Łatuška nie vieryć, što Mielnikava kupiła ŭ Minsku kvatery
Kiraŭnik Narodnaha antykryzisnaha ŭpraŭleńnia Pavieł Łatuška ŭ efiry «Jeŭraradyjo» prakamientavaŭ novuju infarmacyju «Kibierpartyzanaŭ» pra byłuju śpikierku Kaardynacyjnaj rady Anžaliku Mielnikavu. Jon nie ličyć abnarodavanyja materyjały dastatkovymi dokazami.
Niadaŭna stała viadoma, što Mielnikava z dvuma dziećmi žyvie ŭ Minsku ŭ kvatery na vulicy Piatra Mścisłaŭca, a taksama toje, što ŭ 2022 hodzie jana pryjazdžała z Polščy ŭ Biełaruś, a jaje muž viarnuŭsia ŭ Polšču.
U efiry «Jeŭraradyjo» Źmicier Łukašuk pacikaviŭsia ŭ Paŭła Łatuški, ci paŭpłyvali novyja źviestki na jaho acenku situacyi.
«Jakija fakty? Nazavicie choć adzin fakt. Faktaŭ my nie pabačyli. Heta piśmovyja śćviardžeńni, ale nie fakty. Pry ŭsioj pavazie da «Kibierpartyzanaŭ», — adkazaŭ Łatuška na pytańnie.
Jak davodzić palityk, zastajucca try klučavyja pytańni, na jakija niama adkazaŭ:
«Pa-pieršaje, kali heta adbyłosia? Kali my ličym, što jana była ahientkaj ci aficeram śpiecsłužby. Pa-druhoje, pry jakich abstavinach — ci heta byŭ šantaž, podkup, prymus. I treciaje pytańnie: jaki na siońniašni dzień jana maje status?».
Łatuška padkreśliŭ, što zvyčajna kamientuje tolki toje, što možna paćvierdzić faktami. Adnak u hetaj situacyi, pavodle jaho, z-za niedachopu infarmacyi jamu davodzicca pierajści da hipotez.
«Zaraz budu śpiekulavać pieršy raz», — papiaredziŭ jon.
Palityk dapuskaje, što «Kibierpartyzany» sapraŭdy mohuć vałodać dadatkovymi materyjałami, jakija jašče nie byli apublikavanyja. Adnak, na jaho dumku, nielha vyklučać i «dezinfarmacyjnaj hulni KDB».
Tłumačačy svaju łohiku, jon źviarnuŭ uvahu na infarmacyju pra mahčymyja asabistyja adnosiny Mielnikavaj z supracoŭnikam biełaruskaj kontrvyviedki. Pavodle Łatuški, kali b jana ŭžo była supracoŭnicaj śpiecsłužbaŭ, to «zavieści raman z aficeram kontrvyviedki KDB za miažoj padčas śpiecapieracyi — heta parušeńnie ŭsich instrukcyj».
U toj ža čas palityk ličyć mahčymym scenar «miadovaj pastki».
«Takija scenaryi vykarystoŭvajucca śpiecsłužbami. I na niejkim etapie joj raskryli hetuju situacyju», — ličyć Łatuška.
Na jaho dumku, kali niešta padobnaje i adbyłosia, to naŭrad ci na rańnim etapie.
«Chutčej za ŭsio, na apošnim etapie, bo jašče mienavita ŭ studzieni [2025 hoda] prymalisia vielmi važnyja stratehičnyja rašeńni ŭ intaresach demakratyčnych sił, za jakimi stajała Mielnikava. I słuchańni pa adkaznaści Łukašenki ŭ Kaardynacyjnaj radzie — heta studzień.
I pryznańnie Sienatam Polščy Kaardynacyjnaj rady — taksama studzień. I vystupleńnie ŭpieršyniu našaj aficyjnaj delehacyi ŭ Parłamienckaj asamblei Rady Jeŭropy, dzie jana zaklikała nie pryznavać Łukašenku, pryciahnuć jaho da adkaznaści i pryznać demakratyčnyja instytuty pradstaŭnikami biełarusaŭ, — heta taksama studzień.
Tak voś, kali heta adbyłosia da studzienia, to heta niełahična», — zrabiŭ vysnovu palityk.
Asobna jon prakamientavaŭ infarmacyju pra nabyćcio Mielnikavaj nieruchomaści. Pavodle Łatuški, jamu ciažka ŭjavić, što biełaruskija ŭłady mahli nie tolki dazvolić joj vyvieści ŭłasnyja srodki, ale jašče i dadatkova ŭznaharodzić jaje.
«U hetaj situacyi ja mahu zadać pytańnie: za jakija vyniki? Jakija vyniki? Voś vynikaŭ my nie bačym. Što jana takoha zrabiła? Nu, była škoda reputacyi. Ale Kaardynacyjnaja rada vystajała. Była sproba vykinuć nas z PARIE, ale my vystajali. Jaje pavinny byli ŭznaharodzić. Za što jaje ŭznaharodzić? Kankretnaha vyniku niama», — davodzić Łatuška.
Palityk adznačyŭ, što navat kali ŭ vyniku historyi byli naniesienyja reputacyjnyja i finansavyja straty, jany nie pryviali da kałapsu Kaardynacyjnaj rady.
Pavodle palityka, kali b ułady sapraŭdy chacieli adździačyć Mielnikavaj za supracoŭnictva, to najbolš vierahodnym varyjantam było b prosta pakinuć jaje ŭ spakoi.
«Maksimum, što režym moh zrabić: «Zrabiła, pracavała na nas. Dobra, idzi hulaj. Dobra, što nie pasadzili. Voś maksimum. Ale kvatery…»», — ličyć Łatuška.
Pavodle jaho, mienavita hetaja niestykoŭka i prymušaje razhladać inšyja mahčymyja tłumačeńni taho, što adbyvajecca.
«U mianie ŭźnikaje pytańnie, ci nie źjaŭlajecca heta dezinfarmacyjnaj hulnioj. Ja nie śćviardžaju, ja siońnia tolki śpiekuluju», — padkreśliŭ palityk.
U adkaz na kamientar adnaho z hledačoŭ, jaki sens dezinfarmacyi, kali Mielnikava ŭžo nie ŭvachodzić u kiraŭnictva demakratyčnych sił, Łatuška patłumačyŭ:
«Tut moža być inšy padychod. Prademanstravać, naprykład, inšym: «Hladzicie, kali vy pojdziecie na supracoŭnictva z nami, my vas možam vybačyć. Navat svaje hrošy zabieracie. My jašče i dadamo — atrymlivajecca tam 250—300 tysiač dalaraŭ. Hałoŭnaje — pierachodźcie na naš bok».
Ale heta nierealistyčny scenaryj. Dabaŭlać jašče 300 tysiač za toje, što čałaviek biŭ režym, jašče ŭ «kibierach» pracavaŭ i kolki dapamahaŭ «kibieram»? (…) I za heta joj uznaharodu dać, kvateru, dabavić jašče hrošy — i žyvi, radujsia žyćciu, jašče i pašpart prykryćcia addać? Pakul heta nie składvajecca».
Kamientary
achchach