U centry Minska chočuć źnieści vielizarny zavod i pabudavać žyllo
Niezabavie pieramieny mohuć pryjści ŭ rajon vulic Pulichava — Čyrvonaarmiejskaj.
Tut płanujecca rujnavańnie dvuchpaviarchovych damoŭ, siadzibnych pabudoŭ, a taksama vielizarnaha zavoda. Zamiest ich niedaloka ad nabiarežnaj Śvisłačy źjaviacca šmatkvaternyja damy, hramadskija abjekty i novaja daroha, piša Realt.by.
Administracyja Leninskaha rajona Minska pravodzić hramadskaje abmierkavańnie horadabudaŭničaha prajekta detalovaha płanavańnia ŭ miežach «vulica Uljanaŭskaja — vulica Pieršamajskaja — vulica Pulichava — vulica Smalenskaja — vulica Lenina».
Havorka pra terytoryju płoščaj 78 hiektaraŭ. Na siońnia ŭ miežach prajekta žyvie ŭsiaho kala 1500 čałaviek. Tut raźmieščany žyłyja damy (sučasnyja šmatpaviarchoviki i staryja dvuchpaviarchovyja damy), hatel «Piekin», stankabudaŭničy zavod imia Kirava, adździaleńnie Biełaruskaj čyhunki, paliklinika i navat niekalki pryvatnych damoŭ.
Da kvartała prymykaje raka Śvisłač, hałoŭnaja minskaja vieładarožka, a taksama zialonyja zony — bulvar pa vulicy Pulichava i park imia 40‑hodździa Vialikaha Kastryčnika. Jość tut i histaryčna-kulturnyja kaštoŭnaści. Heta — terytoryja byłoha kapišča pobač sa Śvisłačču, a taksama žyłyja kvartały na Pieršamajskaj-Uljanaŭskaj.
Płany pieraŭtvareńnia hetaha spakojnaha kutočka stalicy abmiarkoŭvajucca nie ŭpieršyniu. Tak, adno z hučnych hramadskich abmierkavańniaŭ adbyłosia tut jašče ŭ 2017 hodzie, a ŭ 2019 hodzie my raspaviadali, jak u adnym z dvuchpaviarchovych damoŭ, prysudžanaha da rujnavańnia, žyvie były doktar Piotra Mašerava.
Zhodna z prajektam, dla dvuchpaviarchovych damoŭ pa Čyrvonaarmiejskaj, 20 i 22 ničoha nie źmianiłasia. Horadabudaŭniki pa-raniejšamu majuć namier ich źnieści. Na vyzvalenaj terytoryi prapanujecca raźmiaščeńnie sacyjalnych ci handlova-pobytavych abjektaŭ.
Taksama pad buldozier pavinna trapić cudam zachavanaja tut žyłyja siadzibnyja pabudovy — heta šeść pryvatnych damoŭ pa vulicy Smalenskaj.
Adno z samych vialikich pieraŭtvareńniaŭ — vynas z prajektavanaj terytoryi budynkaŭ zavoda imia Kirava, a taksama składoŭ i majsterniaŭ. Źviartajem uvahu, što ciapier budynki na hetaj terytoryi naležać roznym kampanijam, jakija kaliści kupili hetu ziamlu na aŭkcyjonie. U płanie zhadvajucca takija pradpryjemstvy, jak «Płazma Bud», «Biełbiznesaljans», «Fieliks». Na miescy zavodskich karpusoŭ u budučym płanujecca pabudavać šmatfunkcyjanalnyja kompleksy z błokami žyłoj šmatkvaternaj vysokaščylnaj zabudovy.
Novabudoŭli buduć zabiaśpiečany aŭtastajankami, parkinhami i hramadskim transpartam. Taksama ŭ kvartale pabudujuć dziciačy sadok na 230 miescaŭ, handlova-pobytavyja centry i spartyŭna-azdaraŭlenčy centr.
Darečy, u apisańni prajekta jość cikavaja zaŭvaha: «Dola žyłoj častki ŭ składzie šmatfunkcyjanalnych kompleksaŭ i budynkaŭ nie pavinna pieravyšać 50% ahulnaj płoščy». Akramia taho, niedapuščalna raźmiaščeńnie žyłych pamiaškańniaŭ na pieršych pavierchach budynkaŭ i zbudavańniaŭ.
Jak i raniej, u płanach horadabudaŭnikoŭ značycca novaja vulica i novy most praz raku Śvisłač. Prajektanty chočuć złučyć Čyrvonaarmiejskuju i Leninu. Praciahłaść novaj vulicy składzie mienš za kiłamietr. Da słova, u minuły raz žychary vystupali suprać aŭtamabilnaj darohi pad voknami, bo zaraz tam rastuć drevy i znachodzicca spartyŭnaja placoŭka.
U vyniku ŭsich źmianieńniaŭ nasielnictva mikrarajona pavialičycca z 1470 da 3800 čałaviek, a ahulnaja kolkaść kvater vyraście z 683 da 1693. Pravieści ŭsie pieraŭtvareńni płanujecca ŭ raźlikovy termin da 2035 hoda. Materyjały prajekta ŭžo vykładzieny na sajcie administracyi Leninskaha rajona.
Hramadskaje abmierkavańnie prajekta budzie prachodzić z 29 studzienia pa 12 lutaha. Zaŭvahi i prapanovy z pamietkaj «hramadskaje abmierkavańnie» prymajuć u termin praviadzieńnia hramadskaha abmierkavańnia pa adrasie: 220 006, Minsk, Majakoŭskaha, 83 (ci na elektronny adras: [email protected]). Vyniki hramadskaha abmierkavańnia padviaduć na pasiadžeńni architekturna-horadabudaŭničaha Savieta pry hałoŭnym architektary horada Minska.
Ciapier čytajuć
Palitviazień Kim Samusienka paraŭnaŭ śviet na momanty jaho pasadki i vyzvaleńnia: Usio niadrenna dla jeŭrapiejskaj cyvilizacyi, a značyć, i dla biełarusaŭ2323
Kamientary