HBO vypłacić udavie biełarusa Vasila Ihnacienki 10 tysiač jeŭra za sieryjał «Čarnobyl»
Kasacyjny hramadzianski sud u składzie Viarchoŭnaha Suda Ukrainy vynies kančatkovy vierdykt u spravie Ludmiły Ihnacienka, udavy zahinułaha likvidatara avaryi na ČAES Vasila Ihnacienki, suprać telekampanii HBO. Sud pryznaŭ fakt parušeńnia pravoŭ na vykarystańnie imia i prysudziŭ paciarpiełaj 500 tysiač hryŭniaŭ (kala 10 tysiač jeŭra) maralnaj kampiensacyi. Heta pastanova źjaŭlajecca kančatkovaj.
Ludmiła Ihnacienka źviarnułasia ŭ sud jašče ŭ 2020 hodzie, śćviardžajučy, što stvaralniki suśvietna viadomaha sieryjała «Čarnobyl» bieź jaje zhody vykarystali jaje imia i imia jaje pamierłaha muža jak imiony piersanažaŭ. Pavodle słoŭ žančyny, paśla vychadu stužki jana sutyknułasia ź vielizarnym ciskam, u tym liku z boku ŚMI, praz što była vymušana navat źmianić miesca žycharstva.
Pieršapačatkova jana patrabavała 2,5 miljona hryŭniaŭ (kala 50 tysiač jeŭra) kampiensacyi i vydaleńnia scen ź jaje imiem ź sieryjała.
Viarchoŭny Sud paćvierdziŭ fakt parušeńnia asabistaha prava na imia, adnak admoviŭ u patrabavańni vyrazać kadry. U rašeńni suda adznačajecca: «Patrabavańnie ab abaronie prava na imia šlacham vydaleńnia asobnych scen z užo apublikavanaha i šyroka raspaŭsiudžanaha sieryjała nie źjaŭlajecca efiektyŭnym i praparcyjnym sposabam abarony. Takoje ŭmiašańnie moža pryvieści da skažeńnia cełasnaha mastackaha tvora i parušeńnia pravoŭ inšych asob».
Pradstaŭniki HBO padčas pracesu nastojvali, što vykarystańnie imionaŭ realnych likvidataraŭ tolki padkreślivała dakumientalnuju asnovu prajekta, i admaŭlali maralnuju škodu. Tym nie mienš, sud staŭ na bok udavy hieroja-pažarnaha.
Hieroj Ukrainy Vasil Ihnacienka naradziŭsia 13 sakavika 1961 hodu ŭ vioscy Śpiaryžža Brahinskaha rajona Biełarusi. U Brahinie jamu staić pomnik jak adnamu ź pieršych likvidataraŭ avaryi na ČAES.
26 krasavika 1986 hoda Ihnacienka ŭ składzie pieršaj hrupy pažarnych byŭ na čaćviortym enierhabłoku, dzie atrymaŭ śmiarotnuju dozu apramieńvańnia. Jon pamior praz dva tydni i byŭ pachavany ŭ Maskvie na Micinskich mohiłkach. Paśmiarotna Vasil Ihnacienka ŭhanaravany zvańniem Hieroj Ukrainy.
Kamientary
Dziakujučy sieryjału NVO i amierykancam spadarynie Aleksijevič dali Nobieleŭskuju premiju.