Sacsietki abmiarkoŭvajuć vystup Džaścina Bibiera na fiestyvali, za jaki jamu zapłacili 10 miljonaŭ dalaraŭ. Što tam takoha?

U subotu, 11 krasavika, Džaścin Bibier vyjšaŭ na hałoŭnuju scenu adnaho z najbujniejšych muzyčnych fiestyvalaŭ u ZŠA — Coachella (Kalifornija). Zvyčajna chedłajniery tut ładziać maštabnyja šou z pastanoŭkami, śviatłom i śpiecefiektami.

Jak piša Business Insider, sam fakt źjaŭleńnia 32‑hadovaha śpievaka staŭ padziejaj: u apošnija hady Bibier amal nie vystupaŭ i nieadnarazova admianiaŭ tury — jaho Justice Tour u 2022 hodzie spyniŭsia na paŭdarozie, jak i raniejšy Purpose Tour (2016—2017). U apošnija hady jon źjaŭlaŭsia pierad publikaj tolki epizadyčna: z karotkimi numarami na ŭručeńniach premij abo jak niečakany hość na čužych kancertach.

Kali jaho abviaścili chedłajnieram Coachella, adrazu źjavilisia pytańni, kolki namahańniaŭ jon układzie ŭ hetaje hučnaje i darahoje mierapryjemstva. U vyniku śpiavak, jaki, pavodle miedyja, atrymaŭ kala 10 miljonaŭ dalaraŭ, abmiežavaŭsia minimalistyčnym setam.

Zamiest vialikaha šou z tancorami i pastanoŭkaj jon vyjšaŭ na scenu ŭ prostym vobrazie — u šortach i chudzi — i faktyčna pieratvaryŭ kancert u impravizavanuju «chatniuju siesiju».

Pavialičyć

Prykładna tracinu svajho 90‑chvilinnaha vystupu Bibier pravioŭ, siedziačy za noŭtbukam i šukajučy na YouTube svaje staryja videa: uklučaŭ ich i padpiavaŭ sabie maładomu. Śpiavak taksama šukaŭ staryja miemy z saboj i viartaŭsia da virusnych rolikaŭ, jakija kaliści zrabili jaho papularnym.

U hetym «nastalhičnym błoku» prahučali jaho hałoŭnyja rannija chity, u tym liku Baby, Never Say Never i inšyja pieśni, dziakujučy jakim jon staŭ viadomym.

Častku kancerta śpiavak pabudavaŭ jak uzajemadziejańnie z aŭdytoryjaj: prapanoŭvaŭ fanatam pisać u kamientarach, jakija pieśni jany chočuć pačuć, i padbiraŭ ich prosta padčas vystupu.

Mienavita hety momant staŭ virusnym. Kali Bibier na scenie šukaŭ čarhovaje videa, Keci Pery, jakaja była na fiestyvali ŭ supravadžeńni byłoha premjera Kanady Džaścina Trudo, pažartavała: «Dziakuj Bohu, što ŭ jaho jość YouTube Premium — nie daviadziecca hladzieć rekłamu». Videa ź jaje reakcyjaj chutka razyšłosia ŭ sietkach i stała adnym z hałoŭnych miemaŭ fiestyvalu.

Reakcyja na vystup akazałasia palarnaj: adny hledačy nazyvali jaho «lanivym» i niaŭdałym, inšyja ž, naadvarot, acanili ščyraść, nastalhiju i samu ideju — viartańnie da taho času, kali Bibier staŭ viadomym dziakujučy YouTube.

U 2026 hodzie śpiavak, pavodle miedyja, staŭ samym vysokaapłatnym chedłajnieram u historyi Coachella, a fanaty ŭžo žartujuć, nazyvajučy fiestyval «Bibierčełaj».

• 1
• 1
• 3
• 3
• 0
• 0
• 0
• 0