49 tysiač mihrantaŭ prybyli za sutki ŭ ispanskuju Sieutu

Urad Ispanii nakiravaŭ vajskovyja padraździaleńni dla ŭzmacnieńnia palicyi ŭ svaim paŭnočnaafrykanskim ankłavie Sieuta paśla taho, jak u čaćvier mihranty z boku Maroka prarvali aharodžu vakoł horada. Francyja ŭzmacniaje pamiežny kantrol, a Italija zaklikaje prypynić dziejańnie Šenhienskaha pahadnieńnia ŭ dačynieńni da Ispanii, piša Bi-bi-si.

Ispanski dziaržaŭny telekanał TVE spačatku paviedamiŭ, što miažu pierasiekli ad 2 da 3 tysiač čałaviek, adnak da ranicy piatnicy, pavodle papiarednich acenak sił biaśpieki, hetaja ličba pavialičyłasia ŭ dziasiatki razoŭ. Za apošnija dni, pieravažna ŭ čaćvier, miažu nielehalna pierasiekli bolš za 40 tysiač čałaviek. Ministerstva ŭnutranych spraŭ Ispanii paviedamiła pra 49 tysiač mihrantaŭ, jakija prybyli ŭ Sieutu.

Na apublikavanych videakadrach byli zafiksavanyja sotni mihrantaŭ, jakija płyli abo drejfavali na nadzimanych kruhach, a taksama praryvalisia praz varoty na sušy i nakiroŭvalisia ŭ Sieutu. Niekatoryja ź ich kryčali: «Niachaj žyvie Ispanija!»

Sieuta, raźmieščanaja na paŭnočnym uźbiarežžy Maroka, adździelenaja ad macierykovaj Ispanii Hibrałtarskim pralivam i ŭžo doŭhi čas zastajecca metaj dla mihrantaŭ, jakija imknucca trapić u Jeŭropu.

Na pačatku lipienia Viarchoŭny sud Ispanii pastanaviŭ, što mihranty, zatrymanyja ŭ mory pry sprobie dabracca da Sieuty, nie mohuć viartacca ŭ sproščanym paradku, jaki dazvalaŭ uładam nieadkładna adpraŭlać nazad ludziej, zatrymanych pry sprobie pieraadoleć pamiežnyja aharodžy. Pavodle ŭrada Ispanii, «vykarystańnie hetaha rašeńnia mafijaj i złačynnymi arhanizacyjami» stała pryčynaj rezkaha rostu mihracyi.

Pavodle žurnalista AFP, u čaćvier uviečary sotni ludziej ściakalisia ŭ paŭnočnamarakanski horad Fnidk paśla taho, jak raspaŭsiudzilisia čutki pra adkryćcio miažy ź ispanskaj Sieutaj.

«Heta było vielmi ciažka. Palicyja sprabavała nas spynić. Ale naša vola i rašučaść dazvolili nam dabracca siudy», — cytuje adnaho z tych, chto prarvaŭsia ŭ ankłaŭ, Džadzida Zakaryju ahienctva Reuters.

«Paśla rašeńnia Viarchoŭnaha suda patok byŭ nievialiki, ale siońnia jon rezka ŭzmacniŭsia», — paviedamiŭ vydańniu pradstaŭnik Hramadzianskaj hvardyi Ispanii.

Pavodle danych uładaŭ, u čaćvier byli znojdzienyja dzieviać ciełaŭ, što pavialičyła kolkaść zahinułych mihrantaŭ, jakija sprabavali trapić u Sieutu za apošnija miesiacy, da 60 čałaviek.

Urad paviedamiŭ, što z macierykovaj častki Ispanii prybyli 200 supracoŭnikaŭ śpiecyjalnych padraździaleńniaŭ palicyi i 60 vajskoŭcaŭ dla ŭzmacnieńnia rehularnych sił ankłava.

Pavialičyć

Padziei nahadvajuć situacyju 2021 hoda, kali za niekalki dzion u ankłaŭ z nasielnictvam kala 85 tysiač čałaviek prybyli kala 10 tysiač čałaviek z Maroka i inšych krain Afryki. Premjer-ministr Ispanii Piedra Sančes u piatnicu naviedaje Sieutu razam ź ministram unutranych spraŭ Fiernanda Hrande-Marłaska. Čakajucca sustrečy z pradstaŭnikami sił biaśpieki i miascovych uładaŭ, paviedamiła jaho kancylaryja.

Raniej Hramadzianskaja hvardyja Ispanii zajaviła, što mihranty «masava prybyvajuć pa mory» ŭ rajonie vołnareza Tarachal — pamiežnaj damby, jakuju možna abminuć upłaŭ i trapić u Sieutu. U zajavie adznačałasia, što palicyja nie spraŭlajecca ź situacyjaj.

Enrykie Sierana, uładalnik kramy žanočaha adzieńnia ŭ centry Sieuty, paviedamiŭ Reuters, što pradprymalniki arhanizoŭvajuć atrady samaabarony, aścierahajučysia, što resursaŭ palicyi budzie niedastatkova.

Sieuta i Mielilja — jašče adzin ispanski aŭtanomny horad u Paŭnočnaj Afrycy — heta adzinyja nasielenyja punkty na terytoryi Jeŭrapiejskaha sajuza, jakija majuć suchaputnuju miažu z Afrykaj. U abodvuch haradach pieryjadyčna nazirajucca ŭsploski sprob nielehalnaha pierasiačeńnia miažy mihrantami, jakija imknucca trapić u Jeŭropu.

Jak adznačaje Reuters, u Jeŭrapiejskim sajuzie sacyjalistyčny ŭrad Ispanii vyłučajecca pramihracyjnaj pazicyjaj. Niadaŭna ispanskija ŭłady zapuścili prahramu lehalizacyi prykładna 500 tysiač mihrantaŭ biez dakumientaŭ, što vyklikała łavinu zajaŭ, kolkaść jakich bolš čym udvaja pieravysiła hety pakazčyk.

• 1
• 1
• 5
• 19
• 4
• 0
• 7
• 0