Zima dla mnohich dziaciej — čas asablivych ekśpierymientaŭ. Siarod inšaha, dzieci ližuć ledziašy i kaštujuć śnieh. A što kaža sučasnaja navuka? Heta sapraŭdy niebiaśpiečna?
Kab razabracca ŭ hetym pytańni, žurnalisty niamieckaha vydańnia Tagesspiegel źviarnulisia da śpiecyjalista — mikrabijołaha i piedyjatra Jochanesa Forstera ź Instytuta hihijeny i mikrabijałohii Viurcburhskaha ŭniviersiteta.
Śpiecyjalist tłumačyć: asnoŭny šlach pieradačy virusaŭ i bakteryj, jakija vyklikajuć reśpiratornyja infiekcyi, — praz kropli i drabniutkija čaścinki vilhaci, što traplajuć u pavietra pry dychańni, razmovie abo kašli. Zaražeńnie praz pavierchni taksama mahčymaje, asabliva ŭ vypadku straŭnikava-kišačnych infiekcyj, takich, jak naravirus abo rotavirus.
Adnak, jak zapeŭnivaje Forster, imaviernaść taho, što dzieci sapraŭdy zaraziacca hetymi ŭzbudžalnikami chvarob, kali ližuć ledziašy abo jaduć śnieh, značna nižejšaja, čym pry kantakcie z ručkami ŭ škole abo poručniami ŭ hramadskim transparcie. Jašče vyšejšaja mahčymaść zaražeńnia — u dziciačych sadkach i škołach, dzie šmat ludziej i dzie ŭzbudžalniki lepš prystasavanyja da ŭmoŭ čałaviečaha arhanizma.
Zima ŭvohule niespryjalnaje asiarodździe dla mnohich patahienaŭ. Jak davodzić ekśpiert, pry tempieratury kala čatyroch hradusaŭ Celsija i nižej virusy inaktyvujucca chutčej, čym pry pakajovaj tempieratury, a prykładna praź dzień na choładzie jany amal całkam stračvajuć zdolnaść zaražać ludziej.
Bakteryi, jakija vyklikajuć infiekcyi dychalnych šlachoŭ, naprykład, streptakoki hrupy A, pry tempieraturach nižejšych za čatyry hradusy nie razmnažajucca, a z nula hradusaŭ, kali vada zamiarzaje, ich kletačnyja ścienki mohuć navat razburacca.
Adnak heta nie aznačaje, što baćki mohuć spakojna dazvalać dzieciam jeści ledziašy abo śnieh. Jochanes Forster kateharyčny: jon nie rekamienduje takija pačastunki, paraŭnoŭvajučy ich ź pićciom z łužyny.
Navat kali kłasičnyja ŭzbudžalniki chvarob adyhryvajuć druharadnuju rolu, u lodzie i śniezie całkam mohuć znachodzicca inšyja niepryjemnyja reštki. Asabliva niebiaśpiečnyja ledziašy, utvoranyja na aŭtamabilach. U ich mohuć nazapašvacca reštki antyfryzu, alivy ci paliva.
Ale i ledziašy na drevach nie harantavana biaśpiečnyja. Niemahčyma dakładna viedać, što znachodziłasia ŭ tałaj vadzie vyšej pa halincy: u lod mahli trapić, naprykład, ślady ptušynaha pamiotu.
Nakolki vysokaja imaviernaść taho, što dzicia sapraŭdy zachvareje praz toj ladziaš, dakładna acanić składana. Ale, jak adznačaje ekśpiert, dla bolšaści baćkoŭ užo adna dumka pra mahčymyja prymieški ŭ lodzie vyklikaje naturalnaje nieprymańnie. I hetaha, mahčyma, dastatkova, kab čarhovym razam schapić dzicia za ruku, pierš čym ladziaš apyniecca ŭ rocie.
Kamientary