Prezident ZŠA Donald Tramp u intervju italjanskaj haziecie Corriere della Sera abrynuŭsia z rezkaj krytykaj na premjer-ministarku Italii Džordžu Miełoni, jakoj raniej, jak palityku pravaha kirunku, udavałasia davoli dobra ładzić z haspadarom Biełaha doma.
«Ci padabajecca italjancam, što ich premjer-ministr ničoha nie robić dla taho, kab atrymać naftu? Ludziam heta padabajecca? Ja nie mahu sabie hetaha ŭjavić. Ja ŭražany joju. Ja dumaŭ, što jana śmiełaja, ale pamylaŭsia.
Jana kaža, što Italija nie choča być uklučanaj (u razbłakavańnie Armuzskaha praliva — Red.), choć Italija atrymlivaje svaju naftu adtul. Amieryka vielmi važnaja dla Italii, ale jana ličyć, što Italija nie pavinna być uklučanaj. Jana ličyć, što Amieryka pavinna rabić hetuju pracu za jaje», — zajaviŭ Tramp.
Na pytańnie, ci abmiarkoŭvaŭ jon heta pytańnie ź Miełoni, Tramp adkazaŭ, što nie, i naohuł jany ŭžo vielmi daŭno nie razmaŭlali z premjer-ministram Italii.
Pierad hetym Džordža Miełoni zastupiłasia za hruba raskrytykavanaha Trampam Papu Lva XIV, zajaviŭšy:
«Zajavy, asabliva na adras Papy, byli nieprymalnyja. Ja vykazvaju i praciahvaju vykazvać svaju salidarnaść z Papam».
Na pytańnie žurnalistaŭ pra toje, što jon dumaje pra hetyja słovy italjanskaj premjerki, Tramp adkazaŭ:
«Heta jana nieprymalnaja, bo joj usio roŭna, ci budzie Iran mieć jadziernuju zbroju, jon uzarvaŭ by Italiju za dźvie chviliny, kab mieŭ takuju mahčymaść.
Jana nie choča dapamahać nam u miežach NATA, nie choča dapamahać nam pazbavicca jadziernaj zbroi. Jana vielmi adroźnivajecca ad toj, jakoj ja jaje ličyŭ».
Jašče miesiac tamu Tramp nazyvaŭ Miełoni «siabroŭkaj i vialikim lidaram, što zaŭsiody sprabuje dapamahčy». Zaraz ža jon upeŭnieny, što «jana ŭžo nie toj samy čałaviek, i Italija nie budzie toj samaj krainaj, — imihracyja zabivaje Italiju i ŭsiu Jeŭropu».
«Jeŭrapiejcy płaciać samyja vysokija ŭ śviecie ceny za enierhiju i navat nie hatovyja zmahacca za Armuzski praliŭ, adkul jaje atrymlivajuć. Jany zaležać ad Donalda Trampa, kab jon trymaŭ jaho adkrytym. Ja prasiŭ dasłać usio, što ŭ ich jość, ale jany nie chočuć, bo NATA — heta papiarovy tyhr», — kaža Tramp.
Što tyčycca Papy, to jon, na dumku prezidenta ZŠA, nie razumieje, što Iran niasie jadziernuju pahrozu:
«Jon nie razumieje, i jamu nie varta kazać pra vajnu, bo jon nie maje ŭjaŭleńnia pra toje, što adbyvajecca. Jon nie razumieje, što ŭ Iranie ŭ minułym miesiacy zabili 42 tysiačy demanstrantaŭ».
Raniej papa Leŭ XIV zaklikaŭ da miru i asudziŭ «demanstracyju siły», a taksama «idałapakłonstva pierad saboj i hrašyma». U ŚMI hetyja słovy rascanili jak namiok na Trampa.
«Ja dumaŭ, što ja ŭ roli doktara». Tramp patłumačyŭ, navošta jon zapościŭ siabie ŭ vobrazie Chrysta
«My nie dazvolim uciahnuć siabie ŭ hetu vajnu». Krainy NATA admovilisia dałučacca da błakady Armuzskaha praliva
Były kiraŭnik CRU zaklikaŭ adchilić Trampa ad pasady prezidenta
Papa Leŭ XIV adkazaŭ Trampu
Kamientary