Cichanoŭski vystupiŭ u Kanhresie ZŠA

Ciapier isnujuć «tolki try realnyja šlachi» vyzvaleńnia palitviaźniaŭ, jakija zastajucca ŭ zakładnikach Alaksandra Łukašenki: «zamiežnaja vajskovaja interviencyja, vyvaz ich za miažu ŭ abmien na što-niebudź abo prymusovaja dypłamatyja, jakuju pravodzić prezident ZŠA Donald Tramp».

Takoje mierkavańnie vykazaŭ Siarhiej Cichanoŭski 3 lutaha na słuchańniach pa situacyi z pravami čałavieka ŭ Biełarusi ŭ Kamisii pa pravach čałavieka Toma Łantasa ŭ Kanhresie ZŠA. Były biełaruski palitviazień vystupiŭ u jakaści adnaho sa śviedak, piša «Pozirk».

Pry hetym jon paviedamiŭ, što padtrymlivaje treci varyjant.

Pavodle słoŭ Cichanoŭskaha, Tramp patrebny Łukašenku našmat bolš, čym Łukašenka patrebny Trampu, što daje amierykanskaj administracyi «vielizarny ryčah cisku» na biełaruskaha dyktatara, jaki eks-palitviazień zaklikaŭ vykarystoŭvać mudra.

Jak zajaviŭ Cichanoŭski, Łukašenka handluje z Vašynhtoham nie tolki zakładnikami, ale i aktyŭna sprabuje pryciahnuć amierykanski biznes da biełaruskich nacyjanalnych avijalinij, u kalijnuju halinu i atamnuju enierhietyku. Jon taksama źviarnuŭ uvahu na aktyŭnyja sproby Łukašenki adyhrać rolu pasiarednika ŭ stasunkach pamiž ZŠA i Rasijaj.

Z ulikam usich zhadanych faktaraŭ, na dumku pramoŭcy, pry najaŭnaści palityčnaj voli Vašynhtona možna nie tolki damahčysia ad Łukašenki vyzvaleńnia ŭsich zakładnikaŭ režymu, ale i nastajać na spynieńni palityčnych represij.

Jon taksama adznačyŭ, što maje «dadatkovyja rekamiendacyi», jakija chacieŭ by abmierkavać «u pryvatnym paradku, niepublična».

«Ja prašu vas ab adnoj rečy: kali łaska, nie spyniajciesia. Vy ŭžo vyratavali lekaraŭ, palitykaŭ, błohieraŭ i navat łaŭreata Nobieleŭskaj premii miru Alesia Bialackaha, ale bolš za 1.100 čałaviek zastajucca ŭ źniavoleńni», — źviarnuŭsia Cichanoŭski da pradstaŭnikoŭ ZŠA.

Śviedka taksama raspavioŭ pra ŭmovy svajho ŭtrymańnia ŭ miescach pazbaŭleńnia voli, asobna padziakavaŭšy amierykanskamu boku za vyzvaleńnie.

Cichanoŭski adznačyŭ, što ŭ źniavoleńni ŭ Biełarusi znachodziacca ludzi, jakich, jak jon vykazaŭsia, Łukašenka chavaje ad amierykanskaha boku i «nie pahodzicca vyzvalić pry lubych abstavinach». Da ich jon adnios byłych sudździaŭ, śledčych, aficeraŭ słužbaŭ biaśpieki, jurystaŭ i čynoŭnikaŭ, jakich Łukašenka ličyć zdradnikami. Pavodle słoŭ eks-palitviaźnia, takija ludzi ŭtrymlivajucca ŭ najbolš ciažkich umovach i «padviarhajucca samym brutalnym katavańniam».

Pry hetym Cichanoŭski nazvaŭ imia adnaho ź ich — byłoha aficera śpiecsłužbaŭ Uładzimira Knihu, jakoha varta «vyratavać jak maha chutčej, kali jon jašče žyvy».

Viadučy słuchańniaŭ, člen Pałaty pradstaŭnikoŭ Kanhresa ZŠA ad Respublikanskaj partyi Krystafier Śmit, adkryvajučy mierapryjemstva, u liku inšaha zajaviŭ, što ŭłady ZŠA (adrozna ad ich prezidenta Donalda Trampa) nie pryznajuć Łukašenku lehitymnym prezidentam Biełarusi (adrozna ad Donalda Trampa).

Budučy inicyjataram i asnoŭnym aŭtaram čatyroch redakcyj Akta ab demakratyi ŭ Biełarusi, Śmit vykazaŭ upeŭnienaść, što Kanhres prymie i raspracavanuju im piatuju redakcyju dakumienta, jaki byŭ upieršyniu pryniaty ŭ 2004 hodzie i abnaŭlaŭsia ŭ 2006, 2011 i 2020 hadach.

Kamisija pa pravach čałavieka Toma Łantasa (Tom Lantos Human Rights Commission) — dvuchpartyjnaja kamisija pa pravach čałavieka pry Pałacie pradstaŭnikoŭ Kanhresu ZŠA.

Jana sočyć za situacyjaj z pravami čałavieka ŭ roznych krainach, pravodzić adpaviednyja słuchańni i bryfinhi, daje rekamiendacyi amierykanskim zakanadaŭcam i ŭradavym strukturam.

Akramia Siarhieja Cichanoŭskaha ŭ jakaści śviedak na słuchańniach 3 lutaha vystupili daradca Śviatłany Cichanoŭskaj pa dypłamatyčnych pytańniach Dzianis Kučynski, kiraŭnik litoŭskaha ofisa pravaabarončaj arhanizacyi Freedom House Vicis Jurkonis i mižnarodny juryst pa pravach čałavieka z ZŠA Jaźmin D. Kemieran.

• 8
• 0
• 0
• 1
• 0
• 0
• 0
• 0