Kučynski: Padčas vizitu Cichanoŭskaj u Armieniju biełaruskija ŭłady sprabavali zadziejničać miechanizmy mižnarodnaha vyšuku
Vizit Śviatłany Cichanoŭskaj u Armieniju na samit Jeŭrapiejskaj palityčnaj supolnaści, jaki prajšoŭ 4—5 maja, byŭ pad pahrozaj zryvu. Jak raskazaŭ «Lusterku» dypłamatyčny daradca demakratyčnaj lidarki Dzianis Kučynski, biełaruskija ŭłady sprabavali vykarystać biurakratyčnyja miechanizmy i miždziaržaŭny vyšuk, kab nie dapuścić jaje ŭdziełu ŭ forumie.
Pa słovach Dzianisa Kučynskaha, pieršapačatkova delehacyja płanavała vylecieć u Armieniju z Varšavy ŭ subotu, 2 maja, kab užo ŭ niadzielu być na miescy razam z bolšaściu suśvietnych lidaraŭ. Adnak u apošni momant płany źmianilisia z-za zaprašeńnia ad prezidenta Polščy Karala Naŭrockaha ŭziać udzieł u cyrymonii ŭznaharodžańnia Andreja Pačobuta. Vylet pieranieśli na viečar niadzieli.
«Azirajučysia nazad, možna skazać, što hetaje rašeńnie šmat u čym pajšło nam na karyść. Tamu što mienavita ŭ apošni momant pačalisia ruchi z boku režymu Łukašenki. Hetyja dziejańni byli nie adkrytymi, a vielmi charakternymi dla ich — praź biurakratyčnyja miechanizmy i złoŭžyvańnie miždziaržaŭnym vyšukam», — raskazaŭ Kučynski.
Pa słovach daradcy demakratyčnaj lidarki, aficyjny Minsk vyrašyŭ vykarystać miechanizmy miždziaržaŭnaha vyšuku dla zatrymańnia Cichanoŭskaj i jaje delehacyi. Ź mierkavańniaŭ biaśpieki Kučynski admoviŭsia raskazać, jakim byŭ adkaz na heta z armianskaha boku.
«My atrymali mocnyja zapeŭnivańni na samym vysokim dziaržaŭnym uzroŭni, što ŭsio budzie arhanizavana naležnym čynam. Armianie zrabili ŭsio biezdakorna: pratakolny pryjom, dziaržaŭnaja achova i kaardynacyja — usio było arhanizavana na vielmi vysokim prafiesijnym uzroŭni. Było bačna, što heta sapraŭdnaja palityčnaja pazicyja krainy», — adznačyŭ Kučynski.
Pavodle jaho słoŭ, z-za pieranosu rejsa i dadatkovaha dnia ŭ Varšavie ŭ kamandy Cichanoŭskaj źjaviłasia bolš času na padrychtoŭku, što dazvoliła «spakojna pierapravieryć usie detali, prapracavać usie scenary, uzhadnić usie pytańni biaśpieki i pierakanacca, što nijakich siurpryzaŭ užo nie budzie».
«Pazicyja Armienii była vielmi pryncypovaj. Jana pryniała Śviatłanu Cichanoŭskuju. I heta byŭ vielmi mocny sihnał. Heta čarhovy dokaz taho, što Łukašenka ŭsio jašče drenna razumieje, z kim maje spravu. Jon dahetul dumaje, što Śviatłanu možna zapałochać ci prymusić admovicca ad niejkich krokaŭ. Jana vydatna razumieje ryzyki, ale nie dazvalaje strachu vyznačać svaje rašeńni», — zajaviŭ Kučynski.
Daradca prezidenta Polščy prakamientavaŭ zvarot Kaleśnikavaj i Zołatavaj: Łukašenka vypuskaje niekalki dziasiatkaŭ viaźniaŭ, a na nastupny dzień zatrymlivaje novych2121
Kamientary