Keci Pery suprać Keci Pery. Aŭstralijskaja dyzajnierka vyjhrała pazoŭ suprać śpiavački, ź jakoj sudziłasia z-za imia
Sprava ciahnułasia try hady.
Aŭstralijski dyzajnier adzieńnia Keci Pery (pa-anhlijsku jaje imia pišacca jak Katie Perry) vyjhrała apielacyju ŭ Vysokim sudzie Aŭstralii ŭ šmathadovaj sprečcy ab tavarnym znaku sa svajoj amierykanskaj ciozkaj i pop-zorkaj Keci Pery (anhłamoŭnaje napisańnie jaje imia trochi adroźnivajecca: Katy Perry), piša Bi-bi-si.
U sieradu Vysoki sud pastanaviŭ, što dyzajnier Keci Tejłar, jakaja vykarystoŭvaje dziavočaje proźvišča Pery ŭ naźvie nievialikaj kampanii Katie Perry, nie naniesła škody reputacyi amierykanskaj śpiavačcy i nie vyklikała błytaniny sa svaim brendam adzieńnia (jon byŭ zasnavany ŭ 2007 hodzie).
Dyzajnier dva hady tamu vyjhrała pazoŭ suprać amierykanskaj śpiavački, jaki byŭ padadzieny, pakolki jana pradavała svaju suvienirnuju pradukcyju padčas vystupleńniaŭ u Aŭstralii.
Pazoŭ dyzajniera tyčyŭsia imiennaha «merču» śpiavački — chudzi, futbołak, šalikaŭ i spartyŭnych štanoŭ jaje brenda Kitty Purry, jakija pradavalisia ŭ kramach i anłajn padčas aŭstralijskich turne vykanaŭcy ŭ 2014 hodzie.
Tady sudździa pryjšła da vysnovy, što kampanija śpiavački, pradajučy i rekłamujučy tavary praz sacsietki, častkova parušyła pravy na aŭstralijski tavarny znak Katie Perry, pad jakim dyzajnier Keci Tejłar pradaje svajo adzieńnie ŭ internecie.
Ale ŭ 2024 hodzie hetaje rašeńnie było admieniena, a tavarny znak dyzajniera anulavany.
U novym rašeńni sud ukazaŭ, što reputacyja śpiavački Pery ŭ Aŭstralii nastolki ŭstajałasia, što luby, chto ŭbačyŭ by brend adzieńnia Tejłar, nie staŭ by błytać hetyja dva imiony.
«Heta byŭ nievierahodna doŭhi i ciažki šlach», — havorycca ŭ zajavie Tejłar, apublikavanaj nieŭzabavie paśla rašeńnia suda. «Ale siońniašniaje rašeńnie paćviardžaje toje, u što ja zaŭsiody vieryła: tavarnyja znaki pavinny abaraniać biznes luboha maštabu».
Pradstaŭnik amierykanskaj pop-zorki zajaviŭ, što śpiavačka «nikoli nie sprabavała zakryć biznes spadaryni Tejłar ci pieraškodzić joj pradavać adzieńnie pad brendam KATIE PERRY».
U čym sutnaść sprečki
U 2007 hodzie Tejłar — tady jana jašče nasiła dziavočaje proźvišča — zarehistravała biznes pad nazvaj Katie Perry i padała zajaŭku na tavarny znak.
Z 2008 hoda jana pradavała adzieńnie na miascovych rynkach, mieła sajt i niekalki akaŭntaŭ u sacyjalnych sietkach pad brendam Katie Perry.
Adnak u 2009 hodzie jurysty śpiavački Keci Pery paprasili Tejłar spynić vykarystoŭvać hety brend i paviedamili ab namiery asprečyć rehistracyju tavarnaha znaka. Paźniej jany admovilisia ad sudovych dziejańniaŭ.
«Kali ja pačynała svoj brend, ja nikoli nie čuła pra hetuju śpiavačku», — skazała Tejłar. U sudovych dakumientach havorycca, što ŭpieršyniu jana pačuła pra Keci Pery ŭ siaredzinie 2008 hoda, kali pa radyjo zahučała pieśnia I Kissed A Girl.
«Ja prosta budavała modny biznes pad imiem, jakoje atrymała pry naradžeńni», — kaža dyzajnier.
U 2023 hodzie Tejłar padała ŭ sud na śpiavačku za parušeńnie vykarystańnia tavarnaha znaka i vyjhrała: sud pastanaviŭ, što prodaž kurtak, chudzi, futbołak i spartyŭnych štanoŭ padčas tura 2014 hoda parušaŭ miascovaje zakanadaŭstva.
Adnak u 2024 hodzie hetaje rašeńnie było admieniena ŭ apielacyjnaj instancyi: sudździ ŭkazali, što Pery vykarystoŭvała svajo imia jak tavarny znak za piać hadoŭ da taho, jak Tejłar pačała svoj biźnies.
Tady Tejłar nazvała spravu «bitvaj Davida i Halijafa» i skazała, što była spustošana hetym rašeńniem.
«Heta sprava nikoli nie była prosta ab imieni», — skazała Tejłar paśla apošniaha sudovaha rašeńnia.
«Jana była ab abaronie małoha biźniesu ŭ Aŭstralii, ab tym, kab adstojvać spraviadlivaść i pakazvać, što kožny z nas maje značeńnie».
U apošnija hady Keci Pery časta akazvałasia ŭ centry ŭvahi pa roznych pryčynach — ad naśmiešak paśla taho, jak jana pacałavała ziamlu, vyjšaŭšy z kaśmičnaha karabla kampanii Blue Origin, da hučnaha razvodu z akcioram Arłanda Błumam i jaje novych adnosin — z byłym premjer-ministram Kanady Džaścinam Trudo.
Ad pryvatnikaŭ patrabujuć zavieści ideołaha ŭ štacie — raspytali, što robiać kampanii17
Kamientary