Što kaštoŭniejšaje dla ludziej, seks ci blizkaść? Daśledčyki pierakonvajuć, što blizkaść pieramahaje, bo jaje nielha kupić

Školnaja bijałohija vučyć nas prostaj iścinie: seks patrebny dla praciahu rodu, pieradačy hienaŭ i vyžyvańnia vidu. Zdavałasia b, usio łahična i zrazumieła — harmony i naturalny adbor kirujuć našym žyćciom. Adnak čałaviečyja adnosiny značna bolš składanyja, čym zvyčajny miechanizm razmnažeńnia.

U daśledavańni «Intymnaja žyvioła» («The Intimate Animal»), na jakoje źviartaje ŭvahu The Times, Džaścin Harsija, śćviardžaje: akramia pieršabytnaha i ŭniviersalnaha imknieńnia da seksu, jakoje vyznačaje toje, jak ludzi dziejničajuć i ŭzajemadziejničajuć, isnuje blizkaść (intimacy). Jana hetak ža nieabchodnaja dla našaha vyžyvańnia i dabrabytu.

Harsija vyznačaje blizkaść jak «pryjemnaje i zaspakajalnaje pačućcio, jakoje ŭźnikaje ad blizkaj suviazi ź inšym čałaviekam». I heta adčuvańnie, śćviardžaje jon, nie vypadkovaje — jano maje hłybokija evalucyjnyja karani.

Čałaviečaje razmnažeńnie — adzin z samych składanych pracesaŭ u žyviolnym śviecie. U paraŭnańni z bolšaściu sysunoŭ ludzi naradžajuć dziaciej, jakija zastajucca biezdapamožnymi nadzvyčaj doŭha. Niemaŭlaty patrabujuć pastajannaha dohladu, a pieršyja hady ich žyćcia stanoviacca fizična i psichałahična źniasilvajučymi dla maci. U takich umovach vyžyvańnie było mahčymaje tolki praz ustojlivyja suviazi ź inšymi, najpierš z baćkam dziciaci. Tak uźnikła tendencyja da sacyjalnaj manahamii.

Jak padkreślivaje Harsija, ludzi ŭvachodziać u vielmi vuzkaje koła sysunoŭ — usiaho 3—5 % vidaŭ, — dla jakich charakternyja ŭstojlivyja pary. Adnak ź ciaham času hetyja suviazi vyjšli daloka za miežy vychavańnia dziaciej. Prykładna 12 tysiač hadoŭ tamu, ź pierachodam da ziemlarobstva, adnosiny pamiž partniorami stali instytucyjanalizavacca: źjaviŭsia šlub, ciesna źviazany z ułasnaściu, ziamloj i resursami.

Ludzi, piša Harsija, schilnyja da sacyjalnaj manahamii, ale zusim nie abaviazkova — da seksualnaj. Žadańnie raznastajnaści, navizny i ekśpierymientaŭ časta supiarečyć patrebie ŭ stabilnaj blizkaści, kachańni i emacyjnaj biaśpiecy.

Pavialičyć

Seks daŭno pierastaŭ być vyklučna sposabam začaćcia. Harsija spasyłajecca na daśledavańnie 2007 hoda, u jakim ludziam zadavali pytańnie: «Čamu ludzi zajmajucca seksam?». Było atrymana 237 asobnych matyvaŭ — ad atrymańnia pavyšeńnia pa słužbie da banalnaha «paddaŭsia momantu».

Prostaja radaść ad seksu — voś pryčyna, pa jakoj ludzi zdradžvajuć doŭhaterminovym partnioram, davodzić jon i tłumačyć: paśla šmatrazovaha ŭździejańnia adnaho i taho ž stymułu ludzi i inšyja sysuny schilnyja reahavać mienš mocna. My zvykajem da dobraha, i jano pierastaje prynosić nam tyja ž pačućci zadavalnieńnia.

Adnak bolšaści ludziej udajecca ihnaravać svajo hłybinnaje žadańnie seksualnaj raznastajnaści i daśledavańniaŭ, pakinutaje nam evalucyjaj, i zastavacca ŭ kamfortnych addanych adnosinach. Čamu? Tamu što blizkaść pieramahaje, davodzić Harsija.

I heta paćviardžajecca danymi. U daśledavańni 2019 hoda, dzie apytali 64 000 žančyn sa 180 krain, vyśvietliłasia, što dabrynia i padtrymka dla ich značna važniejšyja za bahaćcie, status ci rost partniora. Heta tyja rysy, jakija niemahčyma atrymać ad vypadkovaj suviazi na adnu noč.

Asabliva pakazalnym dla Harsii staŭ dośvied naviedvańnia lehalnaha bardela — vyklučna z daśledčaj metaj. Siarod samych darahich pasłuh tam akazaŭsia tak zvany «poŭny dośvied ź dziaŭčynaj» («full Girlfriend Experience») koštam da 20 tysiač dołaraŭ. «Seks nie abaviazkova źjaŭlajecca jaho častkaj, — pryznaŭsia supracoŭnik. — Ale vas čakajuć ašałamlalnyja abdymki». Jak akcentuje ŭvahu Harsija, ludzi kuplali nie cieła, a blizkaść.

Navat misijanierskaja poza, jakaja ŭźnikła jašče dva miljony hadoŭ tamu, kali protaludzi pačali chadzić na dźviuch nahach, na pohlad aŭtara, śviedčyć ab tym, što ludzi evalucyjanavali, kab zajmacca seksam nie tolki dziela začaćcia, ale i ŭ pošukach blizkaści, samaraskryćcia i navat padtrymańnia adnosin.

• 7
• 0
• 4
• 0
• 0
• 0
• 0
• 1