Sieviaryniec: Taja linija, jakuju viadzie Babaryka — heta nie majo. A z Kaleśnikavaj moža vyraści kłasny biełaruski palityk

Jak zhadaŭ u intervju «Biełsatu» Pavieł Sieviaryniec, pierad pres-kanfierencyjaj, što adbyłasia na druhi dzień paśla vyzvaleńnia hrupy palitviaźniaŭ, jon mieŭ mahčymaść pahavaryć ź Viktaram Babarykam i Maryjaj Kaleśnikavaj. I pieršaje, što Pavieł paraiŭ svaim surazmoŭcam, — vystupić publična pa-biełarusku.

«My siadzieli ŭ adnym pakoi i razmaŭlali. Ja prapanavaŭ vystupić pa-biełarusku. Moža być, sapraŭdy my nie myślim pa-biełarusku, bolš myślim pa-rusku. Ale, dumaju, što hetaja parada zastajecca ŭsio roŭna. Dobra padrychtavacca i vystupić pa-biełarusku, vystupić z hledzišča nacyjanalnych intaresaŭ — heta aznačaje zaraz być adekvatnym biełaruskim palitykam».

Pa słovach Sieviarynca, ź Viktaram Babarykam jon nie byŭ asabista znajomy da 2020 hoda, tolki viedaŭ, chto jon. Niahledziačy na čałaviečuju pavahu da stojkaści eks-bankira ŭ turemnych umovach, Pavieł dystancyjujecca ad jaho palityčnych pohladaŭ:

«Jak da čałavieka ja da jaho staŭlusia narmalova, tym bolš jon pieranios takija ciažkija ŭmovy. Ale ŭ palityčnym płanie taja linija, jakuju jon vioŭ tady (u 2020‑m — NN) i jakuju jon viadzie zaraz — heta nie majo. I dumaju, heta nie toje, što patrebna Biełarusi».

Z Maryjaj Kaleśnikavaj, pavodle Sieviarynca, situacyja inšaja:

«Jana maje fajnuju maładafrontaŭskuju historyju. U junactvie jana ŭdzielničała ŭ maładafrontaŭskich akcyjach i navat była adnoj ź pieramožcaŭ lidarskich kursaŭ «Dydžejaŭ Adradžeńnia». U jaje, ja viedaju, vielmi dobraja biełaruskaja mova. Ja raiŭ joj pry sustrečy — i zaraz taksama vielmi raju — razmaŭlać pa-biełarusku, prasiakacca biełaruskimi nacyjanalnymi intaresami. Ź jaje moža vyraści kłasnaja biełaruskaja žančyna-palityk. Heta prosta była b zorka».

Viartajučysia da svajoj prapanovy vystupić na pres-kanfierencyi na biełaruskaj movie, Sieviaryniec zhadaŭ, što niekalki čałaviek «skazali, što, moža być, nie treba i hetak dalej».

«Mnie ciažka skazać čamu, tamu što ludzi tolki što vyjšli z turmy. Mahčyma, heta byŭ vynik prosta pieražytaha. Hetyja ludzi aktyŭna pryjšli ŭ palityku ŭ 2020 hodzie», — razvažaje Sieviaryniec.

Sam ža Sieviaryniec padkreślivaje: jaho ŭłasny dośvied palityčnaj baraćby pačynajecca z kanca 1990-ch, i jon «pryblizna ŭjaŭlaje, što moža być, kali va Ukrainie, jakaja vajuje z Rasijaj, publična vykazvacca ad imia biełarusaŭ pa-rasijsku». «Heta prosta palityčnaja pamyłka. Takoha nie treba rabić».

Pavialičyć

«Nu, nie ŭkładzieš svaje dumki ŭ hałovy. Jak jano atrymałasia — tak atrymałasia», — sa skruchaj zaŭvažaje palityk i dadaje, što pa vynikach pres-kanfierencyi «biełarusy zrabili svaje vysnovy, ale svaje vysnovy treba rabić i palitykam, i tym, chto havoryć ad imia biełarusaŭ».

«Paśla 2020 hoda, paśla hetych hadoŭ vajny, stała absalutna vidavočna: biełaruskaja mova — heta taksama častka palityčnaj pazicyi. Bieź biełaruskaj movy nie moža być biełaruskaj palityčnaj pazicyi. I navat jana nie moža być takim, viedajecie, falkłornym elemientam. «Tam dzieści ja skažu paru fraz». Nie. Heta pavinna być sutnaściu, heta pavinna być sensam», — davodzić Sieviaryniec.

• 42
• 5
• 2
• 4
• 0
• 0
• 0
• 3