Chaski ź Minska staŭ tvaram novaj kalekcyi Mark Formelle. Za heta jon atrymaŭ adnu futbołku
Na novaj futbołcy biełaruskaha brenda Mark Formelle — surjozny chaski ź vialikim kavałkam picy ŭ zubach. Pobač ź im — žartaŭlivyja podpisy: «ciarplivy kampańjon», «družalubny puchnacik», «miakkaje serca» i «ščaślivy chvost». Hierojem prynta staŭ minski chaski pa mianušcy Ryk.
Ciapier Ryku ŭžo dziesiać z pałovaj hadoŭ. Jon žyvie ŭ Minsku razam sa svajoj haspadyniaj Volhaj Šydłoŭskaj i kotkaj Łunaj. Volha viadzie pra ich asobny błoh, dzie sabrała dziasiatki pryhožych, śmiešnych i časam amal kazačnych fotazdymkaŭ svaich hadavancaŭ.
Fota adpravili prosta na konkurs, futbołki nichto nie abiacaŭ
Kala dvuch hadoŭ tamu Volha adpraviła fota na konkurs chatnich žyvioł, jaki ładziŭ Mark Formelle. U sacsietkach kampanii pieryjadyčna pravodziacca roznyja tvorčyja konkursy — siarod dziciačych malunkaŭ, modnych vobrazaŭ abo śmiešnych zdymkaŭ hadavancaŭ.
Prykładna praz hod Ryk staŭ adnym ź pieramožcaŭ. Za heta haspadynia atrymała siertyfikat na 100 rubloŭ. Nijakaha ŭdziełu ŭ budučaj kalekcyi pieramožcam tady nie abiacali.
Zdymak, jaki ŭ vyniku trapiŭ na futbołku, zrabili, kali Ryku było kala siami hadoŭ. Na im chaski trymaje ŭ zubach vialiki kavałak picy i hladzić u kamieru z takim vyhladam, byccam dzialicca łasunkam nie źbirajecca.
Historyja atrymała praciah tolki ŭ krasaviku 2026 hoda. Z Volhaj źviazałasia pradstaŭnica Mark Formelle i paviedamiła, što fatahrafija Ryka nastolki spadabałasia dyzajnieram, što stała adnoj z hałoŭnych krynic natchnieńnia dla kancepcyi letniaj kalekcyi.
«Nam nie abiacali ŭdziełu ŭ kalekcyi za pieramohu ŭ konkursie. Prosta paźniej asobna napisali, što fota natchniła dyzajnieraŭ i, kali ja nie suprać, jany jaho vykarystajuć», — raskazvaje Volha ŭ sacsiektach.
Kampanija prapanavała aformić damovu, kab zamacavać prava na vykarystańnie vyjavy. Asobnaha hanararu za źjaŭleńnie Ryka na vopratcy haspadary nie atrymali, zatoje brend padaryŭ im futbołku.
«Ja tak rada za Rykulu. Paradujciesia z nami za hetaha staryčka», — napisała Volha, pakazvajučy navinku padpisčykam.
U vyniku Ryk staŭ hałoŭnym hierojem mužčynskaj zialonaj futbołki aviersajz z efiektam nieraŭnamiernaha afarboŭvańnia. Nad jaho partretam raźmiaścili anhlijskuju frazu: «Are you hungry? Pizza time» — «Ty hałodny? Čas picy».
Sam Mark Formelle apisvaje madel jak futbołku «z humaram i charaktaram», jakaja musić dadavać vobrazu hullivaści. Na biełaruskim sajcie brenda jana kaštuje kala 45 rubloŭ. Madel taksama źjaviłasia na sajtach kampanii dla pakupnikoŭ u Rasii, Kazachstanie i Uźbiekistanie.
Čempijon, padarožnik i madel
Zrešty, dla Ryka heta nie pieršaje publičnaje pryznańnie. Raniej jon źjaŭlaŭsia na telebačańni i ŭdzielničaŭ u fotasiesijach. U jaho jość i ŭłasny jutub-kanał, dzie zachavalisia roliki z vystaŭ i inšych padziej.
U maładości Ryk zrabiŭ uražvajučuju vystavačnuju karjeru. Jon udzielničaŭ u biełaruskich i mižnarodnych kinałahičnych vystavach, pieramahaŭ i zajmaŭ pryzavyja miescy ŭ Biełarusi, Ukrainie, Rasii, Estonii i Łatvii.
Siarod jaho tytułaŭ — dvojčy supier-hrand-čempijon Biełarusi ŭ 2018‑2019 hadach, čempijon Łatvii i čempijon Bałtyi. Na mižnarodnaj vystavie sabak u Minsku ŭ 2019 hodzie Ryk zaniaŭ pieršaje miesca ŭ svajoj hrupie.
Ale žyćcio Ryka nie abmiažoŭvałasia vystavačnymi placoŭkami. Jon šmat padarožničaŭ razam z haspadyniaj i paśpieŭ pabyvać jak minimum u dzieviaci krainach. U jahonym błohu — pajezdki, prahułki, siezonnyja fotasiesii, dačnaje žyćcio i budni razam z kotkaj Łunaj.
Za pryhožymi kadrami staić Volha Šydłoŭskaja. Jana pracuje ŭ internet-markietynhu: zajmajecca SMM, SEO, kantekstnaj i tarhietavanaj rekłamaj, kantentam i kiravańniem prajektami, pradziusuje zdymki dla kampanij. Ale ŭ błohu jana najpierš čałaviek, jaki vielmi lubić svaich hadavancaŭ.
Ryk tam paŭstaje jak sapraŭdny člen siamji — hanarlivy čempijon, vandroŭnik u modnych akularach dy prosta ŭžo niemałady sabaka, jakomu paščaściła adnojčy ŭchapić kavałak picy i praz try hady trapić na futbołki.
Ciapier čytajuć
«Strelba kali i strelić, to naŭrad ci kulamiotnaj čarhoj». Maksim Znak acaniŭ realnaść pahroz biełaruskaj prapahandy pazbavić hramadzianstva palitemihrantaŭ88
Kamientary