Čatyrochhadovy chłopčyk staŭ śviedkam žorstkaha zabojstva maci. Praz 20 hadoŭ jon uspomniŭ detali — zabojca pakarany

Jak uspaminy mužčyny, jaki, budučy małym dziciem, staŭ śviedkam žorstkaha zabojstva maci, dapamahli raskryć złačynstva 20‑hadovaj daŭniny. Padrabiaznaści raspaviali ŭ Śledčym kamitecie.

Praz dva dziesiacihodździ paśla trahiedyi ŭ Mahilovie śledstvu ŭdałosia adnavić karcinu zabojstva 27‑hadovaj žycharki abłasnoha centra. Mužčyna, jakoha ŭ 2005 hodzie sud apraŭdaŭ pa abvinavačvańni ŭ hetym žorstkim złačynstvie, pryhavorany da 16 hadoŭ pazbaŭleńnia voli.

Adnaŭleńniu kryminalnaj spravy minułych hadoŭ paspryjali inavacyjnyja śledčyja mietady i pakazańni hałoŭnaha śviedki — syna zabitaj, jaki straciŭ u tuju strašnuju noč samaha blizkaha čałavieka. Tady jamu było ŭsiaho 4 hady.

Usio pačałosia z bytavoha kradziažu: u lutym 2005 hoda 24‑hadovy žychar Mahilova, jaki pracavaŭ u pryvatnaha pradprymalnika, skraŭ u najomnika elektradryl. Kali prapaža vyjaviłasia, haspadar zapatrabavaŭ pakryć škodu. Nie majučy hrošaj, małady čałaviek vyrašyŭ vyprasić adterminoŭku.

Viedajučy kruty noraŭ pracadaŭcy, jon adpraviŭsia dla pieramoŭ da jaho žonki, pakul haspadar byŭ u adjeździe. Hety vizit staŭ fatalnym.

Pa pieršapačatkovaj viersii śledstva, žančyna, nazvaŭšy hościa złodziejem, pasprabavała vyšturchnuć jaho z kvatery. Pamiž imi ŭspychnuła svarka, u zapale jakoj mužčyna schapiŭ kuchonny nož i nanios žančynie mnostva ŭdaraŭ, u tym liku śmiarotny — prosta ŭ serca.

U susiednich pakojach u hety čas znachodzilisia dvoje jaje małaletnich synoŭ: małodšamu nie było i hoda, starejšamu ŭsiaho čatyry. Sprabujučy zamiaści ślady, fihurant insceniravaŭ rabavańnie, raskidaŭšy rečy z šaf, i źbieh, zabraŭšy z saboj tolki fotaaparat, jaki paźniej vykinuŭ u raku.

Niahledziačy na toje, što padazravany spačatku va ŭsim pryznaŭsia, na sudzie jon kardynalna źmianiŭ svaje pakazańni.

Jon zajaviŭ, što, pryjšoŭšy ŭ kvateru, užo zaśpieŭ haspadyniu miortvaj. U 2005 hodzie sud paličyŭ hetuju viersiju pierakanaŭčaj i vynies apraŭdalny prysud pa spravie ab zabojstvie, pryznaŭšy mužčynu vinavatym tolki va ŭčynieńni majomasnaha złačynstva.

Pavarotnym momantam u adnoŭlenym rasśledavańni kryminalnaj spravy stali pakazańni ciapier užo darosłaha syna zahinułaj. Budučy 4‑hadovym dziciem, jon čuŭ i bačyŭ praz uzorystaje ryflonaje škło dźviarej, što adbyvałasia ŭ susiednim pakoi. Dla dapamohi śviedku ŭ adnaŭleńni detalaŭ trahičnaha viečara śledčyja źviarnulisia da śpiecyjalista-psichołaha, jaki ŭžyŭ mietad aktyvizacyi pamiaci.

Dziakujučy hetamu mietadu śviedka zmoh detalova ŭznavić padziei taho viečara: spakojnuju razmovu maci z hościem, rezki pierachod taho na kryk, huki baraćby i zatym — žudasnuju cišyniu. Jon apisaŭ, jak mužčyna paśla raspravy abyšoŭ usie pakoi, ubačyŭ śpiačych dziaciej. Chłopčyk zapomniŭ tvar zabojcy i jaho vysoki rost.

Samaj praniźlivaj detallu stali ŭspaminy śviedki ab tym, jak jon usiu noč prasiadzieŭ pobač ź ciełam maci, a pad ranicu, kali zapłakaŭ małodšy brat, zabraŭsia da jaho ŭ łožačak i zasnuŭ ź im.

Klučavym dokazam stali taksama pakazańni byłoha susieda abvinavačanaha pa kamiery. Jon raspavioŭ, što adrazu paśla zatrymańnia ŭ 2005 hodzie toj padrabiazna apisaŭ jamu ŭsie detali złačynstva, nie pakinuŭšy sumnievaŭ u svajoj datyčnaści.

U chodzie rasśledavańnia praviedzieny kompleks śledčych dziejańniaŭ, uklučajučy šmatlikija dopyty, vočnuju staŭku, śledčyja ekśpierymienty i sudovyja ekśpiertyzy. 

Dziejańni ciapier užo 45‑hadovaha fihuranta kvalifikavanyja pa troch artykułach KK: p.6 č.2 art.139 (zabojstva, ździejśnienaje z asablivaj žorstkaściu), č.3 art.159 (zaviedamaje pakidańnie ŭ niebiaśpiecy małaletnich), č.2 art.205 (vykradańnie majomaści, ździejśnienaje paŭtorna). 

Apošnija dva abvinavačańni byli źniatyja za skančeńniem terminu daŭnaści. Ale dla asabliva ciažkaha złačynstva termin daŭnaści nie skončyŭsia. Prysudam suda abvinavačanamu pryznačana kančatkovaje pakarańnie — 16 hadoŭ i 2 miesiacy z adbyvańniem pakarańnia ŭ papraŭčaj kałonii va ŭmovach uzmocnienaha režymu. Akramia taho, na karyść paciarpiełaha boku spahnana kampiensacyja maralnaj škody pamieram 250 tysiač rubloŭ.

• 0
• 1
• 0
• 2
• 1
• 4
• 2
• 0