Biełaruska ŭ 21 hod stała dyrektarkaj kramy. Jak joj heta ŭdałosia?
Darja Žaškievič stała dyrektarkaj kramy «Kapieječka» ŭ 21 hod. Dziaŭčyna za karotki čas dabiłasia uražlivaha karjernaha rostu — ad kasirki da kiraŭnicy. Jak joj heta ŭdałosia, daviedałasia vydańnie Blizko.by.
Jašče ŭ škole Darja była ŭpeŭnienaja, što choča stać ekanamistkaj. Pakul jana išła da svajoj mary, uładkavałasia kasirkaj u kramu «Dabranom». Spačatku heta była prosta padpracoŭka na leta, potym pieršaje miesca pracy paśla kaledža. Siońnia Darja ŭžo kiruje kramaj «Kapieječka» ŭ Aksakaŭščynie.
«Jašče ŭ škole dapamahała nastaŭnikam z papierkami»
Darji zaŭsiody padabałasia papiarovaja praca:
«Ja kali ŭ škole vučyłasia, dapamahała nastaŭnikam z papierkami važdacca: śpisy skłaści, pravieryć listočki. I mnie tak chaciełasia pracavać ekanamistkaj: uvieś čas niešta ličyć».
Školnica šmat čytała pra prafiesiju ŭ internecie i była ŭpeŭnienaja, što z vybaram nie pamylicca. Paśla zakančeńnia škoły jana adrazu padała dakumienty ŭ Minski finansava-ekanamičny kaledž. A pakul čakała vynikaŭ, vyrašyła znajści padpracoŭku.
Na toj momant ciotka Darji pracavała ŭ kramie «Dabranom» u Rakavie staršaj kasirkaj. Jana prapanavała abituryjentcy papracavać «na kasie». Tak ZAT «Dabranom» (apieratar handlovych sietak «Kapieječka», «Majak» i «Dabranom») stała dla Dašy pieršym miescam pracy. Hrošy, zaroblenyja za dva miesiacy, dziaŭčyna adkłała na navučańnie ŭ aŭtaškole.
«Mianie tak ciopła pryniali. Ja pasiabravała z usimi rabotnikami. Asabliva dobryja adnosiny ŭ mianie skłalisia z dyrektarkaj, Alenaj Ivanaŭnaj», — z nastalhijaj uspaminaje toj čas Darja.
Nastupiła vosień, pačałasia vučoba ŭ kaledžy. Viedy, atrymanyja na praktycy, dapamahali razabracca ŭ teoryi. A na letnich kanikułach Alena Ivanaŭna prapanavała studentcy znoŭ papracavać u kramie kasirkaj. Dziaŭčyna była radaja viarnucca ŭ «svoj pieršy pracoŭny kalektyŭ» i pryniała prapanovu.
Nie z papierkami ŭ ofisie, a ŭ kramie ź ludźmi
Vučoba ŭ kaledžy pralacieła niezaŭvažna. Ciapier treba było dumać nie tolki pra časovuju padpracoŭku, a vyznačacca z pastajannym miescam pracy.
Daša stała aktyŭna šukać pracu pa śpiecyjalnaści, ale ničoha nie atrymlivałasia. Na dapamohu pryjšoŭ «Dabranom»:
«Alena Ivanaŭna kaža: davaj ty ŭ nas pakul papracuješ, a kali znojdzieš niešta svajo, to my ciabie adpuścim. Ja pahadziłasia», — raskazała dziaŭčyna.
Praź niekalki miesiacaŭ Darja nie tolki znajšła vakansiju, jakuju chacieła, ale i atrymała prapanovu pasprabavać siabie ŭ roli staršaj kasirki. Uzvažyŭšy ŭsie za i suprać, jana vyrašyła pakul adkłaści «pracu mary» i pasprabavać siabie na novaj pasadzie, jakaja bolš składanaja i lepš apłačvajecca.
U budučyni ŭ Darji budzie jašče adna sproba realizavać svaje dziciačyja mary i atrymanuju adukacyju. Trochi stamiŭšysia ad pracy namieśnicy dyrektarki (tak-tak, Darja doŭha nie siadzieła ŭ kasirach, a praciahvała raści), jana pojdzie pracavać buchhałtarkaj u niecharčovuju sietku kramaŭ. Ale, na jaje ździŭleńnie, chaj pracavać z papierkami i spakajniej, duša prasiła «pryhod». I dziaŭčyna viarnułasia ŭ «Dabranom»: u kramie ź ludźmi cikaviej.
«Mama, ja stała dyrektarkaj»
Pa natury Daša cikaŭny i aktyŭny čałaviek. U dziacinstvie svaju enierhiju dziaŭčyna nakiroŭvała ŭ tvorčaje rečyšča: zajmałasia tancami, hrała na cymbałach. U darosłym žyćci zajmacca hetym nie stała kali, tamu ŭsie svaje jakaści jana prajaviła na pracy:
«Ja zaŭsiody prasiła starejšych kaleh pakazać mnie što-niebudź jašče. Možna ja i tut pasprabuju, i tam? Kali ja pracavała staršaj kasirkaj, paralelna vyvučała abaviazki zahadčycy adździeła i navat sprabavała siabie ŭ hetaj roli — prymała tavar», — pryznajecca surazmoŭca.
Dyrektarka bačyła inicyjatyŭnaść maładoj supracoŭnicy. Adnak pasadu zahadčycy adździeła prapanavać nie mahła — nie było vakansij. Na toj momant u kramu patrabavaŭsia namieśnik dyrektarki, i Alena Ivanaŭna vyrašyła vyraścić jaho sama.
