Śluńkin raspavioŭ, jak Orban pryjechaŭ padtrymać Łukašenku ŭ 2020‑m i atrymaŭ ad Łukašenki prarocki padarunak
U červieni 2020 hoda, na piku kavidu, Orban pryjechaŭ u Biełaruś z aficyjnym vizitam, kab padtrymać Łukašenku pierad prezidenckimi vybarami. Były dypłamat Pavieł Śluńkin, jaki rychtavaŭ materyjały da tych pieramoŭ, raspavioŭ u Ch cikavostki z toj sustrečy.
«Łukašenka byŭ sumnaviadomy svaim admaŭleńniem COVID-19. Pakul u Biełarusi pamirali sotni ludziej, jon rekamiendavaŭ harełku, saŭny i chakiej u jakaści lekaŭ. Tym časam ES byŭ u łakdaŭnie, miežy byli zakrytyja, a ŭrady lichamankava zakuplali srodki indyvidualnaj abarony i aparaty ŠVŁ», — zhadvaje Śluńkin.
Pajezdka Orbana ŭ Minsk była zapłanavanaja jašče da pandemii i ŭžo zdavałasia niemahčymaj.
«Maje kalehi i ja ščyra vieryli (i spadziavalisia), što Vienhryja admienić vizit. Kamanda Orbana adkładała rašeńnie da apošniaha momantu, a zatym šakavała nas, usio ž taki ažyćciaviŭšy vizit», — raskazvaje były dypłamat.
Pavodle jaho słoŭ, siurrealistyčnym było toje, što i Orban, i Łukašenka kazali pra kavid u minułym časie, nibyta jon užo skončyŭsia: Orban nazvaŭ heta svaim pieršym zamiežnym vizitam «paśla pandemii». Łukašenka skazaŭ, što Orban adkryŭ hety maršrut «paśla epidemii».
Jak zhadvaje Śluńkin, nivodzin čałaviek ni ŭ vienhierskaj, ni ŭ biełaruskaj delehacyi nie nasiŭ masku. «Choć usie my prajšli testavańnie pierad tym, jak nam dazvolili prysutničać na pieramovach», — dadaje jon.
Dla Łukašenki vizit mieŭ palityčnaje značeńnie, kaža Śluńkin: «Navat paśla paciapleńnia ŭ adnosinach ź ES sustrečy ź jeŭrapiejskimi lidarami zastavalisia redkaściu. Orban byŭ ideałahičnym sajuźnikam i naturalnym partnioram: abodva aŭtarytarnyja, abodva skieptyčna nastrojenyja da ES, abodva prarasijskija».
Śluńkin piša, što Vienhryja taksama mieła značeńnie i dla Biełarusi, a nie tolki dla Łukašenki. «Z punktu hledžańnia 2026 hoda heta hučyć dzika, ale ŭ 2020 hodzie Budapiešt sapraŭdy spryjaŭ umacavańniu biełaruskaha suvierenitetu. Vienhryja i asabista Sijarta dapamahli źmiakčyć sankcyi ES suprać Minska. Heta dało Ministerstvu zamiežnych spraŭ Biełarusi bolš prastory dla arhumientacyi na karyść bolš prajeŭrapiejskaj linii źniešniaj palityki, asłableńnia ŭpłyvu prarasijskich «jastrabaŭ» (takich jak KDB, armija, MUS i h. d.) vakoł Łukašenki», — davodzić jon.
Śluńkin zhadvaje, što adnosiny pamiž Orbanam i Łukašenkam nie zadalisia.
«Mianie ździviła toje, što pamiž Łukašenkam i Orbanam nie było sapraŭdnaj iskry. Łukašenka abažaje abdymki, dakranańni, hučnyja kamlimienty i ŭmieje začaroŭvać. Orban ža nudziŭsia i adkazvaŭ biez asablivaha entuzijazmu», — zhadvaje jon.
Pieramovy i pres-kanfierencyja nie pryviali da realnaha vyniku, piša były dypłamat. Handal pamiž dźviuma krainami skłaŭ usiaho 255 miljonaŭ dołaraŭ. Jany abiacali davieści jaho da 500 miljonaŭ, ale da 2024 hoda jon upaŭ da 140 miljonaŭ. Sumiesnyja farmaceŭtyčnyja prajekty tak i nie ŭźlacieli. Wizz Air tak i nie vyjšła na rynak Minska praź vieta.
Zatym adbylisia skradzienyja prezidenckija vybary ŭ Biełarusi, masavyja represii i viartańnie sankcyj usiaho praź niekalki miesiacaŭ.
Śluńkin paraŭnoŭvaje vizit Orbana ŭ Biełaruś ź vizitam Vensa ŭ Vienhryju: «U červieni 2020 hoda Orban pryjechaŭ padtrymać Łukašenku pierad tymi vybarami. U 2026 hodzie Džej Dzi Vens prybyŭ u Budapiešt z anałahičnaj misijaj. U vyniku Łukašenka prajhraŭ tyja vybary Cichanoŭskaj z razhromnym likam, ale ŭtrymaŭ uładu z dapamohaj hvałtu i padtrymki Pucina. Pahladzim, čym skončycca historyja Orbana siońnia», — pisaŭ Śluńkin, kali vyniki vybaraŭ u Vienhryi jašče nie byli zrazumiełymi.
Jon dadaje jašče adzin cikavy fakt. Tady Łukašenka padaryŭ Orbanu futbolnuju cišotku z numaram «2» na joj. Akazałasia, padarunak byŭ prarockim — Orban finišavaŭ druhim.
Ciapier čytajuć
Vital z-pad Vilejki, jaki padpaliŭ chatu z ułasnymi dziećmi, zavierbavaŭsia ŭ rasijskaje vojska. I prapaŭ na pieršym ža bajavym zadańni5
Kamientary