U Biełarusi pradajuć unikalny aŭtamabil. Pahladzieć jaho možna tolki za hrošy
Na prodaž u Biełarusi vystavili redki Mercedes-Benz G63 AMG u limitavanaj viersii Brabus 900 Rocket. Takich było tolki 25. Jak paviedamlaje av.by, navat kab prosta pahladzieć na aŭto, daviadziecca zapłacić. Cana ekskluzivu — $230 tysiač.
Pieršy Brabus 900 na bazie «Hielika» debiutavaŭ u vieraśni 2017 hoda, jon byŭ pabudavany jašče na bazie «Hielika» papiaredniaha pakaleńnia. Pad jaho kapot ustalavali 6,3‑litrovy V12 z maksimalnaj addačaj u 900 k. s. i 1500 Nm, ale dziela zachavanaści resursu tranśmisii hraničny momant abmiežavali elektronikaj na adznacy 1200 Nm.
Da 100 km/h minuły Brabus 900 razhaniajecca za 3,9 s, maksimalnaja chutkaść — 270 km/h. Było vypuščana ŭsiaho 10 takich ekzemplaraŭ koštam 666 000 jeŭra kožny.
A pazadarožniki ŭžo na bazie Mercedes-Benz G63 AMG novaha pakaleńnia atelje Brabus pačało źbirać u 2021 hodzie. Abjom ruchavika źmienšyli da 4,5 litra, pierahledzieli «načyńnie», vykanali šerah inšych dapracovak. Addača V8 składaje tyja ž 900 k. s., a krucilny momant źnizili da 1050 Nm, jak i čas razhonu da «sotni» — 3,7 siekundy. U šasi — alternatyŭnyja elektronna kiravanyja amartyzatary, jakija źmianšajuć darožny praśviet na 45 mm, i bolš mahutnyja tarmazy.
Aeradynamičny abvies Rocket Edition vykanany z karbonu i nie tolki palapšaje aeradynamiku, ale i nadaje aŭtamabilu ŭładny vyhlad. Pašyranyja kołavyja arki dadajuć brutalnaści, a firmovyja kołavyja dyski Brabus Monoblock Z Platinum Edition dyjamietram 24 cali padkreślivajuć spartyŭny charaktar.
Tyraž Mercedes-Benz G63 AMG Brabus 900 Rocket abmiežavany ŭsiaho 25 ekzemplarami, adzin ź jakich źjaviŭsia i ŭ katałohu av.by.
U Brabus kožnamu ź ich całkam kastamizavali interjer: u hetaha aŭtamabila jon azdobleny skuraj Nappa ŭ aranžavym i čornym adcieńniach.
Miarkujučy pa infarmacyi, ukazanaj u abjavie, poŭnapryvadny pazadarožnik z aŭdyjosistemaj Burmester 3D Surround, razietkaj na 12 V i šmatlikimi opcyjami, a jaho prabieh składaje 48 000 km.
Uładalnik choča atrymać za jaho 230 tysiač dołaraŭ u ekvivalencie.
Adnak prosta pryjechać i pahladzieć ekskluziŭny «Hielendvahien» nie atrymajecca: pradaviec hatovy pradastavić mašynu dla ahladu tolki za peŭnuju płatu. Kab vyśvietlić, za jakuju, žurnalisty pasprabavali źviazacca z uładalnikam, ale pakul jana nie mieła pośpiechu.
Kamientary