«Padčas adsutnaści dyrektara jaho namieśnik sustrakaje roznyja pravierki. Taksama jon pavinien pravilna raźličyć kolkaść tavaru, jaki treba zakazać u kramu. Tavaru nie pavinna być zanadta šmat ci zanadta mała. Spačatku było strašna, ale Alena Ivanaŭna mianie ŭsiamu navučyła», — pryznajecca Darja.
Daša i na pazicyi namieśnicy dyrektara pakazvała dobryja vyniki. Talenavituju namieśnicu nie mahli nie zaŭvažyć, tamu praz peŭny čas Darji pastupiła novaja, jašče bolš cikavaja prapanova — stać dyrektarkaj kramy.
«Mnie try razy prapanoŭvali pasprabavać siabie dyrektarkaj. Ale niejak strašna było: raptam nie spraŭlusia, raptam nie spracujusia ź ludźmi. Na treci raz ja zrazumieła, što heta los. Treba sprabavać!», — uspaminaje dziaŭčyna.
Tak ź listapada 2023 hoda (tady joj byŭ 21 hod) jana pracuje na pasadzie dyrektarki kramy «Kapieječka» ŭ vioscy Aksakaŭščyna.
Darja ŭspaminaje, jak padzialiłasia navinoj pra svajo pryznačeńnie ź siamjoj:
«Ja patelefanavała mamie. Było ŭžo pozna, napeŭna, hadzin z 10 viečara. I takaja ŭsia radasnaja kažu: mama, ja stała dyrektarkaj».
«Kali niechta z supracoŭnikaŭ zaniaty, idu dapamahać»
Darja pryznajecca: kali ŭpieršyniu jechała ŭ Aksakaŭščynu, u jaje treślisia ruki. Dziaŭčyna pieražyvała, jak usprymuć jaje, maładuju śpiecyjalistku, padnačalenyja. Da taho ž mnohija z rabotnikaŭ kramy byli biez vopytu — dyrektarka pavinna ŭsio rastłumačyć i pakazać.
Darji treba było zapuścić pieršuju sietkavuju kramu ŭ vioscy. U bujnych haradach, mahčyma, takaja padzieja nie vyklikała b ažyjatažu. Ale ŭ Aksakaŭščynie adkryćcia «Kapieječki» vielmi čakali. Dziaŭčynie chaciełasia apraŭdać čakańni miascovych žycharoŭ.
Adkryvać handlovy punkt dapamahała hrupa zapusku — heta kamanda śpiecyjalistaŭ, jakaja rasstaŭlaje tavary, nastrojvaje abstalavańnie, navučaje piersanał i sočyć, kab krama była całkam hatovaja da prychodu pieršych pakupnikoŭ. Taksama na suviazi zaŭsiody byli Alena Ivanaŭna i namieśnik rehijanalnaha kiraŭnika Pavieł Anatoljevič.
U vyniku ŭsio prajšło dobra. Z kalektyvam Daša spracavałasia: padnačalenyja ŭsprymajuć maładuju dziaŭčynu jak paŭnavartasnuju kiraŭnicu.
Joj užo davodziłasia samoj najmać supracoŭnikaŭ. Na sumoŭi dziaŭčyna imkniecca zdabyć prychilnaść kandydata da siabie. A jašče pryznajecca, što akramia prafiesijnych navykaŭ vielmi šanuje ŭ ludziach spahadlivaść i sumlennaść. Najaŭnaść hetych jakaściaŭ dapamahaje być kamandzie kramy na adnoj chvali.
Ale samaje hałoŭnaje — dyrektarcy niama kali siadzieć na adnym miescy, zaŭsiody znojducca «pryhody». Mienavita heta bolš za ŭsio i padabajecca aktyŭnaj Dašy:
«U mianie krama maleńkaja i kamanda nievialikaja. Kali chtości z supracoŭnikaŭ zaniaty, idu dapamahać: dzieści na kasie pakupnika absłužu, dzieści mašynu prymu abo vystaŭlu tavar».
Pracesy adładžanyja
Być dyrektarkaj adkazna, ale Darji padabajecca. Ciapier užo ŭsie pracesy adładžanyja, pracujecca spakojna i biez fors-mažoraŭ.
Razvažajučy pra budučyniu, Darja kaža, što płanuje pracavać u kampanii «Dabranom» i dalej. A kali zachočacca raści, to, mahčyma, razhledzić jašče bolš «aktyŭnyja» pasady. Naprykład, dziaŭčyna vielmi chacieła b dapamahać dyrektaram pry zapusku novych kram, kansultavać ich pierad adkryćciom handlovaha punkta. Takija śpiecyjalisty pastajanna ŭ raźjezdach. Tamu Daša ŭžo źbiraje hrošy na ŭłasny aŭtamabil, kab stać na krok bližej da novaj mary.
«Nie prosta zapalvajem, a adradžajem tradycyju». Lichtarščyk z Bresta raskazaŭ pra mahiju śviatła, huzik na ŭdaču i staradaŭniuju muzyku
Biełaruska natchnialna raskazała, jak atrymała novuju prafiesiju ŭ Hiermanii paśla 45 hadoŭ
Hetych prafiesij nie zamienić štučny intelekt. Biełarusy mohuć lohka atrymać takuju adukacyju ŭ Jeŭropie
Ciapier čytajuć
Advakat Dźmitryj Lepretar raskazaŭ pra biełyja plamy ŭ spravie ab terakcie ŭ mietro13
Kamientary