U Baranavičach kaciania zakrucili ŭ słoik i vykinuli na śmietnik
Karyna ŭviečary vyjšła vykinuć śmiećcie i pačuła kala kantejniera cichi pisk — ci to dziciaci, ci to kacianiaci. U pociemkach ničoha nie ŭbačyła, ale natknułasia na trochlitrovuju banku, što stajała za śmiećciepravodam. Unutry zadychałasia i piščała davoli vialikaje kaciania. Historyju raspaviadaje «Naš kraj».
Pra zdareńnie stała viadoma tolki zaraz, ale sprava była ŭ kastryčniku, u Tekstylnym.
— Na siońniašni rozum ja, viadoma ž, adrazu b padniałasia dadomu i adkryła nakryŭku, — zhadvaje padziei taho dnia dziaŭčyna. — Ale tady ja vielmi spałochałasia, zapanikavała: što rabić, kudy biehčy? Tamu prosta pabiehła z hetaj bankaj u vietkliniku. Doktarka ŭžo sychodziła, stajała na parozie, ale viarnułasia, adkryła banku i pačała ratavać žyviołu — jak akazałasia, maładuju košačku: adrazu dała kisłarod.
Darečy, hrošaj doktarka nie ŭziała. Kali stała zrazumieła, što kotka ŭžo ŭ adnosna narmalnym stanie, Karyna paniesła jaje dadomu. Pakinuła ŭ siabie i nazvała Iryskaj.
Pryjšła ŭ siabie kotka davoli chutka — tolki ceły dzień i navat bolš adpivałasia vadoj.
A na ježu kidajecca da hetaha času, choć užo daŭno adkormlenaja haspadyniaj. Ranki nieviadomaha pachodžańnia zažyli za ličanyja dni, i ciapier pra minułaje nahadvajuć tolki vialikija prablemy ź dziasnoj, jakija Karyna lečyć joj dahetul.
A voś na charaktary pieražyty stres kali i adbiŭsia, to tolki ŭ lepšy bok.
— Takich łaskavych košak ja jašče nie bačyła, — kaža Karyna. — Pryjdzieš, dapuścim, z vulicy ci z vannaj — jana tak łapkami piaščotna ciabie macaje, masažuje…
U Karyny ŭžo žyvie koška — sijamskaja, z charaktaram, jak, napeŭna, usie pradstaŭniki hetaj parody. Dziaŭčyna bajałasia, što abaryhienka nie prymie novieńkuju. Ale Monia pastaviłasia da Iryski na ździŭleńnie dobrazyčliva:
— Dachodziła da taho, što pieršym časam navat sama padsoŭvała joj prosta ŭ łapy kuracinu — heta pry tym, što hatovaja dušu za jaje pradać! Kali Iryska dureje, zamiaŭkaje-zapiščyć — Monia tut ža na ŭsiaki vypadak biažyć praviarać, ci nie patrebna toj abarona.
Sama Karyna ŭładkoŭvać jaje dalej u niečyja ruki nie źbirajecca: «Jana ŭžo maja». Fatahrafii zadavolenaj žyćciom Iryski paćviardžajuć, što koška vidavočna nie suprać.
Što kažuć u milicyi
Heta historyja mahła skončycca nie simpatyčnymi zdymkami, a śmierciu žyvioły ŭ strašnych pakutach. Darečy, susiedka raspaviała Karynie, što taksama znajšła na hetym śmietniku košku z kacianiatami ŭ zaviazanym miašku, u jakich zachoŭvajuć bulbu. Jany taksama ŭsie vyžyli, usie ŭładkavanyja, ale heta nie admianiaje faktu biesčałaviečnaha staŭleńnia da žyvioł, jakoje pavinna być pakarana.
Jakaja adkaznaść pa zakonie ich moža čakać?
Jak raspaviali ŭ Baranavickim HAUS, u hetych dziejańniach nasamreč jość skład administracyjnaha pravaparušeńnia abo kryminalnaha złačynstva. Čaho mienavita — heta vyśviatlajecca ŭ pracesie pravierki, jakuju supracoŭniki milicyi praviaduć u vypadku pastupleńnia zajavy (ad dziaŭčyny, jakaja znajšła žyviołu).
U vypadku administracyjnaha pravaparušeńnia moža być nakładzieny štraf da tryccaci bazavych vieličyń, hramadskija pracy abo administracyjny aryšt. Ale jość važny niuans: kali vyśvietlicca, što heta było administracyjnaje pravaparušeńnie, to termin daŭnaści pa im — dva miesiacy. Adpaviedna, pa zakančeńni hetaha času pryciahnuć žyvadziora da adkaznaści ŭžo budzie niemahčyma.
Zusim inšaja sprava, kali pravierka pakaža, što biesčałaviečnaść usio ž padpadaje pad kvalifikacyju kryminalnaj spravy. Tady nie važna, kali zajava pastupiła ŭ milicyju. Adkaznaść napatkaje vinavataha choć praz hod. Kali budzie raspačataja kryminalnaja sprava za žorstkaje abychodžańnie z žyviołaj, vinavataha moža čakać pakarańnie až da pazbaŭleńnia voli da 4 hadoŭ.
Ciapier čytajuć
Žonku adnaho z hałoŭnych turemščykaŭ Biełarusi pasadzili ŭ kałoniju za ŭdzieł u pratestach5
Kamientary