Duraŭ: Rasijskija čynoŭniki pierabłytali, chto kaho moža zabanić u internecie
Zasnavalnik Telegram Pavieł Duraŭ adreahavaŭ na rašeńnie rasijskich uładaŭ unieści jaho ŭ śpis «ekstremistaŭ i terarystaŭ». U svaim telehram-kanale jon zajaviŭ, što pryčynaj pieraśledu stała jaho admova ŭdzielničać u masavym sačeńni za karystalnikami i ŭ cenzury kantentu.
«Pavodle rasijskaha zakanadaŭstva, mnie zabaroniena publikavać infarmacyju ŭ internecie. Rasijskija čynoŭniki pierabłytali, chto kaho moža zabanić u internecie», — napisaŭ Duraŭ.
Pavodle rasijskich zakonaŭ, asobam, uklučanym u pieralik «ekstremistaŭ i terarystaŭ», zabaraniajecca, u tym liku, publikavać materyjały ŭ internecie i ŭzajemadziejničać sa srodkami masavaj infarmacyi.
Akramia taho, pradprymalnik, jaki ciapier žyvie ŭ Abjadnanych Arabskich Emiratach, apublikavaŭ ilustracyju, na jakoj jon sam paznačany jak «teraryst», a pradstaŭniki ruchu «Taliban», ź jakimi paciskaje ruku kiraŭnik MZS Rasii Siarhiej Łaŭroŭ, nazvanyja «pavažanymi partniorami».
Napiaredadni FSB paviedamiła, što vystaviła Duravu abvinavačańnie ŭ sadziejničańni terarystyčnaj dziejnaści. Paśla hetaha Raśfinmanitorynh uklučyŭ jaho ŭ śpis «ekstremistaŭ i terarystaŭ». Taki status praduhledžvaje zamarožvańnie bankaŭskich rachunkaŭ, surjoznyja abmiežavańni na finansavyja apieracyi, a taksama inšyja pravavyja nastupstvy, u tym liku zabaronu na internet-aktyŭnaść.
Pavodle viersii FSB, administracyja Telegram admaŭlałasia vydalać kanały, čaty i boty, praź jakija, jak śćviardžajuć rasijskija śpiecsłužby, ukrainskija śpiecsłužby, a taksama arhanizacyi, pryznanyja ŭ Rasii terarystyčnymi i ekstremisckimi, arhanizoŭvali terakty, kibierašukanstva i inšyja złačynstvy. U pryvatnaści, śćviardžajecca, što praz čat-bot znajomstvaŭ «Dajvinčik/Leo» nibyta vierbavali maładych rasijan dla ŭdziełu ŭ dyviersijnaj dziejnaści.
Rasijskija ŭłady abviaścili Durava ŭ mižnarodny vyšuk. Pavodle paviedamleńniaŭ rasijskich dziaržaŭnych orhanaŭ, jamu pahražaje pažyćciovaje pazbaŭleńnie voli.
Pres-sakratar Kramla Dźmitryj Piaskoŭ niadaŭna zajaŭlaŭ, što rasijskija ŭłady praciahvajuć padtrymlivać kantakty z kiraŭnictvam Telegram adnosna adnaŭleńnia supracoŭnictva, adnak, pavodle jaho słoŭ, istotnaha prahresu pakul niama. Raniej dyrektar FSB Alaksandr Bortnikaŭ śćviardžaŭ, što papiarednija pieramovy z Duravym nie prynieśli vynikaŭ, i abvinavačvaŭ jaho ŭ tym, što palityka Telegram nibyta spryjaje raspaŭsiudžvańniu teraryzmu, dyviersij i inšych złačynstvaŭ. Administracyja Telegram hetyja abvinavačańni nie pryznavała.
Kamientary