Na Lublinščynie ŭ Polščy ŭpaŭ nieviadomy abjekt: na poli ŭtvaryŭsia 10‑mietrovy kratar
Nočču ŭ Lublinskim vajavodstvie ŭ poli byŭ znojdzieny kratar dyjamietram 10 mietraŭ, miascovyja žychary ŭnačy čuli mahutny vybuch, ułady ŭklučali sireny. Na miesca zdareńnia byli nakiravany pažarnyja, palicyja i vajskoŭcy. Pakul ułady nie dajuć nijakich padrabiaznaściej.
U noč na 30 lipienia na poli kala vioski Tarnava-Kałonija ŭ Lublinskim vajavodstvie Polščy, pryblizna za 50 km ad Lublina, upaŭ nieviadomy latalny abjekt. Na miescy padzieńnia vyjaŭleny kratar dyjamietram kala 10 mietraŭ i abłomki.
Jak pišuć polskija miedyja, kala 3:40 polskija vajskoŭcy zafiksavali nieapaznanuju cel u pavietranaj prastory. Na pierachop nakiravali źniščalnik F-16, ale praz 6 chvilin abjekt źnik z radaraŭ. Miesca padzieńnia dapamoh vyznačyć viertalot.
Žychary navakolnych nasielenych punktaŭ paviedamlajuć pra mahutny vybuch, ad jakoha dryželi šyby ŭ damach. U Lublinie i Krasnastavie pierad 4‑j hadzinaj ranicy ŭklučali sireny pavietranaj tryvohi.
Miesca zdareńnia znachodzicca pryblizna za 1,5—2 km ad bližejšych žyłych budynkaŭ. Pavodle papiarednich danych palicyi, paciarpiełych i pahrozy dla žyćcia miascovych žycharoŭ niama.
Miesca zdareńnia ačapili. Tam pracujuć palicyja, kontrterarystyčnyja słužby, vajskoŭcy, pažarnyja, a taksama pradstaŭniki śpiecsłužbaŭ i prakuratura.
Zajavy pra charaktar abjekta pakul adsutničajuć, śpiecsłužby vyśviatlajuć abstaviny zdareńnia.
Usiu noč polskaja avijacyja znachodziłasia ŭ stanie padvyšanaj hatoŭnaści praz masiravanuju rasijskuju ataku na terytoryju Ukrainy.
Ukrainskija manitorynhavyja kanały infarmavali pra mahčymy zalot rasijskich rakiet u pavietranuju prastoru Polščy, adnak polski bok heta nie paćviardžaŭ.
Ciapier čytajuć
«Z rasijan-naviednikaŭ pracentaŭ 70 akazvalisia vatnikami». Eks-hid z muzieja VAV, jakoha zatrymlivali jaho ž ekskursanty, ciapier papularny ŭ Varšavie — pahutaryli ź im14
Kamientary