Piłot, jaki raźbiŭsia na deltapłanie pad Minskam, — hitaryst hurta «Ćviet Ałoe»
45‑hadovy instruktar aerakłuba «Avija-Miensk» Rusłan Ivanoŭ zahinuŭ na terytoryi Biełaruskaha dziaržaŭnaha muzieja narodnaj architektury i pobytu.
Stać piłotam Rusłan maryŭ ź dziacinstva, ale ŭ junactvie jaho ad hetaha adhavaryŭ baćka, taksama piłot.
Mužčyna paviarnuŭ u śfieru muzyki i karparatyvaŭ — bolš za 15 hod hraŭ na hitary ŭ hurcie «Ćviet Ałoe». U nulavyja heta była vielmi papularnaja hrupa, jaje, siarod inšaha, pryznavali «Adkryćciom hoda» na «Pieśni hoda».
Staroje žadańnie z časam uziało vierch — Ivanoŭ pajšoŭ vučycca lotać u Biełaruskuju dziaržaŭnuju akademiju avijacyi. Spačatku byŭ amataram, a praz try hady atrymaŭ kamiercyjnuju licenziju.
Razam ź siabram jany arhanizavali biznes «Avija-Miensk» — prapanoŭvali paloty na motadeltapłanie, hirapłanie, pavietranym šary. Ich miesca było adzinym u rajonie stalicy, dzie možna było bavić čas takim čynam.
Paśla pierachodu ŭ piłotnuju spravu Rusłan praciahvaŭ zajmacca muzykaj — u tym liku razam z kalehami pa «Ćviet Ałoe» jany vystupali na karparatyvach.
Razam ź piłotam zahinuła i 26‑hadovaja pasažyrka. Trahičnaja avaryja adbyłasia kala vioski Aziarco ŭ Minskim rajonie. Pa infarmacyi znajomych, pryčynaj stała toje, što pry ŭźlocie motadeltapłan «Frehat» trapiŭ u mocny strumień vietru, kryło załamała, i transpart pačaŭ padać.
Kamientary