Sienatary-respublikancy ŭzmacnili cisk na Trampa, kab jon uvodziŭ sankcyi suprać Rasii
Sienatary ZŠA ad Respublikanskaj partyi aktyvizavali cisk na Donalda Trampa, patrabujučy ad jaho ŭvieści novyja sankcyi suprać Rasii. Pavodle infarmacyi CNN, respublikancy ŭsio bolš adkryta krytykujuć pasiŭnuju pazicyju Biełaha doma i patrabujuć ad prezidenta rašučych dziejańniaŭ.
Adzin z najbolš aktyŭnych krytykaŭ, sienatar ad Paŭnočnaj Karaliny Tom Tylis zajaviŭ, što Rasija «hulaje z nami, jak na pijanina». Jon adznačyŭ, što Pucin užo dasiahnuŭ svajho — sustreŭsia z Trampam, atrymaŭ aficyjny pryjom u Si Czińpina, pravioŭ pieramovy z Kim Čen Ynam. Na dumku Tylisa, heta śviedčyć pra stratehiju Maskvy, jakaja choča «ciahnuć nas za saboj» i padryvać zachodniuju demakratyju.
Tylis padkreśliŭ, što Pucin imkniecca asłabić ZŠA i nie zacikaŭleny ŭ miry. Jon nahadaŭ pra masavyja ŭdary rasijskich vojskaŭ pa ŭkrainskich haradach i zaklikaŭ spynić ahresiju. U jakaści kroku jon prapanavaŭ jak maha chutčej vynieści na hałasavańnie raniej adkładzieny Trampam ubok zakonaprajekt sienataraŭ Lindsi Hrema i Ryčarda Blumientala. Hety dakumient praduhledžvaje, što prezident ZŠA atrymaje prava ŭvodzić da 500% pošlin na impart z krain, jakija praciahvajuć kuplać rasijskija enierharesursy.
Adzin z aŭtaraŭ prajekta, sienatar Lindsi Hrem, źviarnuŭsia da prezidenta praz sacsietki, zajaviŭšy, što Kanhres hatovy pryniać zakon ab «skryšalnych sankcyjach», jaki daść Trampu šyrokija paŭnamoctvy.
Ciapier situacyja ŭskładniajecca tym, što ŭ noč na 10 vieraśnia rasijskija drony znoŭ parušyli pavietranuju prastoru Polščy. Polšča zafiksavała nie mienš za 19 bieśpiłotnikaŭ, čatyry ź jakich byli źbityja. Na heta Tramp adreahavaŭ tolki raspłyvistym paviedamleńniem u svajoj sietcy Truth Social, što vyklikała chvalu krytyki.
Lidar bolšaści ŭ Sienacie Džon Ćjun pryznaŭ, što dahetul jany čakali sihnału ad Biełaha doma, pakolki administracyja viali ŭłasnyja pieramovy z Maskvoj. Ale paśla ataki dronaŭ cikavaść da sankcyjnaha zakonaprajekta značna ŭzrasła. Jon nie vyklučyŭ, što inicyjatyva moža być vyniesienaja na hałasavańnie navat biez papiaredniaj zhody Biełaha doma.
Sienatar ad Paŭnočnaj Dakoty Kievin Kramier taksama padtrymaŭ ideju paskoryć praces. Jon adznačyŭ, što pakiet sankcyj treba było pryniać jašče miesiac tamu, bo pavodziny Rasii śviedčać pra poŭnuju adsutnaść u jaje žadańnia da deskałacyi.
Jak paviedamlaje CNN, klučavyja respublikancy ŭ kamitetach Sienata i Pałaty pradstaŭnikoŭ pa pytańniach abarony taksama vykazalisia za toje, kab ćviordaja pazicyja adnosna Rasii stała aficyjnaj linijaj administracyi ZŠA.
Kamientary
U Trampa i putina svojo priedstavlenije o riealnosti. Tiem boleje, čto ich riealnosť formirujet ich staryj vozrast.
Eto načinajet ponimať elita SŠA, no trampu etoho nie poniať.