U Šejmana znajšli jašče adnu mahčymuju kachanku i syna. Sakratarka biez vyšejšaj adukacyi za ličanyja hady stała ŭłaśnicaj raskošnych damoŭ i handlovaha centra

Novaje rasśledavańnie žurnalistaŭ Biełaruskaha rasśledavalnickaha centra, padrychtavanaje dziakujučy «Rabočamu Ruchu», «Kibierpartyzanam» i supolnaści ŭkrainskich chakieraŭ KibOrg, źviartaje ŭvahu na historyju dziŭnaha i imklivaha ŭzbahačeńnia ŭradženki Babrujska Aleny Saŭčanka.

U studzieni 2005 hoda 26‑hadovaja Alena Saŭčanka ŭładkavałasia na Mižrehijanalny drabilna-sartavalny zavod (MDSZ), jaki pracavaŭ pobač ź dziaržaŭnym pradpryjemstvam «Hranit» — adnym z najbujniejšych vytvorcaŭ ščebniu ŭ Jeŭropie. Da hetaha, pavodle aficyjnych źviestak, jana pracavała tolki sakratarkaj u pryvatnaj kampanii. Adnak užo praź dzieviać miesiacaŭ Saŭčanka stała ŭładalnicaj 40% zavoda.

Jaje siamju možna nazvać upłyvovaj: u siaredzinie 2000‑ch baćka słužyŭ načalnikam rajonnaha ŭpraŭleńnia KDB u Kaściukovickim rajonie, a maci pracavała ŭ pradstaŭnictvie rasijskaj pryvatnaj kampanii. Adnak, na dumku aŭtaraŭ rasśledavańnia, navat heta nie tłumačyć, jak Saŭčanka atrymała amal pałovu pradpryjemstva, jakoje mieła dostup da adnaho z syravinnych resursaŭ krainy. 

Pryvid u pašpartnaj bazie

Syn Aleny Saŭčanki Uładzimir naradziŭsia ŭ 2002 hodzie. Na toj momant žančynie było 24 hady, jana nie była zamužam, a źviestak pra jaje aficyjnuju pracu ŭ toj pieryjad BRC nie znajšoŭ.

Pavodle vypiski z pašpartnaj bazy, atrymanaj ad «Kibierpartyzanaŭ», baćkam jaje syna paznačany Viktar Uładzimiravič Saŭčanka. Ale takoha čałavieka nie isnuje — danyja baćki nie pryviazanyja ni da adnaho sapraŭdnaha pašparta. U toj ža čas jany častkova supadajuć z dadzienymi Viktara Šejmana. 

Adnak adnaho hetaha supadzieńnia było b niedastatkova, kab mierkavać pra svajactva. Tamu BRC pravieryŭ, ci byli pamiž Šejmanam, Saŭčanka i jaje synam inšyja suviazi. I znajšoŭ ich. 

U 2009 hodzie siamihadovy Uładzimir Saŭčanka i jaho babula Zoja Saŭčanka lacieli pryvatnym samalotam ź Minsku ŭ Simfieropal razam ź Viktaram Šejmanam i jaho davieranaj asobaj Alaksandram Ramanoŭskim. Aproč ich, na borcie byŭ tolki ekipaž. U tym ža składzie jany prylacieli nazad u Minsk, taksama biznes-džetam. U tym ža hodzie Šejman, Alena Saŭčanka i jaje syn razam palacieli ŭ Abjadnanyja Arabskija Emiraty. U 2012‑m jany paŭtaryli hety maršrut.

A ŭ 2021 hodzie na imia Šejmana, Uładzimira Saŭčanki i Michaiła Puškarova (mierkavanaha syna Šejmana ad Hanny Puškarovaj, ciapierašniaj mierkavanaj spadarožnicy) byli razam zabraniravanyja kvitki na Kubu, u kurortny horad Varadera. Broń na Uładzimira paźniej admianili, jon nie zmoh palacieć, imavierna, praz vypusknyja ekzamieny.

Na hetym supadzieńni nie skončylisia. U 2022 hodzie Uładzimir Saŭčanka razam ź Viktaram Šejmanam, Hannaj i Michaiłam Puškarovymi zdavaŭ testy na COVID-19 u Respublikanskim kliničnym miedyčnym centry. U bazie ŭstanovy ich analizy zarehistravanyja paśladoŭna.

Sami pa sabie ni zapis u pašpartnaj bazie, ni sumiesnyja pieraloty, ni naviedvańnie kliniki nie davodziać, što Viktar Šejman źjaŭlajecca baćkam Uładzimira Saŭčanki. Adnak razam hetyja fakty śviedčać pra ich praciahłyja i blizkija suviazi. Na ich fonie imklivaje ŭzbahačeńnie Aleny Saŭčanki ŭžo nie vyhladaje vypadkovym.

Ź Mikaševič na Niamihu

Aktyvy Aleny Saŭčanki pačali pavialičvacca z naradžeńniem syna. Praz dva hady paśla prychodu na Mižrehijanalny drabilna-sartavalny zavod jana vyjšła z hetaha biznesu.

Jana atrymała doli ŭ niekalkich kampanijach hrupy «Hipierkom», a taksama dva kamiercyjnyja pamiaškańni ŭ biznes-centry «Niamiha Sici», dzie ŭ rozny čas raźmiaščalisia kampanii, jakija źviazvajuć z atačeńniem Viktara Šejmana.

Takim čynam mienš čym za try hady žančyna, jakaja da hetaha pracavała sakratarkaj, stała saŭładalnicaj niekalkich kampanij i ŭładalnicaj kaštoŭnaj kamiercyjnaj nieruchomaści ŭ centry Minska.

