Biełaruskaha narkamana aryštavali ŭ Rasii. Kab nie pasadzili ŭ turmu, daviałosia achviaravać na vajnu

Leninski rajonny sud Sankt-Pieciarburha vynies prysud hramadzianinu Biełarusi Alehu Piatrašku, jakoha zatrymali z narkotykami prosta na vulicy. Jon paźbiehnuŭ realnaha pakarańnia — siarod akaličnaściej, jakija sud uličyŭ u jaho karyść, akazalisia achviaravańni «Rasijskamu fondu dapamohi armii» i list z udziačnaściu ad hetaj struktury.

Piatrašku zatrymali 15 krasavika 2025 hoda kala doma na vulicy ŭ Pieciarburhu — jon stajaŭ, abłakaciŭšysia na budynak, kali da jaho padyšli supracoŭniki palicyi i paprasili dakumienty. Mužčynu dastavili ŭ adździaleńnie, dzie jon sam dastaŭ z pravaj kišeni džynsaŭ pakiecik z rečyvam i patłumačyŭ, što heta «hašyš», jaki jon nabyŭ dla ŭłasnaha ŭžyvańnia.

Ekśpiertyza pakazała, što nasamreč heta byŭ nie hašyš, a sumieś ź sintetyčnym narkotykam MDMB(N)-2201 — vytvornym ad mietyłavaha efiru, jaki ŭvachodzić u rasijski śpis zabaronienych rečyvaŭ. Masa rečyva — 0,86 hrama — pa rasijskim zakanadaŭstvie kvalifikujecca jak bujny pamier, što adpaviadaje častcy 2 artykuła 228 Kryminalnaha kodeksa Rasii (niezakonnaje zachoŭvańnie narkotykaŭ biez mety zbytu).

Na dopycie Piatraška raskazaŭ, što ŭpieršyniu pasprabavaŭ narkotyki ŭ 2024 hodzie praz «składanyja žyćciovyja abstaviny» i zakazvaŭ ich praz telehram-kanał z zakładkami. U dzień zatrymańnia jon kupiŭ hram «hašyšu».

Paśla taho jak zabraŭ zakładku kala adnaho z damoŭ, častku rečyva jon užyŭ adrazu, a reštu pakłaŭ u kišeniu — i adčuŭ siabie kiepska, zrazumieŭšy, što nabyŭ zusim nie toje, na što raźličvaŭ.

Piatraška poŭnaściu pryznaŭ vinu, i mienavita heta, a taksama šerah inšych akaličnaściej, stali padstavaj dla niezvyčajna miakkaha prysudu. Siarod źmiakčalnych faktaŭ, jakija pieraličyŭ sud: małady ŭzrost padsudnaha, chraničnaja chvaroba serca, namier ažanicca z hramadziankaj Rasii, stanoŭčyja charaktarystyki ad siabroŭ i susiedziaŭ u Biełarusi, hramaty za spartyŭnyja dasiahnieńni — i achviaravańni ŭ dabračynnyja fondy. Pobač z fondam «Humanitarnaje dziejańnie», jaki dapamahaje narkaspažyŭcam i zajmajecca prafiłaktykaj VIČ i hiepatytu, i fondam «Aloša», sud asobna zhadaŭ udziačny list ad «Rasijskaha fondu dapamohi armii».

Spałučeńnie hetych akaličnaściej sud pryznaŭ vyklučnym i pryznačyŭ pakarańnie nižej za minimalny paroh, ustanoŭleny sankcyjaj artykuła (zvyčajna ad troch da dziesiaci hadoŭ pazbaŭleńnia voli). U vyniku Piatrašku prysudzili ŭsiaho siem miesiacaŭ źniavoleńnia — termin, jaki jon užo całkam adsiedzieŭ u SIZA.

• 2
• 0
• 2
• 2
• 0
• 0
• 0
• 0