U Pinskim rajonie adbyłasia niebiaśpiečnaja situacyja: mužčyna pasadziŭ lohki samalot prosta na lod vadaschovišča Pahost, dzie ŭ hety momant znachodzilisia rybaki. Videa pasadki źjaviłasia ŭ sacyjalnych sietkach, paviedamlaje pres-słužba Hienieralnaj prakuratury.
Vypadak vyjavili supracoŭniki transpartnaj prakuratury Bresckaj vobłaści padčas manitorynhu internetu. Na videa było vidać, jak samalot pryziamlajecca na ladovuju pavierchniu vadaschovišča, niahledziačy na toje, što tam byli ludzi.
Pravierka pakazała, što ŭładalnikam samalota źjaŭlajecca žychar Pinskaha rajona, i jon śviadoma parušyŭ praviły. Palot adbyvaŭsia bieź nieabchodnaha dazvołu na vykarystańnie pavietranaj prastory. Bolš za toje, samalot nie prachodziŭ techničnuju pravierku kala vaśmi hadoŭ, a sam piłot nie mieŭ dziejnaha siertyfikata lotnaj prydatnaści i adpaviednaha paśviedčańnia.
U vyniku mužčynu pryciahnuli da administracyjnaj adkaznaści. Jamu pryznačyli štraf sumaj 20 bazavych adzinak (na toj momant heta 900 rubloŭ). Dadatkova, pa daručeńni prakuratury, jaho pakarali jašče pa inšym artykule — tam praduhledžany štraf da 30 bazavych adzinak.
Kamientary