«Čas pierakryć vientyl». ES paskaraje admovu ad rasijskaha zvadkavanaha hazu

Sa słoŭ staršyni Jeŭrakamisii, «ciaham apošniaha miesiaca Rasija prademanstravała poŭnaje hrebavańnie dypłamatyjaj i mižnarodnym pravam». Pry hetym fon der Lajen uzhadała masiravany ŭdar pa Kijevie, padčas jakoha siarod inšaha byli paškodžanyja budynak ukrainskaha ŭrada i pradstaŭnictva ES.

Staršynia Jeŭrakamisii taksama zhadała i pra ataki rasijskich dronaŭ nad Polščaj i Rumynijaj. Pakolki «rasijskaja vajskovaja ekanomika siłkujecca dachodami ad vykapniovych enierhanośbitaŭ», ES choča spynić hetyja dachody, patłumačyła kiraŭnica Jeŭrakamisii.

«My zabaraniajem impart rasijskaha zvadkavanaha hazu na jeŭrapiejskija rynki», — zajaviła fon der Lajen.

Staršynia Jeŭrakamisii taksama nahadała pra papiaredniuju sankcyjnuju pastanovu ES — źnizić «stol cenaŭ» na rasijskuju naftu da 47,6 dalara za barel (heta na 20 dalaraŭ nižej za zakładzienuju ŭ biudžecie RF canu nafty).

Kab uzmacnić hetuju pastanovu, u novym sankcyjnym pakiecie ES uviadzie dadatkovyja zachady ŭ dačynieńni da rasijskaha cieniavoha fłotu tankieraŭ, jakija pastaŭlajuć naftu na ekspart. Tranzakcyi hałoŭnych enierhietyčnych kampanij — «Rasnafty» i «Hazpramnafty» — z hetaha času buduć pad poŭnaj zabaronaj, taksama paviedamiła kiraŭnicy Jeŭrakamisii.

«Ciapier my idziem da tych, chto padsiłkoŭvaje vajnu Rasii, kuplajučy naftu ŭ abychod sankcyj. U nas na prycele naftapierapracoŭčyja zavody, naftatrejdary, naftachimičnaja pramysłovaść trecich krain, uklučajučy Kitaj», — patłumačyła fon der Lajen.

Pieraharnuć staronku nazaŭždy

Pradstaŭlajučy 19‑y pakiet sankcyj suprać Rasii, staršynia Jeŭrakamisii taksama nahadała, što za try hady z pačatku rasijskaj ahresii suprać Ukrainy dachody ad prodažu rasijskich enierhanośbitaŭ u Jeŭropie skaracilisia na 90%.

«My nazaŭždy pierahortvajem hetuju staronku», — zajaviła fon der Lajen.

Adnak za minuły hod, pavodle źviestak Jeŭrakamisii, pastaŭki zvadkavanaha hazu z Rasii skłali amal 19% ad usiaho impartu. U cełym, pavodle źviestak Jeŭrastata, letaś ES impartavaŭ z Rasii hazu na 15,6 miljarda jeŭra. Z ZŠA, jakija ciapier źjaŭlajucca lidaram u pastaŭkach hazu ŭ ES, impart skłaŭ 19,1 miljarda jeŭra.

U pieršym paŭhodździ 2025 hoda ES impartavaŭ z Rasii zvadkavanaha hazu na sumu kala 4,5 miljarda jeŭraŭ. Pry hetym ahulny hazavy impart Jeŭrasajuza za pieršaje paŭhodździe hetaha hoda skłaŭ amal 27 miljardaŭ jeŭra, ź jakich najbolšaja dola — 13,7 miljarda jeŭra — vypłačanaja za amierykanski zvadkavany haz.

Paśla pačatku poŭnamaštabnaj rasijskaj ahresii suprać Ukrainy ES užo admoviŭsia ad impartu hazu z Rasii, jaki pastupaje pa trubapravodach, ale praciahvaŭ kuplać zvadkavany haz. Akramia taho, dla Vienhryi i Słavakii zrabili vyklučeńni, kab jany mahli znajści alternatyŭnyja krynicy pastavak.

U toj ža čas hetyja dźvie krainy rehularna błakujuć sankcyjnyja pakiety suprać Rasii, u jakoj Vienhryja i Słavakija kuplajuć nie tolki haz, ale i naftu. Uviadzieńnie čarhovaha pakieta sankcyj, uchvaleńnie jakoha pavinna adbyvacca adnahałosna ŭsimi 27 krainami — členami ES, hetak ža sama moža być zabłakavana Vienhryjaj i Słavakijaj.

