28 studzienia 2026 hoda ŭ ahraharadku Maleč Biarozaŭskaha rajona raźvitalisia z Anatolem Sacharušam — viadomym ahranomam, hramadskim i palityčnym dziejačam. Jamu było 75 hadoŭ. Dla miascovych žycharoŭ jon zastavaŭsia čałaviekam, jaki zaŭsiody zmahaŭsia za intaresy svajoj supolnaści, nie bajaŭsia padymać vostryja prablemy i navat vydavaŭ ułasnuju nievialikuju hazietu, piša vydańnie pinsk.life.
Anatol Sacharuša naradziŭsia ŭ 1950 hodzie, atrymaŭ adukacyju ahranoma. Jašče z maładości jaho ciahnuła da niezaležnaj infarmacyi: u savieckija časy jon bačyŭ, jak starejšyja ŭpotaj słuchali zamiežnyja radyjostancyi. Padčas vučoby ŭ Pružanskim sielskahaspadarčym technikumie sam pačaŭ słuchać pieradačy dla biełarusaŭ z-za miažy.
U 1968 hodzie, kali savieckija vojski ŭviali ŭ Prahu, Sacharuša dazvoliŭ sabie zadać niazručnaje pytańnie vykładčyku. Toj paviedamiŭ pra heta kiraŭnictvu, u vyniku ŭ junaka zabrali radyjopryjomnik i praviali «vychavaŭčuju» razmovu z baćkami. Jaho nie adličyli, ale paśla hetaha, jak jon sam uspaminaŭ, za im pilna sačyli, a niekatoryja byli vymušanyja danosić.
Viarnuŭšysia z vojska, Sacharuša pracavaŭ u pakazalnym saŭhasie ŭ Malečy, kiravaŭ učastkam. Jon časta spračaŭsia z kiraŭnictvam, adstojvajučy svaje pohlady na ahranamiju, za što atrymaŭ mianušku «Jorš». Paźniej zavočna skončyŭ sielskahaspadarčuju akademiju, ale ŭ kamunistyčnuju partyju tak i nie ŭstupiŭ.
U časy Pierabudovy Anatol Sacharuša staŭ adnym z zasnavalnikaŭ Biełaruskaha Narodnaha Frontu. Jon pracavaŭ u kamandzie Zianona Paźniaka padčas pieršych prezidenckich vybaraŭ, u 2000‑ch hadach uvachodziŭ u Sojm Partyi BNF, udzielničaŭ u roznych palityčnych kampanijach. Jaho dobra viedali nie tolki ŭ rajonie, ale i na abłasnym uzroŭni.
Padčas vybaraŭ 2010 hoda ŭ Maleč pryjazdžaŭ staršynia abłvykankama Kanstancin Sumar — davieranaja asoba Łukašenki. Sacharuša ž u toj čas pradstaŭlaŭ kandydata ad BNF Ryhora Kastusiova i, karystajučysia situacyjaj, publična vystupiŭ z ahitacyjaj za svajho kandydata prosta padčas hetaha vizitu.
Anatol Sacharuša byŭ pierakananym adradžencam, paśladoŭna karystaŭsia biełaruskaj movaj i vydavaŭ u Malečy nievialikuju biełaruskamoŭnuju hazietu «Krynica».
Chočacie žyć doŭha — šukajcie rajon z narmalnymi drevami. Navukoŭcy vyśvietlili, što drevy ratujuć ad infarktaŭ, a hazony mohuć navat naškodzić zdaroŭju22
Kamientary