Nastupstvy na sabie adčujuć i pasažyry (asabliva tyja, chto jeździć na aŭto), i hruzapieravozčyki.
Polšča zakryvaje miažu ź Biełaruśsiu ŭ noč z 11 na 12 vieraśnia ŭ suviazi z rasijska-biełaruskimi vučeńniami «Zachad-2025», jakija projduć z 12 pa 16 vieraśnia.
Jak doŭha miaža budzie zastavacca zakrytaj, dakładna nieviadoma.
U tematyčnych čatach niekatoryja pišuć, što polskija pamiežniki nibyta kazali im, što miaža budzie zakrytaj da 16 vieraśnia (data zaviaršeńnia vučeńniaŭ). Ale aficyjnaha paviedamleńnia pra heta pakul nie było.
Kałaps z mašynami
Na miažy z Polščaj pracujuć tolki dva punkty propusku — pa adnym dla pasažyrskaha i hruzavoha ruchu.
Praz punkt propusku «Brest» za sutki prajazdžaje pa 600—800 lehkavych aŭto. Prykładna stolki ž prajazdžaje praz dva punkty propusku na miažy ź Litvoj i adzin na miažy z Łatvijaj razam uziatyja. To bok, na polski kirunak prychodzicca kala 50% patoku lehkavych aŭto.
Inšaja važnaja akaličnaść u tym, što tolki praz Polšču možna trapić u Jeŭrasajuz na aŭto ź biełaruskimi numarami biez asablivych abmiežavańniaŭ.
Vyjechać i zajechać praź Litvu na aŭto ź biełaruskaj rehistracyjaj mohuć tolki tyja, chto maje DNŽ abo vizu, vydadzienyja Litvoj. Prajezd na aŭto ź biełaruskimi numarami pa terytoryi Łatvii całkam zabaronieny.
Atrymlivajecca, što biełarusy na aŭto ź biełaruskaj rehistracyjaj, jakija nie paśpiejuć pakinuć Jeŭrasajuz da zakryćcia miažy z Polščaj, nie zmohuć viarnucca na mašynie dadomu.
Da taho ž, z 1 vieraśnia dziejničajuć novyja praviły ŭjezdu ŭ Łatviju. Biełarusam treba nie paźniej čym za 48 hadzin da ŭjezdu (u tym liku tranzitnaha) zapoŭnić śpiecyjalnuju elektronnuju ankietu z asabistymi danymi i maršrutam.
Vyklučeńnie tolki dla tych, chto maje DNŽ abo vizu, vydadzienyja Łatvijaj.
Najaŭnaść DNŽ (časovaha ci pastajannaha) luboj ź inšych krain ES nie vyzvalaje ad abaviazku zapaŭniać ankietu za 48 hadzin da pryjezdu ŭ Łatviju.
Što z aŭtobusami?
Praz punkt propusku «Brest» štodnia prajazdžajuć dziasiatki aŭtobusaŭ, jak maršrutnych (nie tolki ŭ roznyja harady Polščy, ale i ŭ inšyja krainy Jeŭropy), tak i turystyčnych. Za sutki pry najaŭnaści čarhi praz hety punkt propusku prajazdžaje kala 120 aŭtobusaŭ u kožny bok.
U vypadku z turystyčnymi aŭtobusami nie jasna, jak jany buduć viartacca ŭ Biełaruś paśla 12 vieraśnia, bo Litva nie prapuskaje praz svaju terytoryju turystyčnyja aŭtobusy ź Biełarusi.
Pieravozčyki ŭžo pačynajuć infarmavać ludziej pra admieny rejsaŭ u Polšču ŭ suviazi z zakryćciom miažy.
Situacyja z hruzapieravozkami
Z hruzavym transpartam situacyja taksama vielmi składanaja, pakolki praz «Kazłovičy» za sutki prajazdžaje ŭ niekalki razoŭ bolš hruzavikoŭ, čym praz try astatnija punkty propusku.
Tak, naprykład, kali praz «Kazłovičy» za minułyja sutki prajechała 822 hruzaviki, to praz dva punkty propusku na miažy ź Litvoj i adzin z Łatvija — usiaho 202 hruzaviki.
Navat kali zakryćcio miažy z Polščaj praciahniecca tolki na čas praviadzieńnia vučeńniaŭ «Zachad», heta mocna paŭpłyvaje na terminy dastaŭki tavaraŭ, a taksama moža vyklikać rost stavak na pieravozki.
Da taho ž aproč aŭtadarožnych punktaŭ propusku budzie zakryty i čyhunačny ruch.
Jakija jość alternatyŭnyja šlachi, kab dabracca ŭ Polšču?
Jechać praź Litvu na mašynie ź biełaruskimi numarami možna tolki ź litoŭskaj vizaj abo DNŽ Litvy. Tamu bolš realistyčny varyjant — aŭtobus. Apošnim časam rejsaŭ stała mienš. Bližejšyja bilety ź Minska ŭ Vilniu jość na 15 vieraśnia za 75 jeŭra. Viarnucca ź Litvy ŭ Biełaruś praściej — bilety jość navat na siońnia i zaŭtra.
Jašče adzin varyjant trapić u Polšču — jechać tudy praz Rasiju. Dla hetaha treba ŭziać bilet na ciahnik da Kalininhrada (bilety na bližejšyja dni kaštujuć ad 285 rubloŭ). Čas pajezdki — 11,5 hadziny. Vychodzić ź ciahnika na terytoryi Litvy zabaroniena, tamu ŭ lubym vypadku daviadziecca jechać u Kalininhradskuju vobłaść. I adtul užo možna trapić u Polšču.
Samy darahi sposab dabracca ŭ Polšču abo inšuju krainu Jeŭropy — heta nabyć bilet ź Minska ŭ Stambuł, a adtul užo lacieć u patrebny horad. Da Stambuła lacieć 5,5 hadziny. Praŭda, ceny na bilety ŭ bližejšyja dni pačynajucca ad 2250 rubloŭ.
Pahladzieli film «Piaščotna da siabie», źniaty pa dzika papularnaj biełaruskaj knizie — pra zaciukanuju žančynu, jakuju chočuć zrabić dla ŭsich zručnaj33
Kamientary