Rahačoŭskaha aktyvista Dzianisa Daškieviča abvinavačvajuć u padrychtoŭcy zamachu na dziaciej Cichanoŭskaj

Zasnavany Ramanam Pratasievičam prapahandyscki Telegram-kanał Sprava śćviardžaje, što rahačoŭski aktyvist Dzianis Daškievič nibyta rychtavaŭ zamach na dziaciej Śviatłany Cichanoŭskaj. Mienavita pra hety «terakt, jaki rychtujecca», MZS Biełarusi, pavodle viersii kanała, papiaredziła polski bok.

Kanał zajaŭlaje, što Daškievič nibyta płanavaŭ zabić dziaciej Cichanoŭskaj «rukami ŭkraincaŭ», paśla čaho «zrabić palityčnuju zajavu i ździejśnić samahubstva».

Sprava taksama śćviardžaje, što polskija ŭłady pryznali Daškieviča pahrozaj nacyjanalnaj biaśpiecy i raspačali praceduru jaho departacyi. Pavodle viersii kanała, jon źviartaŭsia pa dapamohu da Śviatłany Cichanoŭskaj i demakratyčnych sił, ale nie atrymaŭ padtrymki.

Pavodle infarmacyi Reform.news, Upraŭleńnie pa spravach zamiežnikaŭ Polščy sapraŭdy pačało praceduru pazbaŭleńnia Dzianisa Daškieviča statusu biežanca pa zapycie Ahienctva ŭnutranaj biaśpieki (ABW). Pra heta śviedčać dakumienty, jakija apynulisia ŭ rasparadžeńni redakcyi.

Zhodna z paviedamleńniem ad 18 maja 2026 hoda, vytvorčaść była raspačataja pa zajavie ABW. U dakumiencie adznačajecca, što viedamstva pavinna pravieryć, «ci pa-raniejšamu isnujuć abstaviny, na padstavie jakich byŭ pradastaŭleny status biežanca».

Pry hetym u paviedamleńni nie raskryvajucca pryčyny zvarotu ABW i nie pryvodziacca jakija-niebudź abvinavačańni ŭ adras Daškieviča.

U miežach pracedury polskija ŭłady zapatrabavali ad jaho dać piśmovyja tłumačeńni.

U pryvatnaści, Daškievič pavinien paviedamić:

• dzie jon pražyvaŭ paśla atrymańnia statusu biežanca ŭ Polščy;
• čym zajmaŭsia paśla atrymańnia hetaha statusu;
• źviestki pra svaju sudzimaść u Polščy i inšych krainach Jeŭrapiejskaha sajuza.

Akramia taho, Upraŭleńnie pa spravach zamiežnikaŭ prapanavała jamu vykłaści pryčyny, pavodle jakich jon nie pavinien być pazbaŭleny statusu biežanca.

Na padrychtoŭku piśmovych tłumačeńniaŭ viedamstva adviało siem dzion z momantu atrymańnia lista. Adkaz nieabchodna było nakiravać va Upraŭleńnie pa spravach zamiežnikaŭ u Varšavie.

Pavodle papiaredniaj infarmacyi, Upraŭleńnie pryniało rašeńnie pazbavić Daškieviča statusu biežanca. Ciapier jon znachodzicca na svabodzie.

Ofis Cichanoŭskaj prakamientavaŭ situacyju i nazvaŭ heta pravakacyjaj.

«Roznaha kštałtu pahrozy my atrymlivajem rehularna. Takim čynam režym metanakiravana sprabuje zapałochać pradstaŭnikoŭ demakratyčnaha ruchu, a taksama akazać cisk na krainy, jakija pryniali biełarusaŭ. Časam śpiecsłužby režymu karystajucca ŭraźlivym stanoviščam biełarusaŭ, jakija praz represii apynulisia ŭ składanaj žyćciovaj situacyi.

Kankretna ŭ hetym vypadku ŭ nas niama nijakaj dadatkovaj infarmacyi, akramia toj, jakuju apublikavali MZS Biełarusi i praŭładnyja prapahandysckija kanały. Heta vyhladaje jak čarhovaja pravakacyja ź ich boku. My nie padtrymlivali suviazi z hetym čałaviekam, a jurydyčnaja kamanda taksama nie atrymlivała ad jaho nijakich zvarotaŭ», — zajavili ŭ Ofisie Cichanoŭskaj.

Dzianis Daškievič — zasnavalnik rehijanalnaha resursu «Rahačoŭ anłajn». U 2022 hodzie jon vyjechaŭ ź Biełarusi ŭ Polšču.

U 2023 hodzie jaho zavočna aštrafavali pa administracyjnaj spravie ab raspaŭsiudžvańni «ekstremisckich materyjałaŭ» za fatahrafiju prezidenta Polščy Andžeja Dudy na fonie ściaha, jaki vykarystoŭvaŭsia padčas mierapryjemstvaŭ polska-vienhierskaha siabroŭstva ŭ 2016 hodzie. Ściah ujaŭlaje saboj bieła-čyrvona-biełaje pałotnišča z vyjavaj dvuch dreŭ u centry.

U 2023 hodzie Daškievič zajaviŭ, što nakiravaŭ u MZS Biełarusi list ab admovie ad biełaruskaha hramadzianstva.

• 0
• 0
• 2
• 2
• 0
• 0
• 2
• 0