U Novaj Ziełandyi baćka zabraŭ traich dziaciej i čatyry hady žyŭ ź imi ŭ lesie. Jon zahinuŭ u vyniku pierastrełki z palicyjaj

Pieršy raz 34-hadovy Tom Filips źnik u vieraśni 2021 hoda. Pikap, jaki jamu naležaŭ, znajšli na dzikim plažy Kirytechere niedaloka ad horada Marakopa na zachodnim uźbiarežžy Paŭnočnaha vostrava Novaj Ziełandyi. Dziciačyja aŭtakresły byli pryšpileny zzadu ŭ mašynie, a klučy pakinuty pad dyvankom kiroŭcy. Ale pryliŭ nabližaŭsia, i miascovyja žychary paličyli dziŭnym, što Filips pakinuŭ svaju mašynu, kab jaje zabrała mora.

Razam ź Filipsam źnikli troje jaho dziaciej — Džejda, Mevieryk i Embier, jakim na toj momant było vosiem, siem i piać hadoŭ.

Filips byŭ daśviedčanym udzielnikam pachodaŭ i amataram aktyŭnaha adpačynku, ale ŭ miascovych žycharoŭ uźnikli zaściarohi, što siamju moh zabrać u mora pryliŭ.

Heta redka nasielenaja miascovaść, na toj momant pa-za zonaj mabilnaj suviazi, raptam pieratvaryłasia ŭ miesca burnaj aktyŭnaści. Kamandy pošuku chadzili pa ŭźbiarežžy pieššu i na nadzimanych łodkach.

Niaščasny vypadak zdavaŭsia małavierahodnym, štości nie składałasia.

Amal praz tydzień palicyja zajaviła, što choča daviedacca, dzie znachodziacca dva matacykły, jakija raniej naležali Filipsu — pieršy aficyjny namiok na toje, što źniknieńnie siamji moža być bolš składanym.

Potym źjaviłasia źviestka pra mužčynu i dziaciej na matacykle, zaŭvažanych na viaskovaj darozie ŭrańni

Pačałasia pošukavaja apieracyja. Ratavalniki pračesvali bierahavuju liniju pieššu i na nadzimanych łodkach, a kali dazvalała nadvorje, dałučalisia viertaloty, bieśpiłotniki i samaloty ź ciepłavizarami.

Praz dva tydni paśla źniknieńnia Filips ź dziećmi viarnuŭsia dadomu na siamiejnuju fiermu. Palicyja paviedamiła, što ŭvieś hety čas jany žyli ŭ namiotach u lesie za 15 kiłamietraŭ na poŭdzień ad plažu, dzie byŭ pakinuty pikap.

Pošuki abyšlisia ŭ sotni tysiač dalaraŭ — i nieŭzabavie Filipsu pradjavili abvinavačańnie ŭ daremnaj tratcie času palicyi. U śniežni 2021 hoda, za piać dzion da Božaha Naradžeńnia, Filips i dzieci znoŭ źnikli. Hetym razam ich šukać nie stali — ale kali Filips nie źjaviŭsia ŭ sud 12 studzienia 2022 hoda, byŭ vydadzieny ordar na jaho aryšt.

U žniŭni 2023 hoda maci źnikłych dziaciej (z baćkam dziaciej jana ŭ razvodzie) zaŭvažyła Filipsa ŭ haspadarčaj kramie, dzie jon kuplaŭ za najaŭnyja nałobnyja lichtaryki, batarejki, sadžancy, viodry i humovyja boty, ale nie paśpieła ničoha zrabić.

U kastryčniku 2024 hoda miascovyja palaŭničyja źniali na videa mužčynu i traich dziaciej u daždžavikach i ź vialikimi zaplečnikami, jakija išli pieššu praz pole pablizu ad Marakopy.

U kancy žniŭnia 2025 hoda vuličnaja kamiera źniała Filipsa razam z adnym ź dziaciej, kali jany nočču pranikli ŭ supiermarkiet u horadzie Piopia. Skraŭšy pradukty, jany źnikli na kvadracykle (vierahodna, skradzienym).

Palicyja abviaściła ŭznaharodu ŭ pamiery 80 tysiač dalaraŭ za infarmacyju, jakaja dapamahła b ustalavać miescaznachodžańnie Filipsa. Maci dziaciej źviartałasia da miascovych žycharoŭ z prośbaj dapamahčy ich znajści.

Siamja ciaham usich hetych hadoŭ nastojliva śćviardžała, što nie dapamahała Filipsu.

Na kožnyja z čatyroch Kaladaŭ, jakija prajšli, pakul jany byli źnikłymi, siastra Filipsa, Rozi Filips, kłała pad jołku padarunki ź imionami Džejdy, Mevieryka i Embier — u nadziei, što jany znoŭ źjaviacca na parozie.

Finalnaja častka historyi Toma Filipsa była nie takoj, jakoj chto-niebudź chacieŭ jaje bačyć: ni palicyja, ni siamja Filipsa, ni maleńkaja hramada Marakopa.

Jaho žyćcio skončyłasia na viaskovaj darozie ranicaj paniadziełka padčas pierastrełki z palicyjaj, jakaja, narešcie, zdoleła jaho vysačyć paśla taho, jak jaho zaŭvažyli padčas uzłomu kramy ŭ maleńkim horadzie prykładna za hadzinu jazdy adtul.

Pakul cieła jaho syna lažała na darozie, dzie jaho zabili, baćka Filipsa, jaki apłakvaŭ syna, skazaŭ žurnalistu z novaziełandskaha vydańnia Stuff, što siamja była «zapeckanaja» palicyjaj «nieadnarazova».

Pavialičyć

Adzin z troch jaho dziaciej byŭ ź im, kali baćka zahinuŭ. Ich brata i siastru znajšli praź niekalki hadzin, adnych u łahiery.

Chto budzie dahladać dziaciej, pakul nie zrazumieła. Dziaržaŭnaje ahienctva, jakoje kłapocicca pra dziaciej, Oranga Tamariki, zajaviła ŭ aŭtorak, što jany byli «prystrojenyja» ŭ paniadziełak uviečary pad apieku ŭładaŭ.

Detektyŭ, jaki viadzie spravu, skazaŭ New Zealand Herald u 2024 hodzie, što jon ličyć, što apieka nad dziećmi mahła być matyvacyjaj Filipsa dla druhich ŭciokaŭ.

• 0
• 0
• 0
• 2
• 0
• 3
• 0
• 0