BRC nie znajšoŭ dakumientaŭ, jakija b naŭprost tłumačyli, čamu doli ŭ hetych kampanijach pierachodzili mienavita da Saŭčanki, ale ŭžo ŭ 2008 hodzie hetym pytańniem zacikavilisia śledčyja Ministerstva ŭnutranych spraŭ dy raspačali adrazu dźvie kryminalnyja spravy.

Pavialičyć

Pieršaja datyčyła vykarystańnia padroblenaha dypłoma pry pracaŭładkavańni ŭ MDSZ i «Hipierkom». Druhaja — vydzialeńnia biez aŭkcyjonu čatyroch ziamielnych nadziełaŭ u vioscy Tarasava pad Minskam Alenie Saŭčanka i kiraŭniku handlovaha domu «Ždanovičy». Ziamla ŭ Tarasavie — adna z samych darahich u krainie.

Jak raskazvaŭ «Biełaruskamu partyzanu» były načalnik adździeła pa baraćbie z karupcyjaj MUS Viačasłaŭ Dudkin, jaki kiravaŭ rasśledavańniem, Saŭčanka pryznała vykarystańnie padroblenaha dypłoma, a pravierku jaje dachodaŭ, pavodle jaho słoŭ, spynili paśla ŭmiašańnia Viktara Šejmana, jaki pierakanaŭ Alaksandra Łukašenku dać adpaviednuju kamandu i «zhubić» materyjały spravy.

Kryminalnuju spravu ab padroblenym dypłomie zakryli, a niezakonna pieradadzienyja ziamielnyja nadzieły zastalisia ŭ rasparadžeńni Aleny Saŭčanka, niahledziačy na toje, što staršynia sielsavieta atrymaŭ za ich vydzialeńnie čatyry hady kałonii.

Pa susiedstvie z Šejmanam

Kryminalnyja spravy nie paŭpłyvali na finansavy stan Aleny Saŭčanka. Pavodle BRC, jašče da taho, jak MUS zacikaviłasia pachodžańniem jaje majomaści, jana ŭžo vałodała domam i ziamielnym učastkam u Raŭbičach, dvuma ŭčastkami ŭ Tarasavie, dzie paźniej źjaviŭsia katedž płoščaj kala 700 kvadratnych mietraŭ, a taksama dvuma kamiercyjnymi pamiaškańniami ŭ biznes-centry «Niamiha Sici».

Pavialičyć

Žurnalisty aceńvajuć, što tolki hetyja pamiaškańni mohuć prynosić ad 15 da 20 tysiač rubloŭ arendnaha dachodu na miesiac.

Da sakavika 2012 hoda Saŭčanka vyjšła sa składu ŭsich minskich kampanij. Tady ž adbyłasia apošniaja sumiesnaja pajezdka, jakuju BRC zdoleŭ paćvierdzić, — u Abjadnanyja Arabskija Emiraty razam ź Viktaram Šejmanam.

Paśla hetaha ŭ rasśledavańniach pobač z paplečnikam Łukašenki ŭžo fihuruje inšaja žančyna, Hanna Puškarova, a kali i pry jakich abstavinach zaviaršylisia adnosiny Šejmana i Saŭčanka, nieviadoma.

Pavialičyć

Niahledziačy na hetyja źmieny ŭ asabistym žyćci, paśla 2012 hoda aktyvy Saŭčanka praciahvali pavialičvacca. U 2013 hodzie jana atrymała ŭ padarunak dva katedžy ŭ Vialikaj Ślapiancy — rajonie kala Nacyjanalnaj biblijateki z prestyžnaj nieruchomaściu, paźniej nabyła jašče dva kamiercyjnyja pamiaškańni, a ŭ 2019 hodzie stała adzinaj uładalnicaj kampanii «Kuvieradzieŭ», jakoj naležyć bujny handlovy centr u Minsku.

Pavodle padlikaŭ BRC, razam ź inšaj kamiercyjnaj nieruchomaściu hetyja aktyvy ciapier mohuć prynosić kala 100 tysiač rubloŭ štomiesiac ($33 500).

Ciapier, jak śćviardžajuć rasśledavalniki, Saŭčanka žyvie ŭ vialikim domie ŭ Ščomyślicy pad Minskam. Jon raźmieščany na ŭčastku płoščaj kala paŭhiektara sa štučnym vadajomam i mastkom. 

Pavialičyć

Syn Aleny Saŭčanki Uładzimir u 2017—2021 hadach vučyŭsia ŭ šviejcarskim Institut auf dem Rosenberg — samaj darahoj pryvatnaj škole śvietu. U 2025‑m adzin hod vučoby kaštavaŭ $215 tysiač. To-bok biez uliku dadatkovych vydatkaŭ košt navučańnia za čatyry hady moh skłaści kala $800 tysiač.

Nieviadoma, chto mienavita apłačvaŭ vučobu Uładzimira — maci ci Viktar Šejman. Pavodle znojdzienych dakumientaŭ, jon zachoŭvaŭ adnosiny z Uładzimiram Saŭčankam u pieryjad jahonaha navučańnia ŭ Šviejcaryi i paśla zakančeńnia vučoby. Tak, u červieni 2022 hoda Uładzimir pryjechaŭ u Abchaziju ŭ tyja samyja dni, kali tam pa aficyjnych spravach znachodziŭsia Viktar Šejman.

Fihuranty rasśledavańnia nie stali davać kamientaroŭ.

• 0
• 0
• 0
• 0
• 0
• 0
• 3
• 0