Minčanka lažała na łožku-transformiery, kali toj raptam skłaŭsia
U žniŭni 2022 hoda žančyna nabyła taki łožak na adnoj ź internet-placovak. Navinkaj žančyna paśpiachova karystałasia kala hoda, pakul nie zdaryłasia niečakanaje: łožak skłaŭsia ŭ toj momant, kali jana na im lažała.
Vynik akazaŭsia sumnym — traŭma i špitalizacyja, źviarnuŭ uvahu Onliner.by.
Žančynu špitalizavali ŭ Respublikanski navukova-praktyčny centr traŭmatałohii i artapiedyi, dzie jana znachodziłasia 10 dzion.
Zatym bolš za miesiac prabyła ŭ kliničnaj balnicy miedycynskaj reabilitacyi, paśla čaho praciahvała reabilitacyju ambułatorna. U lipieni 2024 hoda ŭ MREK pryjšli da vysnovy, što davać invalidnaść u hetym vypadku niama patreby. Lačeńnie praciahnułasia ŭ miežach časovaj niepracazdolnaści.
— Pavodle zaklučeńnia ekśpierta, paškodžańni ŭ pazoŭnicy ŭtvarylisia ŭ vyniku ŭździejańnia ćviordaha tupoha pradmieta i adnosiacca da ciažkich cialesnych paškodžańniaŭ pavodle prykmiety niebiaśpieki dla žyćcia, — adznačajecca na sajcie Viarchoŭnaha suda.
Paciarpiełaja zapatrabavała kampiensacyju maralnaj škody ŭ pamiery 25 000 rubloŭ i sudovyja vydatki 800 rubloŭ.
— Rašeńniem suda Kastryčnickaha rajona horada Minska pastanoŭlena spahnać z adkazčyka na karyść pazoŭnicy hrašovuju kampiensacyju maralnaj škody ŭ pamiery 25 000 rubloŭ, sudovyja vydatki na apłatu jurydyčnaj dapamohi ŭ pamiery 800 rubloŭ, a ŭsiaho 25 800 rubloŭ.
Vypłacić hetuju sumu daviadziecca zborščyku mebli, jaki ŭstaloŭvaŭ łožak, atrymaŭšy zakaz praź internet. Adznačajecca, što na toj momant jon nie znachodziŭsia ŭ pracoŭnych adnosinach ni z pradaŭcom łožka-transformiera, ni z uładalnikam sajta, na jakim žančyna raźmiaściła zakaz na zborku mebli. Jon taksama nie byŭ indyvidualnym pradprymalnikam i nie byŭ zarehistravany jak samazaniaty. Sud pryjšoŭ da vysnovy, što rabota pa ŭstaloŭcy łožka-transformiera była vykanana niajakasna.
Adkazčyk padaŭ apielacyjnuju skarhu. Sudovaja kalehija pa hramadzianskich spravach Minskaha haradskoha suda pakinuła rašeńnie bieź źmienaŭ. Rašeńnie suda ŭstupiła ŭ zakonnuju siłu.
Ciapier čytajuć
Paśla biełaruskaj vioski Šnajderaŭ bolš nie biantežyć pytańnie ŁHBT. Siamja z Hiermanii, jakaja stała hierojami prapahandy, viartajecca ŭ ES27
Kamientary