Cichaja vajna za śviadomaść. Jak Rasija chavaje svaju prapahandu za asabistymi historyjami
U svajoj hibrydnaj vajnie suprać zachodniaha śvietu Rasija aktyŭna vykarystoŭvaje zamiežnych błohieraŭ i influensieraŭ dla farmavańnia stanoŭčaha vobrazu krainy ŭ Jeŭropie i inšych zachodnich krainach. Pad vyhladam łajfstajł-kanałaŭ, padarožžaŭ ci asabistych historyj hetyja płatformy pieradajuć hledačam uražańnie, što ŭ Rasii panujuć spakoj, stabilnaść i «narmalnaje žyćcio», zamoŭčvajučy vajnu, akupacyju i vajennyja złačynstvy. Heta častka šyrokaj infarmacyjnaj stratehii Kramla, jakaja dziejničaje pa-za tradycyjnymi kanałami prapahandy, piša polskaje vydańnie Onet.pl.
Prajekt Russian Road («Ruski šlach») vyhladaje jak zvyčajny kanał na YouTube pra łajfstajł, dzie zamiežnyja błohiery dzielacca svaim dośviedam žyćcia ŭ Rasii, raskazvajuć pra štodzionnaje žyćcio, siamju, nizkija ceny, tradycyi, relihiju i inšyja aśpiekty «narmalnaha» žyćcia.
Na pieršy pohlad heta moža zdavacca asabistymi historyjami ludziej, jakija pierajechali ŭ Rasiju, adnak na samaj spravie heta častka sistemnaj infarmacyjnaj apieracyi, nakiravanaj na farmavańnie stanoŭčaha vobrazu Rasii ŭ zachodnich krainach, zamoŭčvańnie vajny, akupacyi i vajennych złačynstvaŭ.
Russian Road dziejničaje pa-za tradycyjnymi kanałami prapahandy i vykarystoŭvaje asabistyja historyi i pierśpiektyvu inšaziemca, kab abyjści niedavier zachodniaj aŭdytoryi da Kramla i ŭździejničać na emocyi, a nie na ćviarozaje myśleńnie.
Siarod błohieraŭ, jakija aktyŭna prapahandujuć na Zachadzie rasijski paradak dnia, vyłučajucca niekalki klučavych asob.
Amierykaniec Tafuryjas Krejn (Tofurious Crane) pierajechaŭ u Rasiju, kab «šukać praŭdu» i pakazvać žyćcio ŭ krainie z amierykanskaj pierśpiektyvy.
Jon supracoŭničaŭ z RT i naviedvaŭ harady, zaniatyja rasijskimi vojskami na ŭschodzie Ukrainy, u tym liku Maryupal i Danieck, dzie ŭdzielničaŭ u stvareńni dakumientalnych filmaŭ, jakija pradstaŭlajuć hetyja terytoryi biez kantekstu vajny.
Krejn nasiŭ simvoliku Z, nazyvaŭ ukraincaŭ «nacystami» i «terarystami», braŭ intervju ŭ pałonnych z bataljona «Azoŭ», kažučy adnamu ź ich, što «Rasija pieramoža, Boh pieramoža». Jon taksama raspaŭsiudžvaŭ dezynfarmacyju, śćviardžajučy, što cyvilnych zabivajuć nibyta ŭkraincy, choć isnujuć dakumienty, jakija śviedčać pra ŭdzieł rasijskich sił.
Amierykanka z rasijskimi karaniami Alaksandra Džost (Alexandra Jost), viadomaja jak Sasha Meets Russia, pierajechała ŭ Maskvu ŭ 2022 hodzie i viadzie błoh, u jakim pakazvaje Rasiju jak biaśpiečnuju, stabilnuju, siamiejna-aryjentavanuju i «narmalnuju» krainu.
Jana imkniecca «zachapić aŭdytoryju» i zrabić tak, kab ludzi «zakachalisia ŭ Rasiju», padkreślivaje tradycyjnyja kaštoŭnaści i biaśpieku, iranizuje nad sankcyjami, pakazvajučy, nibyta jany nie ŭpłyvajuć na paŭsiadzionnaje žyćcio.
Džost aktyŭna ŭdzielničaje ŭ palityčnaj kamunikacyi, śviatkuje dzień naradžeńnia Pucina, krytykuje Zachad i abvinavačvaje jaho ŭ vajnie. Razam z mužam, mieksikanskim pradprymalnikam Daminha Harsija, jana znachodzicca ŭ centry sietki zamiežnych błohieraŭ, jakija prasoŭvajuć Rasiju za miažoj.
Inšaja viadomaja błohierka — Alina Lip (Alina Lipp), rasijanka, jakaja naradziłasia ŭ Hiermanii. Jana ŭździejničaje na niamieckamoŭnuju aŭdytoryju i z 2016 hoda pracuje ŭ Krymie, publikujučy dakumientalnyja materyjały pra žyćcio paśla akupacyi.
Jana stvaryła kanał Glücklich auf der Krim («Ščaślivyja ŭ Krymie») i inšyja dakumientalnyja filmy pra Krym i Danbas, dzie pakazvaje vajnu jak vynik nibyta ŭkrainskaj ahresii, zamoŭčvajučy rolu rasijskich vojskaŭ. Lip maje kanał na Telegram Neues aus Russland z bolš jak 170 tysiačami padpisčykaŭ, publikuje kantent na niamieckaj i ruskaj movie, a taksama raspaŭsiudžvaje materyjały ŭ alternatyŭnych i prarasijskich miedyja.
Za ŭsimi hetymi błohierami staić skaardynavanaja struktura, jakaja ŭklučaje prafiesijny PR i prapahandu, padtrymlivajecca dziaržavaj.
Klučavoj fihuraj źjaŭlajecca 30‑hadovaja Maryja Dudkova, kiraŭnica PR-ahienctva «Biezhraničnyje», jakaja kantraluje vytvorčaść materyjałaŭ, prasoŭvańnie ŭ sacsietkach i adpaviednaść kantentu aficyjnaj prapahandzie Kremla. Dudkova amal niabačnaja ŭ siecivie, ale maje vialiki ŭpłyŭ na toje, što traplaje za miažu, kirujučy sotniami błohieraŭ.
Meta sietki zachodnich błohieraŭ — stvaryć stanoŭčy vobraz Rasii jak krainy ź biaśpiečnym i stabilnym žyćciom, zamoŭčvać vajnu i akupacyju, upłyvać na emocyi zachodniaj aŭdytoryi i ŭmacoŭvać rasijski ŭpłyŭ u Jeŭropie praz «cichuju vajnu za śviadomaść». Pad vyhladam asabistych historyj i łajfstajł-kanałaŭ Kreml praciahvaje prasoŭvać prapahandu.
«Rasija padobnaja da vady». Jak rasijskaja prapahanda nieprykmietna zavajoŭvaje aŭdytoryju ŭ Afrycy i Łacinskaj Amierycy
Pierad vybarami ŭ Čechii ŭ tyktoku aktyvizavalisia sotni prarasijskich akaŭntaŭ z šalonaj papularnaściu
Za Rasiju va Ukrainie vajujuć tysiačy najmitaŭ ź jak minimum paŭsotni krain śvietu. Chto jany?
Instahram zabłakavaŭ miedyja pra Varšavu, jakoje stvaryli biełarusy. Aficyjnaja pryčyna — skarhi na post ab rasijskaj prapahandzie
Kamientary