«Zabłakujem usio»: u Francyi maštabnyja pratesty, amal 200 zatrymanych i transpartny kałaps

Ministr unutranych spraŭ Bruno Retajo paviedamiŭ žurnalistam u sieradu ranicaj, što pa ŭsioj krainie razhornuta 80 000 supracoŭnikaŭ sił biaśpieki, u tym liku 6000 u Paryžy. Francuzskija ŚMI čakajuć, što ŭ demanstracyjach voźmuć udzieł da 100 000 čałaviek.

«My ryzykujem sutyknucca z mabilizacyjaj, jakaja pryviadzie da akcyj pa ŭsioj krainie», — skazaŭ Retajo. Pavodle jaho źviestak, užo aryštavana kala 200 čałaviek.

Paviedamlajecca, što pratestoŭcy zachapili Lijonski vakzał u Paryžy.

Retajo paviedamiŭ, što kala 50 čałaviek u kapiušonach sprabavali zabłakavać ruch u Bardo, a ŭ Tułuzie pažar na kabielnaj linii pryvioŭ da zbojaŭ u ruchu pamiž Tułuzaj i Ošam na paŭdniova-zachadzie Francyi, niahledziačy na toje, što jaho ŭdałosia chutka patušyć. Asobnyja akcyi taksama prajšli nočču ŭ Paryžy, adnak padrabiaznaściej ministr nie pryvioŭ.

Paryžskaja palicyja paviedamiła, što na hety momant było aryštavana 75 čałaviek, ale taksama nie paviedamiła padrabiaznaściej pra toje, dzie i za što hetyja ludzi byli aryštavanyja.

Apieratar aŭtamahistralaŭ Vinci paviedamiŭ pra pratesty i zboi ŭ ruchu na aŭtamahistralach pa ŭsioj Francyi, uklučajučy Marsel, Manpielje, Nant i Lijon. Francuzski dziaržaŭny čyhunačny apieratar SNCF čakaje zbojaŭ u pracy, u pryvatnaści, rehijanalnych ciahnikoŭ TER i ciahnikoŭ Intercités. Sietka chutkasnych ciahnikoŭ TGV, jak čakajecca, nie pacierpić ad pratestaŭ.

Siońnia ranicaj SNCF paviedamiŭ, što «dva złamysnyja akty» minułaj nočču parušyli pracu niekatorych ciahnikoŭ na poŭdni Francyi.

Było vyjaŭlena dva «paškodžańni kabiela», adno pamiž Marmandam i Aženam u paŭdniova-zachodnim rehijonie Ło-e-Harana, «što pryviało da parušeńnia čyhunačnaha ruchu pamiž Bardo i Tułuzaj», paviedamiŭ SNCF. Jašče adno paškodžańnie ŭ Kałamje, pryharadzie Tułuzy, taksama pryviało da zbojaŭ u ruchu ciahnikoŭ.

Ruch «Zabłakujem usio» nabyŭ papularnaść u sacsietkach hetym letam, i jaho ŭžo paraŭnoŭvajuć z «žoŭtymi kamizelkami», jakija pačali pratestavać suprać pavyšeńnia koštaŭ na paliva ŭ 2018 hodzie, ale chutka pieraraśli ŭ bolš šyroki pratesny ruch suprać ekanamičnych reformaŭ prezidenta Emanuela Makrona. Aktyvisty ruchu «Zabłakujem usio» ličać francuzskuju palityčnuju sistemu takoj, što bolš nie vykonvaje svajho pryznačeńnia.

Analityki ličać, što ruch uźnik siarod pravych hrup, ale zatym byŭ padchopleny levymi i krajnimi levymi. Demanstracyi vidavočna nie dapamohuć asłabić palityčnuju napružanaść u Francyi: usiaho dva dni tamu parłamient vykazaŭ votum niedavieru premjer-ministru Fransua Bajru, prymusiŭšy jaho pajści ŭ adstaŭku.

U aŭtorak Makron pryznačyŭ užo piataha premjer-ministra mienš čym za dva hady — im staŭ 39-hadovy Siebaśćien Lekorniu. Lekorniu — sajuźnik Makrona i ličyŭsia adnym z favarytaŭ na hetuju pasadu. Apošnija try hady jon zajmaŭ pasadu ministra abarony, nadajučy asablivuju ŭvahu reakcyi Francyi na vajnu Rasii va Ukrainie.

Jamu treba budzie vyrašyć zadaču, na jakoj spatyknuŭsia jaho papiarednik Fransua Bajru: skaracić rastučy dziaržaŭny doŭh Francyi, jaki da pačatku hetaha hoda dasiahnuŭ 3,3 trłn jeŭra i skłaŭ 114% VUP krainy.

Bajru prapanavaŭ skaracić biudžet na 44 młrd jeŭra i zaadno admianić dva ahulnanacyjanalnyja vychodnyja. Heta vyklikała pratest jak sprava, tak i źleva ŭ parłamiencie, Bajru abviaściŭ hałasavańnie ab daviery ŭradu i pravaliŭ jaho. U zajavie Jelisiejskaha pałaca havorycca, što Lekarniu było daručana pravieści kansultacyi z palityčnymi partyjami z metaj pryniaćcia nastupnaha biudžetu Francyi.

Pryznačeńnie Lekarniu było pazityŭna ŭspryniata centrystami. Pravaja «Nacyjanalnaje abjadnańnie» Maryn Le Pen taksama dało zrazumieć, što pakul hatova supracoŭničać z novym premjeram.

A voś Žan-Luk Miełanšon z radykalna levaj partyi «Niepakornaja Francyja» pryznačeńniem Lekorniu nie ŭražany: jon ličyć, što ničoha nie źmianiłasia, a Makronu para sychodzić z pasady prezidenta. Miełanšon užo papiaredziŭ, što jaho partyja pastavić na hałasavańnie pytańnie ab daviery novamu ŭradu.

• 4
• 0
• 0
• 3
• 3
• 0
• 0
• 0