Pad Homielem budujuć śvinakompleks, jaki stanie najbujniejšym u Biełarusi
U Homielskim rajonie, niahledziačy na marazy, praciahvajecca budaŭnictva samaha bujnoha ŭ Biełarusi śvinahadoŭčaha kompleksu, raźličanaha na 100 tysiač hałoŭ, paviedamlaje pres-słužba Homielskaha abłvykankama.
U miežach prajekta płanujecca ŭźvieści 26 fiermaŭ, dzie buduć utrymlivacca žyvioły. Budaŭnictva i prajektavańnie iduć paralelna. Usiaho praduhledžana vosiem čerhaŭ rabot, ź jakich piać užo raspracavanyja i prajšli nieabchodnuju ekśpiertyzu.
Budaŭnictva kompleksu pačałosia ŭ mai 2025 hoda. Kali raboty buduć iści pa płanie, zaviaršyć abjekt płanujuć u śniežni 2027 hoda. U Homielskim abłvykankamie adznačajuć, što hety śvinahadoŭčy kompleks źjaŭlajecca piłotnym dla krainy: pry jaho ŭźviadzieńni vykarystoŭvajucca sučasnyja technałohii, a prajekt prapracoŭvajecca da drobiaziaŭ.
Choć kompleks na 100 tysiač hałoŭ stanie najbujniejšym u Biełarusi, u śviecie isnujuć i značna bolšyja abjekty. Naprykład, u Kitai pabudavali 26‑paviarchovy śvinahadoŭčy kompleks u horadzie Ečžou, raźličany na vyroščvańnie da 1,2 miljona śviniej u hod.
Raniej Alaksandr Łukašenka daručyŭ uziać «pad žorstki kantrol» pytańnie niedastatkovych abjomaŭ vytvorčaści śvininy ŭ krainie. Pry hetym u pieršym kvartale 2025 hoda Biełaruś uvajšła ŭ lik najbujniejšych pakupnikoŭ rasijskaj śvininy, nabyŭšy miasa na sumu kala 100 miljonaŭ dalaraŭ.
Kamientary