Ministerstva ŭnutranych spraŭ Nikarahua zajaviła ŭ subotu, što kraina vyzvalić dziasiatki źniavolenych. Heta adbyvajecca na fonie ŭzmacnieńnia cisku Złučanych Štataŭ na prezidenta Daniela Artehu praz tydzień paśla źviaržeńnia byłoha lidara Vieniesueły Nikałasa Madura, piša AP.
U piatnicu ambasada ZŠA ŭ Nikarahua adznačyła, što Vieniesueła zrabiła važny krok da miru, vyzvaliŭšy palityčnych źniavolenych. Razam z tym dypłamaty vykazali žal, što ŭ Nikarahua «bolš za 60 čałaviek zastajucca niespraviadliva zatrymanymi abo źnikłymi bieź viestak, siarod ich — pastary, relihijnyja dziejačy, chvoryja i ludzi stałaha vieku».
U subotu Ministerstva ŭnutranych spraŭ Nikarahua paviedamiła ŭ aficyjnaj zajavie, što «dziasiatki asob, jakija znachodzilisia ŭ Nacyjanalnaj pienitencyjarnaj sistemie, viartajucca ŭ svaje damy i siemji».
Pakul da kanca nie zrazumieła, chto mienavita byŭ vyzvaleny i na jakich umovach.
Ułady krainy pravodziać pastajannyja represii paśla masavych pratestaŭ 2018 hoda, jakija byli žorstka padaŭleny.
Režym źniavolvaŭ apanientaŭ, relihijnych lidaraŭ, žurnalistaŭ i inšych aktyvistaŭ, paśla čaho adpraŭlaŭ ich u vyhnańnie, pazbaŭlajučy sotni ludziej majomaści i nikarahuanskaha hramadzianstva.
Z 2018 hoda ŭ krainie było zakryta bolš za 5000 arhanizacyj, pieravažna relihijnych, što vymusiła tysiačy ludziej pakinuć radzimu.
Urad Nikarahua časta abvinavačvaje krytykaŭ i apanientaŭ u zmovie suprać dziaržaŭnaj ułady.
U apošnija hady aficyjny Manahua vyzvaliŭ sotni źniavolenych palityčnych apanientaŭ i aktyvistaŭ, adnak adnačasova pazbaviŭ ich hramadzianstva i vysłaŭ u inšyja krainy, u pryvatnaści ŭ ZŠA i Hvatemału. Naziralniki nazvali heta sprobaj «umyć ruki» ad apazicyi i nivieliravać mižnarodnuju krytyku ŭ halinie pravoŭ čałavieka. Mnohija z hetych nikarahuancaŭ apynulisia ŭ stanie apatrydyzmu (adsutnaści hramadzianstva).
U subotu ŭ sacyjalnaj sietcy X Biuro pa spravach Zachodniaha paŭšarja Dziarždepartamienta ZŠA znoŭ vystupiła z krytykaj u adras urada Nikarahua. «Nikarahuancy hałasavali za prezidenta ŭ 2006 hodzie, a nie za nielehitymnuju pažyćciovuju dynastyju», — havorycca ŭ paviedamleńni.
Dani Ramires-Ajerdys, vykanaŭčy sakratar nikarahuanskaj pravaabarončaj arhanizacyi CADILH, pryznaŭsia, što navina pra vyzvaleńnie vyklikała ŭ jaho nieadnaznačnyja pačućci. «Z adnaho boku, ja rady. Kožny palityčny źniavoleny ciarpić tuju ci inšuju formu katavańniaŭ. Ale ź inšaha boku, ja viedaju, što hetyja ludzi i ich siemji buduć i dalej padviarhacca pieraśledu, sačeńniu i palicejskamu kantrolu».
Ramires-Ajerdys adznačyŭ, što vyzvaleńnie źniavolenych źjaŭlajecca reakcyjaj na cisk z boku Złučanych Štataŭ.
«Unutry režymu napeŭna isnuje vialiki strach, što ZŠA mohuć całkam demantavać jaho», — padsumavaŭ jon.
Tym časam, u Vieniesuele adpuščanyja na volu jašče dzieviać palitviaźniaŭ. Kolkaść vyzvalenych palitviaźniaŭ u Vieniesuele vyrasła da 18 čałaviek, paviedamlaje ahienctva Reuters sa spasyłkaj na pravaabarončyja arhanizacyi.
Pavodle acenak pravaabarončaj arhanizacyi Foro Penal, u Vieniesuele naličvajecca 811 palityčnych źniavolenych.
U zahinułaj u Ślapiancy dziaŭčynie apaznali Janu Kastrankovu2
Kamientary