Севярынец: Тая лінія, якую вядзе Бабарыка — гэта не маё. А з Калеснікавай можа вырасці класны беларускі палітык
Павел Севярынец прапаноўваў Бабарыку і Калеснікавай выступіць на прэс-канфэрэнцыі ва Украіне па-беларуску, але яны не прыслухаліся.
Як згадаў у інтэрв'ю «Белсату» Павел Севярынец, перад прэс-канферэнцыяй, што адбылася на другі дзень пасля вызвалення групы палітвязняў, ён меў магчымасць пагаварыць з Віктарам Бабарыкам і Марыяй Калеснікавай. І першае, што Павел параіў сваім суразмоўцам, — выступіць публічна па-беларуску.
«Мы сядзелі ў адным пакоі і размаўлялі. Я прапанаваў выступіць па-беларуску. Можа быць, сапраўды мы не мыслім па-беларуску, больш мыслім па-руску. Але, думаю, што гэтая парада застаецца ўсё роўна. Добра падрыхтавацца і выступіць па-беларуску, выступіць з гледзішча нацыянальных інтарэсаў — гэта азначае зараз быць адэкватным беларускім палітыкам».
Па словах Севярынца, з Віктарам Бабарыкам ён не быў асабіста знаёмы да 2020 года, толькі ведаў, хто ён. Нягледзячы на чалавечую павагу да стойкасці экс-банкіра ў турэмных умовах, Павел дыстанцыюецца ад яго палітычных поглядаў:
«Як да чалавека я да яго стаўлюся нармалёва, тым больш ён перанёс такія цяжкія ўмовы. Але ў палітычным плане тая лінія, якую ён вёў тады (у 2020‑м — НН) і якую ён вядзе зараз — гэта не маё. І думаю, гэта не тое, што патрэбна Беларусі».
З Марыяй Калеснікавай, паводле Севярынца, сітуацыя іншая:
«Яна мае файную маладафронтаўскую гісторыю. У юнацтве яна ўдзельнічала ў маладафронтаўскіх акцыях і нават была адной з пераможцаў лідарскіх курсаў «Дыджэяў Адраджэння». У яе, я ведаю, вельмі добрая беларуская мова. Я раіў ёй пры сустрэчы — і зараз таксама вельмі раю — размаўляць па-беларуску, прасякацца беларускімі нацыянальнымі інтарэсамі. З яе можа вырасці класная беларуская жанчына-палітык. Гэта проста была б зорка».
Вяртаючыся да сваёй прапановы выступіць на прэс-канферэнцыі на беларускай мове, Севярынец згадаў, што некалькі чалавек «сказалі, што, можа быць, не трэба і гэтак далей».
«Мне цяжка сказаць чаму, таму што людзі толькі што выйшлі з турмы. Магчыма, гэта быў вынік проста перажытага. Гэтыя людзі актыўна прыйшлі ў палітыку ў 2020 годзе», — разважае Севярынец.
Сам жа Севярынец падкрэслівае: яго ўласны досвед палітычнай барацьбы пачынаецца з канца 1990-х, і ён «прыблізна ўяўляе, што можа быць, калі ва Украіне, якая ваюе з Расіяй, публічна выказвацца ад імя беларусаў па-расійску». «Гэта проста палітычная памылка. Такога не трэба рабіць».
«Ну, не ўкладзеш свае думкі ў галовы. Як яно атрымалася — так атрымалася», — са скрухай заўважае палітык і дадае, што па выніках прэс-канферэнцыі «беларусы зрабілі свае высновы, але свае высновы трэба рабіць і палітыкам, і тым, хто гаворыць ад імя беларусаў».
«Пасля 2020 года, пасля гэтых гадоў вайны, стала абсалютна відавочна: беларуская мова — гэта таксама частка палітычнай пазіцыі. Без беларускай мовы не можа быць беларускай палітычнай пазіцыі. І нават яна не можа быць такім, ведаеце, фальклорным элементам. «Там дзесьці я скажу пару фраз». Не. Гэта павінна быць сутнасцю, гэта павінна быць сэнсам», — даводзіць Севярынец.
Што кажуць Мацкевіч, Карпаў, Чарняўская і іншыя пра прэс-канферэнцыю Бабарыкі і Калеснікавай
«Кучаравенькая, з флейтай»: Севярынец расказаў, пра ўдзел Марыі Калеснікавай у Маладым фронце
«Гэты хлопец, відаць, падасланы — у яго боты начышчаныя»: Севярынец расказаў гісторыю з’яўлення Дашкевіча ў «Маладым фронце»
Каментары
Бабарыканцы - гэта рух для тожебелорусов ці русских со знаком качества.