U Polščy raskazali padrabiaznaści pra vykrytaha špijona ŭ Ministerstvie abarony
Kiraŭnik Słužby vajskovaj kontrvyviedki Polščy, hienierał Jarasłaŭ Stružyk zajaviŭ, što zatrymańnie špijona, jaki doŭhi čas pracavaŭ u polskim Ministerstvie abarony, źjaŭlajecca biezumoŭnym pośpiecham śpiecsłužbaŭ. Pavodle jaho słoŭ, hety čałaviek mieŭ vielmi šyroki dostup da infarmacyi, čym moh być nadzvyčaj karysnym dla zamiežnych raźviedak, piša PAP.
Zatrymany — cyvilny supracoŭnik Ministerstva abarony, jaki pracavaŭ tam z 1990‑ch hadoŭ i zajmaŭ pasady ŭ roznych stratehična važnych padraździaleńniach, źviazanych z abaronnym płanavańniem i mižnarodnaj biaśpiekaj. U jaho byŭ dostup da sakretnych materyjałaŭ, a apošniuju pravierku biaśpieki jon prachodziŭ u 2021 hodzie.
U minułuju sieradu mužčynu aficyjna vystavili abvinavačańnie ŭ špijanažy na karyść adnoj ź dziaržaŭ «uschodniaha napramku». Sud aryštavaŭ jaho na try miesiacy, a za takoje złačynstva ŭ Polščy pahražaje ad 8 hadoŭ turmy da pažyćciovaha źniavoleńnia.
Hienierał Stružyk padkreśliŭ, što heta pieršy vypadak prymianieńnia ŭzmocnienych normaŭ polskaha Kryminalnaha kodeksa, uviedzienych u 2023 hodzie, što śviedčyć pra surjoznaść spravy. Jon taksama adznačyŭ, što zdrada dziaržavie mahčymaja ŭ lubym uzroście: padazravany pracavaŭ u Ministerstvie abarony niekalki dziesiacihodździaŭ, udzielničaŭ u mižnarodnych kanfierencyjach, časta vyjazdžaŭ za miažu i mieŭ šyrokija kantakty, u tym liku z vysokapastaŭlenymi asobami.
Kiraŭnik SKV admoviŭsia raskryvać, kolki času padazravany moh zajmacca špijanažam, bo heta častka sakretnaha śledstva, jakoje viadzie prakuratura i Ahienctva ŭnutranaj biaśpieki. Jon taksama raskrytykavaŭ sproby źmienšyć značeńnie spravy abo śćviardžać, što špijona nibyta vykryli vypadkova, padkreśliŭšy, što za zatrymańniem stajała doŭhaja i składanaja praca apieratyŭnikaŭ i analitykaŭ.
Pavodle słoŭ hienierała, ciapier pravodzicca detalovy analiz mahčymych strat dla biaśpieki krainy i vyvučajucca ŭsie nośbity infarmacyi, jakimi karystaŭsia padazravany. Nie vyklučajecca i vierahodnaść taho, što jon moh być častkaj bolš šyrokaj špijonskaj sietki.
Naprykancy Stružyk zajaviŭ, što Słužba vajskovaj kontrraźviedki ciapier pracuje bolš efiektyŭna, maje razhalinavanuju strukturu pa ŭsioj krainie i dziejničaje prafiesijna, a nie pa palityčnaj zamovie. Najbližejšym časam jon maje namier pradstavić zakrytuju infarmacyju pra hetu spravu parłamienckaj kamisii pa śpiecsłužbach.
Pra toje, što ŭ Varšavie zatrymali supracoŭnika Ministerstva abarony Polščy, jakoha padazrajuć u špijanažy, stała viadoma 3 lutaha z paviedamleńnia samoha viedamstva. Zatrymańnie adbyłosia niepasredna ŭ budynku ministerstva.
U Varšavie za pracu na rasijskuju raźviedku zatrymali supracoŭnika Minabarony Polščy
Biełarus, jaki vajavaŭ za Ukrainu, raspavioŭ, čym jaho začaravała kachanka Ina Kardaš, ahientka KDB
Ahientka Kardaš vykarystoŭvała seks, kab źbirać infarmacyju pra kalinoŭcaŭ i zavierbavać ukrainskaha kamandzira. A kurataru KDB pisała pra jaho: «Moj łoch»
Ciapier čytajuć
Śpievaka z «Marafonu adzinstva» asudzili za palityku — pryhadali kamientary 2020-ha. Baranić u sud jaho chadzili siostry Hruździevy15
Kamientary