Naŭsieda: Prysutnaść vojskaŭ ZŠA ŭ Litvie nie zaležyć ad adnosin ź Minskam
«Ja nie baču nivodnaj pryčyny zmahacca za admienu sankcyj suprać Biełarusi ŭ Jeŭrapiejskaj radzie ci inšych farmatach», — skazaŭ prezident Litvy.
Prezident Litvy zajaviŭ, što nikoli nie atrymlivaŭ sihnałaŭ, što prysutnaść amierykanskich vojskaŭ u krainie moža być zaležnaj ad palapšeńnia adnosin ź Biełaruśsiu, piša LRT.
«Ja nikoli i ni ŭ jakim miescy nie čuŭ takoj umovy: albo vy siabrujecie ź biełarusami, albo ŭ vas tut nie budzie amierykanskich sałdat. (…) Nichto navat nie aśmieliŭsia b skazać takoje Litvie», — zajaviŭ kiraŭnik dziaržavy ŭ čaćvier u efiry prahramy «Tema dnia» na telekanale LRT.
Takim čynam prezident prakamientavaŭ mahčymy vizit śpiecpasłańnika ZŠA pa Biełarusi Džon Koŭł i śćviardžeńni ab tym, što Vilni nieabchodna adnavić adnosiny ź Minskam i razhledzieć pytańnie ab admienie sankcyj na tranzit uhnajeńniaŭ.
U sakaviku Koŭł zaklikaŭ Vilniu pravieści sustreču ź biełaruskim bokam na ŭzroŭni vice-ministraŭ. Raniej jon naviedaŭ Biełaruś, dzie sustreŭsia z Alaksandram Łukašenkam. Paśla hetaha vizitu Minsk vyzvaliŭ kala 250 palitviaźniaŭ, a Vašynhton častkova źniaŭ sankcyi.
«Usio, što robić spadar Koŭł i administracyja ZŠA ŭ śfiery pravoŭ čałavieka, nie moža nie padabacca, bo heta vyzvaleńnie ludziej. Ludziej, jakija pieražyvajuć nieabsiažnyja — i maralnyja, i fizičnyja — pakuty ŭ turmach Łukašenki. Ich vyzvaleńnie — dobraja navina, niachaj heta buduć hramadzianie Litvy, Polščy ci sami biełaruskija zmahary za svabodu. Heta pazityŭny praces, jaki my vitajem i budziem vitać», — skazaŭ Naŭsieda.
Adnak prezident padkreśliŭ, što prajaŭlenaja Minskam dobraja vola ŭ pytańni palitviaźniaŭ nie mianiaje pazicyju Litvy adnosna sankcyj.
«Što datyčycca admieny sankcyj, to tut nie treba być rašučym abo nierašučym. Jość całkam vidavočnaja pravavaja realnaść: nichto nie zmoh by admianić hetyja sankcyi navat pry vialikim žadańni, bo jany praciahnutyja na najbližejšyja 12 miesiacaŭ, inakš nie budzie», — akcentavaŭ Naŭsieda.
«Ja nie baču nivodnaj pryčyny zmahacca za admienu sankcyj suprać Biełarusi ŭ Jeŭrapiejskaj radzie ci inšych farmatach. Usio zastajecca ŭ sile, akramia humanitarnaha aśpiektu i, treba pryznać, svojeasablivaha flirtu Łukašenki z ZŠA. Inšych pazityŭnych zruchaŭ ja nie baču — ni ŭ pytańni (kantrabandnych pavietranych) šaroŭ, ni ŭ pytańni nielehalnaj mihracyi, ni ŭ pytańni ŭdziełu Biełarusi ŭ vajnie Rasii suprać Ukrainy», — dadaŭ kiraŭnik litoŭskaj dziaržavy.
Prezident adznačyŭ, što ŭ vypadku sustrečy z Koŭłam jon maje namier «maksimalna realistyčna» rastłumačyć, što susiedniaja dziaržava pa-raniejšamu ŭzmacniaje situacyju ź biaśpiekaj u rehijonie.
Ciapier čytajuć
«Hałandski architektar», jaki adbudavaŭ Vostruju bramu i pastaviŭ sabie dom-krepaść u Hajciuniškach, akazaŭsia nijakim nie hałandcam. Ale jaho spadčyna zachaplaje1010
Kamientary