Na jakim baku nasamreč lepš spać?

Z padrabiaznaściami znajomić Biology Insights.

Niezaležna ad taho, na jakim z bakoŭ čałaviek śpić, takaja poza ličycca adnym z najbolš efiektyŭnych sposabaŭ pamienšyć chrap i palehčyć prajavy abstruktyŭnaha apnoe snu. Kab nie pieravaročvacca ŭ śnie, vykarystoŭvajuć śpiecyjalnyja paduški abo navat prosty tenisny miač, zamacavany na śpinie pižamy.

Jašče adna mahčymaja pieravaha snu na baku źviazanaja z rabotaj mozhu. Padčas snu ŭ mozhu bolš aktyŭna pracuje sistema, jakaja vyvodzić pradukty abmienu. Jana dapamahaje pazbaŭlacca, u tym liku, ad takich białkoŭ, jak beta-amiłoid i taŭ, jakija nazapašvajucca ciaham dnia i źviazvajucca z raźvićciom chvaroby Alchiejmiera.

Daśledavańni pakazvajuć, što son na baku moža spryjać bolš efiektyŭnaj cyrkulacyi śpinnamazhavoj vadkaści i, adpaviedna, lepšamu «ačyščeńniu» mozhu, čym son na śpinie abo žyvacie. Adnak navukoŭcy padkreślivajuć: šmat važniejšaja za pozu dastatkovaja praciahłaść snu, bo niedasypańnie paharšaje hety praces niezaležna ad stanovišča cieła.

Niedachopy snu na baku

Praciahły cisk na plačo, ściahno i bakavuju častku hrudnoj kletki moža vyklikać bol i navat zapaleńnie plečavoha sustava (bursit), asabliva ŭ ludziej, jakija ŭžo majuć prablemy ź plačom. Kab pamienšyć nahruzku, śpiecyjalisty rajać mianiać bok ciaham nočy, vykarystoŭvać matrac, jaki dobra raźmiarkoŭvaje vahu, i kłaści padušku pamiž kaleniami dla padtrymańnia pravilnaha stanovišča chrybta.

Jašče adzin minus — tak zvanyja «marščyny snu». Jany ŭźnikajuć praz toje, što tvar hadzinami pryciskajecca da paduški, i adroźnivajucca ad mimičnych marščyn. Pavodle śpiecyjalistaŭ, takija marščyny nielha prybrać botaksam, bo ich pryčyna nie ŭ skaračeńni myšcaŭ.

Dermalnyja filery mohuć časova ich zhładzić, ale sapraŭdnaj prafiłaktykaj ličacca son na śpinie abo vykarystańnie śpiecyjalnaj paduški. Kali ž źmianić zvykłuju pozu nie ŭdajecca, šaŭkovaja abo atłasnaja navałačka moža krychu zapavolić utvareńnie takich zmorščkaŭ.

Son na levym baku

Kali vybirać pamiž levym i pravym, to ŭ bolšaści vypadkaŭ śpiecyjalisty rajać levy bok. Heta źviazana z anatomijaj čałavieka.

Kali čałaviek lažyć na levym baku, stravavod raźmiaščajecca vyšej za straŭnik. Dziakujučy sile ciažaru straŭnikavaja kisłata lahčej viartajecca nazad u straŭnik, a nie padymajecca ŭ stravavod i horła. Heta moža značna pamienšyć piakotku i inšyja simptomy kisłotnaha refluksu.

Akramia taho, u hetym stanoviščy straŭnik aparažniajecca efiektyŭniej. Dziakujučy svajoj naturalnaj formie ježa i stravavalnyja soki lahčej pieramiaščajucca da vychadu sa straŭnika — pryvarotnika (piłorusa), a nie zatrymlivajucca kala ŭvachodu ŭ stravavod. Tamu ludzi, jakija pozna viačerajuć abo majuć zapavolenaje stravavańnie, paśla snu na levym baku niaredka adznačajuć mienšy dyskamfort.

Vybirać levy bok padčas snu miedycynskija arhanizacyi va ŭsim śviecie rekamiendujuć ciažarnym žančynam, asabliva ŭ druhim i trecim trymiestrach. Sprava ŭ tym, što pa pravaj častcy chrybta prachodzić nižniaja połaja viena — vialiki sasud, jaki viartaje kroŭ ad nižniaj pałovy cieła da serca. Pa miery rostu matki jana moža pryciskać hetuju vienu, kali žančyna lažyć na śpinie abo na pravym baku.

Son na levym baku dazvalaje paźbiehnuć takoha cisku. U vyniku lepšaje viartańnie kryvi da serca, uzmacniajecca praciakańnie kryvi praz płacentu, a płod atrymlivaje bolš kisłarodu i pažyŭnych rečyvaŭ. Kali ž ciažarnaja pračnułasia ŭ inšym stanoviščy, turbavacca nie varta — dastatkova prosta znoŭ paviarnucca na levy bok. Utrymać takuju pozu padčas snu moža dapamahčy paduška, pakładzienaja pamiž kaleniami.

Kali lepš spać na pravym baku

Adnak son na levym baku pasuje nie ŭsim. Ludzi z sardečnaj niedastatkovaściu niaredka adznačajuć, što ŭ takim stanoviščy im stanovicca ciažej dychać. Heta źviazana z tym, što serca raźmieščana krychu źleva ad centra hrudnoj kletki.

Kali čałaviek lažyć na levym baku, źmianiajecca nahruzka na serca i asablivaści jaho napaŭnieńnia kryvioj, što moža ŭzmacniać dychavicu. Tamu mnohija pacyjenty intuityŭna addajuć pieravahu snu na pravym baku.

Jaki bok usio ž vybrać?

Jak pakazvajuć daśledavańni, i levy, i pravy bok majuć svaje pieravahi. Tamu hałoŭnaje — padabrać pozu, jakaja budzie najbolš kamfortnaj mienavita dla vas i adpaviadaje vašamu stanu zdaroŭja.

Poza, u jakoj vy zasynajecie, nie abaviazkova supadaje z toj, u jakoj vy zastajaciesia. Bolšaść ludziej na praciahu nočy pieravaročvajucca z boku na bok i časam varočajucca na śpinu. Nie varta imknucca lubym koštam usiu noč spać u adnoj pozie.

Lepš padbać pra toje, kab spać na baku było zručna. U hetym dapamohuć pravilna padabranyja paduška i matrac, a taksama paduška pamiž kaleniami abo paduška dla ŭsiaho cieła, kali vy časta pieravaročvajeciesia na śpinu.

Urešcie najlepšaja poza dla snu — taja, jakaja dazvalaje dobra vyspacca i pračnucca biez bolu.

• 1
• 0
• 0
• 0
• 0
• 0
• 0
• 0