«Niejkaje napružańnie ŭ pavietry pačało navisać». Jak dyrektar adnoj biełaruskaj kampanii ahitavaŭ udzielničać u vajnie

Jak źmianiłasia abstanoŭka na pracy paśla pačatku poŭnamaštabnaj vajny

Naš ofis amal całkam byŭ apazicyjny. Było dakładna viadoma tolki pra dvuch kaleh z prarasijskimi pohladami, i my ź inšymi zaŭsiody ź ich pakieplivali. Ale heta było pa-dobramu. Nivodzin z bakoŭ nie pierachodziŭ da abrazaŭ: usie davoli stałyja ludzi, hutaryli na uzroŭni faktaŭ, ale kožny kruciŭ ich pad siabie.

I voś niejkaje napružańnie ŭ pavietry pačało navisać. U ofisie źjavilisia buklety dy ŭlotki z prapanovami stać rasijskim najomnikam. Ja bačyŭ, jak naš dyrektar, Jarasłaŭ Hrabienščykoŭ, pačaŭ ich padsoŭvać na bačnyja miescy…

Mienia tak heta razzłavała, što ŭ momant, kali nikoha nie było, ja ich vykidaŭ u śmietnicu. I kab nikoha nie spakusiła ich adtul dastać, prysypaŭ usio makuchaj.

Praź dziesiać chvilin paśla incydentu ja pačuŭ, jak dyrektar niervova pytajecca va šładalnika kampanii, chto heta zrabiŭ. A toj tolki ŭśmichaŭsia i kazaŭ: «A čaho ž ty čakaŭ?».

Praź niejki čas na ŭvachodzie da adździeła prodažaŭ paviesili vialikuju listoŭku z rasiejskimi vajskoŭcami. Heta nikomu nie spadabałasia z supracoŭnikaŭ, ale nichto nie aśmieliŭsia hetamu pieraškodzić.

Pra prasłuchoŭvańnie mantažnikaŭ na pracy

Jašče da vajny kiraŭnictva časam pravodziła palitinfarmacyju na pracy i papiaredžvała, kab my trymali jazyk za zubami, bo «za nami sočać».

Usie, chto zajmajecca mantažom i stvareńniem elektronnych čerhaŭ u roznych bankach Biełarusi, viedajuć, što banki prasłuchoŭvajucca. Padčas mantažu mnie davodziłasia adčyniać stolevuju prastoru. Tam byli schavanyja mikrafony. Heta było prafiesijnaje abstalavańnie, admysłova zakuplenaje dla prasłuchoŭvańnia.

Zrazumieŭ ja heta i paźniej, kali ŭžo pracavaŭ u adnym ź nievialičkich haradoŭ: varta było niešta skazać pra novy prezidencki dekret, jak sietkavy administratar adrazu padyšoŭ z zaŭvahaj i paprasiŭ sačyć za słovami.

Jašče pierad tym, kab jeździć pracavać u banki, razam ź inšymi ja prachodziŭ pravierku ŭ MUS. Tam patrabavali padpisać damovu ab nierazhałošvańni dziaržaŭnaj tajamnicy. Ale što mienavita adnosicca da dziaržaŭnaj tajamnicy, mnie tak i nie ŭdałosia daviedacca. Navat juryst, da jakoha ja źviartaŭsia z hetym pytańniem, tolki paciskaŭ plačyma. U vyniku daviałosia pastavić podpis pad papieraj, sensu jakoj tak i nie zrazumieŭ.

Pra dyrektara kampanii

Ja nie viedaju, chto z kiraŭnikoŭ kampanii vyrašyŭ uziać Jarasłava na pasadu dyrektara, ale zdahadvajusia, navošta heta zrabili. U kampanii byŭ patrebien chtości, chto maje suviazi ź siłavikami, kab rabić prodažy ŭ dziaržaŭnyja kampanii.

Ahułam Science Solutions nielha nazvać pradziaržaŭnaj. Ludzi ŭ joj zbolšaha byli apazicyjnymi i hałasavali za Cichanoŭskuju. Partreta Łukašenki ŭ kampanii amal nidzie nie visieła. Jon byŭ tolki ŭ pierahavornym pakoi. Ale ŭ kabiniecie Jarasłava visieŭ partret siłavika ŭ krapavym bierecie (nie ŭzhadaju, kaho mienavita, ale mahčyma Mikałaja Karpiankova), što mianie tady mocna ździŭlała.

Samaje dziŭnaje, što ŭ vočy jon kazaŭ adno, a na spravie rabiŭ zusim inšaje (jak ź listoŭkami). Pa jahonych słovach, vajnu jon nie padtrymlivaŭ. Ale svaje dziejańni apraŭdvaŭ tym, što da jaho prychodziać «pavažanyja ludzi», i jany pavinny bačyć peŭnuju aktyŭnaść. Pa jaho łohicy, heta byŭ sposab prasoŭvańnia biznesu. Skłałasia ŭražańnie, što jaho asnoŭny pryncyp — «i vašym, i našym». Pravajennyja buklety Jarasłaŭ raspaŭsiudžvaŭ chutčej dziela «spravazdačy», ale pry hetym jašče i ščyra hanaryŭsia hetym.

Pavialičyć

• 0
• 0
• 0
• 0
• 0
• 0
• 0
• 0