Adnak, pavodle infarmacyi Bloomberg, u Jeŭrakamisii taksama razhladajuć varyjant z uniasieńniem papravak u prahramu RePowerEU, jakaja praduhledžvaje poŭnuju admovu ad rasijskich enierhanośbitaŭ u ES, i jakaja była pačataja praz rasijskuju ahresiju suprać Ukrainy. Kali heta adbudziecca, to dla ŭchvaleńnia pamianšeńnia zaležnaści ad rasijskich enierhanośbitaŭ spatrebicca prostaja bolšaść hałasoŭ krain-členaŭ.

Abviaščeńnia ab mierach 19‑ha pakieta jeŭrapiejskich sankcyj suprać Rasii čakali raniej. Zatrymku źviazvajuć ź ciskam prezidenta ZŠA Trampa na Brusel mienavita ŭ pytańni admovy ad rasijskich enierhanośbitaŭ.

Pa paviedamleńniach ŚMI, paśla telefonnaj razmovy pamiž Trampam i fon der Lajen 17 vieraśnia Brusel i Vašynhton sprabavali damahčysia ad Vienhryi i Słavakii poŭnaj admovy ad impartu rasijskaj nafty. Adnak pradstaŭniki ŭładaŭ hetych krain zajavili, što buduć supraciŭlacca cisku skaračeńnia impartu rasijskaj nafty i hazu, pakul krainy-členy Jeŭrasajuza nie znojduć alternatyŭnych krynic pastavak.

Napiaredadni, zaviaršajučy vizit u Vialikabrytaniju prezident Tramp zajaviŭ, što čakaje, pakul jeŭrapiejskija krainy pamienšać svaju zaležnaść ad rasijskaj nafty, pierš čym jon navažycca ŭzmacnić cisk na Uładzimira Pucina.

«Ja hatovy rabić roznyja rečy, ale nie tady, kali ludzi, za jakich ja zmahajusia, kuplajuć naftu ŭ Rasii, — skazaŭ prezident ZŠA žurnalistam. — Kali košt nafty źnizicca, Rasija sucišycca».

Krypta, technałohii i zamarožanyja aktyvy

Novyja jeŭrapiejskija sankcyi suprać Rasii taksama buduć tyčycca finansavaha i bankaŭskaha siektara, i ŭpieršyniu — abarotu kryptovalut. Heta treba dla taho, kab zakryć dzirki ŭ sankcyjnaj sistemie i pieraškodzić Rasii i trecim krainam abychodzić sankcyi, patłumačyła kiraŭnica Jeŭrakamisii.

ES źbirajecca praviarać i abmiažoŭvać tranzakcyi bankaŭ trecich krain, padłučanych da alternatyŭnych rasijskich płaciežnych sistem, a taksama abmiežavać tranzakcyi z kampanijami sa asablivych ekanamičnych zon.

Jašče adnym składnikam novaha sankcyjnaha pakieta budzie abmiežavańnie dla kampanij z trecich krain, jakija supracoŭničajuć z Rasijaj u halinie vajskovych technałohij.

«U vajnie, chod jakoj vyznačajecca inavacyjami, krytyčna važnym źjaŭlajecca pazbavić Rasiju dostupu da technałohij», — zajaviła staršynia Jeŭrakamisii, padkreśliŭšy, što heta pierš za ŭsio tyčycca vytvorčaści dronaŭ.

Ursuła fon der Lajen taksama anansavała pracu nad «novym rašeńniem finansavańnia vajennych namahańniaŭ Ukrainy» za košt zamarožanych rasijskich aktyvaŭ.

«Heta vajna Rasii, i ahresar pavinien zapłacić, — zajaviła staršynia Jeŭrakamisii. — My chočam, kab Rasija pakinuła pole boju i sieła za stoł pieramovaŭ. Heta realny šlach dać miru šaniec».

Zrešty, jak patłumačyła fon der Lajen, hetaja pastanova nie zakranie samich aktyvaŭ, a hrošy, jakija atrymaje Ukraina, buduć pazykaj, jakuju jana viernie tolki tady, kali atrymaje ad Rasii reparacyi za vajnu.

• 2
• 0
• 0
• 0
• 0
• 0
• 0
• 0