Prapahandysty nastojvajuć, što Šejman raskazaŭ pra Łukašenku čystuju praŭdu — prosta ŭsio pierabłytaŭ
Łukašenka nasamreč vystupaŭ pierad rabočymi. Praŭda, nie pierad strajkamaŭcami i nie ŭ 1995.
Na dziaržaŭnym telebačańni pakazali manałoh eks-sakratara Rady biaśpieki Viktara Šejmana, jaki raskazaŭ nievierahodnuju historyju z 1990-ch pra Alaksandra Łukašenku. Šejman śćviardžaŭ, što ŭ 1995 hodzie pa daručeńni kiraŭnika dziaržavy sabraŭ u kancertnaj zali «Minsk» 800 čałaviek, kiraŭnictva strajkavych kamitetaŭ z usioj respubliki. Tyja, maŭlaŭ, spačatku aśvistali Łukašenku, a ŭ kancy sustrečy prahałasavali, i 80% prysutnych rašuča padtrymali jaho.
Były deputat Viarchoŭnaha savieta Siarhiej Navumčyk zajaviŭ u kamientary «Našaj Nivie», što raspovied Šejmana — poŭnaja achinieja, bo Łukašenka nie sustrakaŭsia sa strajkamaŭcami.
Paśla hetaha prapahandysty vystavili svoj dokaz — videa z vystupu Alaksandra Łukašenki pierad «pradstaŭnikami pracoŭnych kalektyvaŭ». Jany pryznali, što sustreča adbyłasia ŭ 1996 hodzie, a nie ŭ 1995 hodzie, adnak zapeŭnili, što ŭsio astatniaje skazanaje Šejmanam — praŭda.
Što ž možna ŭbačyć na apublikavanym videa? Tak, heta realny vystup Alaksandra Łukašenki 26 lutaha 1996 hoda.
Pobač ź im u prezidyumie siadzić tahačasny staršynia aficyjnych prafsajuzaŭ Uładzimir Hančaryk i vysokapastaŭlenyja čynoŭniki. U pieršych šerahach šmat słuchačoŭ u kaściumach i halštukach.
A voś strajkamaŭcaŭ nie vidać. Siarhiej Navumčyk adznačaje, što nie bačyć na videa znajomyja tvary lidaraŭ niezaležnych prafsajuzaŭ: «Heta adnaznačna nie strajkam». Jon miarkuje, što na sustrečy byŭ aktyŭ aficyjnych prafsajuzaŭ.
Pačatku sustrečy na videa niama, tamu acanić, ci chtości kamuści śviścieŭ, niemahčyma.
U kancy vystupleńnia Łukašenka raskazaŭ pa punktach pra svaje bližejšyja płany, paśla čaho premjer-ministr Michaił Čyhir zaklikaŭ padziakavać kiraŭniku dziaržavy. Ludzi paapładziravali i paciahnulisia na vychad. Havorki pra niejkuju rezalucyju i hałasavańnie 80% prysutnych za jaje niama.
Pra padobnuju sustreču, jakaja adbyłasia ŭ Navapołacku 22 lutaha 1996 hoda — za čatyry dni da minskaj, — padrabiazna pisała hazieta «Svaboda». Zaprašeńni na jaje byli raźmierkavanyja zahadzia pamiž nadziejnymi i pravieranymi asobami.
Da zabastoŭščykaŭ Łukašenka vyjšaŭ tolki ŭ 2020-m hodzie, kali pryjechaŭ na MZKC. Što jon pačuŭ? «Sychodź», žorstkija maty i vykryk «Aficer? Zastrelsia!»
«My dajom Štatam toje, što jany chočuć». Rasijski kanał apublikavaŭ videa, jakoje nazyvajuć zapisam Ryžankova schavanaj kamieraj u mašynie14
Kamientary
a čamu pieravybary pryznačyli nie 26 lutaha?