Šejman i jakaja jaho rola ŭ dadzieny momant — niezrazumieła.
U 2023 hodzie zimbabvijskaje vydańnie The NewsHub apublikavała rasśledavańnie ab dziejnaści Zimbabwe Goldfields. Akazałasia, što na momant publikacyi asnoŭnym uładalnikam praciahvała ličycca brytanskaja kampanija — na toj momant užo try hady likvidavanaja. Kiraŭnik miascovaj dziaržkarparacyi śćviardžaŭ, što kampanija «ŭsio jašče partnior», a pra likvidacyju skazaŭ, što «biełarusy lepš padychodziać dla adkazu na hetaje pytańnie». Tady ž vyśvietliłasia, što kampanija pracuje z parušeńniami zakanadaŭstva, a jaje dziejnaść naniesła ekałahičnuju škodu i pryviała da ŭspyški chalery.
Kamientary