U jeŭrakubkavym futbolnym matčy hoł zabiŭ biazruki futbalist. Sam jon invalidam siabie nie ličyć

Kłub Maryusa Linda «Runavik» z Farerskich astravoŭ, hulajučy ŭ matčy ŭ adkaz pieramoh słavienski «Kapier» ź likam 3:1. U pieršaj sustrečy farerskaja kamanda sastupiła 0:2, ale zmahła adyhracca i ŭ vyniku prajści dalej paśla sieryi pienalci. A druhi hoł «Runavika» zabiŭ mienavita Lind.

Takim čynam, jon staŭ druhim u historyi futbalistam biez adnoj ruki, jakomu ŭdałosia zabić u jeŭrakubkach. Da hetaha amal 63 hady adzinym takim hulcom ličyŭsia paŭnočnairłandziec Džymi Chejts, jaki zabivaŭ za kłub «Dandałk» u Kubku jeŭrapiejskich čempijonaŭ.

Dla «Runavika» hety pośpiech taksama staŭ histaryčnym: kłub upieršyniu vyjšaŭ u treci raŭnd kvalifikacyi Lihi kanfierencyj. Nastupnym supiernikam farerskaj kamandy budzie šviejcarski «Łuhana».

Pavialičyć

Lind źjaŭlajecca važnym futbalistam «Runavika». U čempijanacie Farerskich astravoŭ jon u 16 matčach zabiŭ čatyry miačy i zrabiŭ čatyry halavyja pieradačy. Čakajecca, što ŭ nastupnych matčach jon taksama budzie vychodzić u asnoŭnym składzie.

Futbolny šlach Linda pačaŭsia ŭ Danii. Jon zajmaŭsia ŭ akademii «Viestšełana» z horada Słahiełse, dzie trenieraŭ biantežyła jahonaja fizičnaja asablivaść, niahledziačy na dobruju chutkaść i techniku. Kali futbalist staŭ nabližacca da prafiesijnaha ŭzroŭniu, ź im raźvitalisia, paabiacaŭšy dapamahčy z pracaŭładkavańniem.

Paźniej Lind dałučyŭsia da kłuba «Słahiełse» i prabiŭsia ŭ asnoŭnuju kamandu. Jon navat naniaŭ śpiecyjalnaha treniera, kab palepšyć bałans i siłu ciahlic, a taksama znajšoŭ trenirovačny pratez, jaki dazvalaŭ paŭnavartasna zajmacca siłavoj padrychtoŭkaj. Adnak paśla vychadu «Słahiełse» ŭ vyšejšy dyvizijon kłub nie staŭ praciahvać ź im kantrakt.

U 2022 hodzie Lind pierajechaŭ na Farerskija astravy. Spačatku jon vystupaŭ za kłub «Arhir», zatym za «B-36 Torschaŭn», a ŭ studzieni 2026 hoda padpisaŭ kantrakt z «Runavikam».

Sam futbalist nie ličyć adsutnaść pravaha pieradplečča invalidnaściu i nie choča, kab jaho ŭsprymali jak hulca, jakomu robiać vyklučeńnie sa spahady.

Pavialičyć

Jon padkreślivaŭ, što heta prosta fizičnaja asablivaść i jana matyvuje jaho pracavać jašče bolš — jak na futbolnym poli, tak i pa-za im. Pavodle jaho słoŭ, jon nikoli nie ličyŭ siabie horšym za futbalistaŭ ź dźviuma rukami. Kali jon sastupaje kamuści, to tolki praź niedastatkovuju techniku, chutkaść ci inšyja spartyŭnyja jakaści, a nie praz adsutnaść ruki.

U intervju ŭ 2025 hodzie Lind taksama kazaŭ, što maryć hulać suprać najmacniejšych kamandaŭ. Pry hetym jon nie choča atrymlivać miesca ŭ kamandzie tolki dziakujučy svajoj asablivaści. Jon ličyć siabie pierš za ŭsio spartsmienam i ŭpeŭnieny, što miesca ŭ składzie treba zasłužyć pastajannymi treniroŭkami i pracaj nad saboj.

• 9
• 0
• 0
• 0
• 0
• 0
• 0
• 1