Błohierka dobra zarablała ŭ Čechii, ale źjechała ŭ Biełaruś adnym dniom — chavajecca ad ŁHBT
Ruskamoŭnaja błohierka pierabrałasia z Čechii ŭ Biełaruś i robić pra heta tyktoki. Nie ŭsie zrazumiejuć arhumienty, jakimi jana heta tłumačyć.
Błohierka pad nikam black_cherry_9 padpisała svoj akaŭnt u tyktoku słovami «Taja, jakaja pajechała… u Biełaruś». Žančyna piša ŭ šapcy profila, što zrabiła sabie taki padarunak na Novy hod — adnym dniom pierabrałasia ŭ našu krainu.
Tyktokierka amal ničoha nie raskazvaje pra siabie. Pra jaje siamju viadoma, što ŭ žančyny jość muž i dačka, i što jany razam čatyry hady žyli ŭ Čechii. Adtul u kancy śniežnia žančyna i pierajechała ŭ Biełaruś.
Da pierajezdu błohierka pracavała prybiralščycaj pa niekalki hadzin na dzień. Miarkujučy pa jaje raspoviedach, zarobki byli dastojnyja:
«Na prybirańni hatelaŭ dziaŭčaty ŭ Čechii zarablajuć bolš čym na niekatorych zavodach, i ty nie pracuješ pa 12 hadzin. Na prybirańni ja pracavała čatyry hadziny, a nie 8, 12 ci 14 hadzin».
Ale ž samaje cikavaje — arhumienty, jakimi błohierka tłumačyć rašeńnie pierajechać.
Dziaŭčyna kaža, što nie zaŭždy reč u hrašach:
«Majoj siamji [hrošaj] bolš čym chapała. U nas byli narmalnyja zarobki, u muža zarobak ličyŭsia vysokim pa Čechii — $1450-$1650, u mianie ličyŭsia siarednim. Nam chapała z hałavoj. My jeździli na novaj mašynie, apłačvali svaje žadańni, usie žadańni dački i ŭsio astatniaje.
Ale my źjechali, bo nam tam nie padabajecca hramadstva, ludzi. My vybrali dla siabie adekvatnaść. Nie zaŭždy finansy — asnoŭnaje».
U adnym ź pieršych rolikaŭ žančyna publikuje kadry ź biełaruskaj ježaj — syrkami, čyzburhieram, stravami nacyjanalnaj kuchni i navat minierałkaj. I supravadžaje heta takim kamientarom:
«Kali ahurok i pamidor pa smaku nie byccam płastyk, kali ŭ mandaryna jość pach, kali charčavańnie va ŭstanovie — kajf dla smakavych receptaraŭ, kali ŭ kramie možna znajści ŭsio i navat bolej. Heta vam nie Jeŭropa».
Adzin z kamientataraŭ paryruje błohiercy, što kali kraina moža pachvalicca ježaj, a nie čymści inšym, heta nie nadta dobra. Žančyna adkazvaje ŭ inšym roliku — i tut jana raskryvaje, što ž joj nie padabałasia ŭ češskim hramadstvie:
«Napeŭna, treba chvalicca ŁHBT-supolnaściami, narkamanijaj, jakaja prosta paŭsiul prasoŭvajecca. Pa-vašamu, treba chvalicca, jak u ES, što ŭ škołach vykładajuć homiki ci leśbi? Heta toje, što treba, tak?»
I heta tolki małaja častka taho, što zachaplaje błohierku ŭ Biełarusi. Jana zdymaje pryłaŭki ŭ kramie — maŭlaŭ, takoha vybaru niama ni ŭ adnoj krainie Jeŭrasajuza.
Asobnaja historyja — toje, jak žančyna havoryć pra stalicu Čechii. Jana žyła nie ŭ Prazie, a ŭ bolš drobnym češskim horadzie, ale, kaža, i Prahu paśpieła pabačyć:
«Voźmiem Minsk i Prahu — jaki čyściutki Minsk i jakaja abasranaja Praha».
Svaimi rolikami błohierka zdabyła sabie šmat chejtaraŭ. U adnym z apošnich videa jana pryznajecca, što na jaje profil pastajanna skardziacca, asabliva na roliki pra «prapahandu ŁHBT u ES»:
«A što ja kažu nie tak? Što ŭ škołach vykładčyki ŁHBT? Što ŭ dziaciej u ES jość peŭnyja ŭroki, dzie im raskazvajuć — maŭlaŭ, ty možaš vybrać, kim ty budzieš, chłopčykam ci dziaŭčynkaj, abo prosta «jano», ci aŭtobusam, naprykład — čamu b i nie! Dla mianie heta nie norma, ja b nie chacieła, kab majo dzicia vučyłasia tam».
«Naša Niva» — bastyjon biełaruščyny
PADTRYMAĆ
«Čamu ja pavinien dakazvać, što nie darmajed?» Pradprymalnika z Homiela pamyłkova zapisali ŭ niezaniatyja — jon daviedaŭsia tolki paśla vializnych rachunkaŭ za kamunałku16
Kamientary