Składzieny rejtynh manahamnaści mlekakormiačych. Na jakim miescy čałaviek?
Ludzi demanstrujuć vysoki ŭzrovień manahamii, adnak jany dalokija ad lidaraŭ. My bolš viernyja za aviečak, ale sastupajem myšam.
Evalucyjny antrapołah Mark Dajbł z Kiembrydžskaha ŭniviersiteta skłaŭ «rejtynh manahamii» siarod dziasiatkaŭ vidaŭ mlekakormiačych. Jak paviedamlaje WSJ, vučony prapanavaŭ aceńvać manahamiju praz suadnosiny rodnych i zvodnych bratoŭ i siaścior u papulacyi. Łohika mietadu prostaja: u vyklučna manahamnaj hrupie ŭsie dzieci buduć mieć adnych i tych ža baćkoŭ (źjaŭlacca poŭnymi siblinhami), Kali ž samcy i samki časta majuć inšych partnioraŭ, u dziaciej budzie bolš zvodnych bratoŭ i siaścior.
Analiz pakazaŭ, što mienš za 10% mlekakormiačych źjaŭlajucca manahamnymi, bo zvyčajna samcy kankurujuć pamiž saboj i imknucca pakinuć jak maha bolš naščadkaŭ ad roznych samak.
Samymi addanymi akazalisia kalifarnijskija alenievyja myšy (Peromyscus californicus): u ich papulacyi ŭsie dzieci — rodnyja braty i siostry, što daje pakazčyk viernaści ŭ 100%.
Na procilehłym baku rejtynhu apynulisia šatłandskija aviečki parody Soaj. Niahledziačy na svaju ciahavitaść, jany vyznačylisia vielmi nizkaj viernaściu ŭ adnosinach — uzrovień manahamii ŭ ich skłaŭ usiaho 0,6%. Kampaniju ŭnizie śpisa im skłali delfiny-afaliny, kasatki, makaki i čornyja miadźviedzi z pakazčykami 4% i nižej.
Ludzi ŭ hetym śpisie zaniali siomaje miesca z vynikam 66%, raźmiaściŭšysia pamiž jeŭrazijskim babrom i biełarukim hibonam.
Daśledčyk adznačaje, što vyvučać ludziej składaniej z-za raspaŭsiudžańnia kantracepcyi. My zdolnyja nastolki raźmiažoŭvać seksualnaje žyćcio i repradukcyju, što možam dziesiać hadoŭ mieć roznyja suviazi, a zatym dvaccać hadoŭ pravieści ŭ manahamnym šlubie, naradžajučy vyklučna poŭnych bratoŭ i siaścior. Takoha nie ŭbačyš u inšych vidaŭ. Tym nie mienš, kali abapiracca mienavita na hienietyku naščadkaŭ, ludzi vyhladajuć davoli pastajannym vidam.
Navukoŭcy miarkujuć, što našy dalokija prodki nie byli manahamnymi, jak i našy bližejšyja svajaki — šympanze i banabo. Adnak kala dvuch miljonaŭ hadoŭ tamu pavodziny pačali mianiacca, i hałoŭnaj pryčynaj stała nieabchodnaść dohladu za dziećmi. Čałaviečaja stratehija vyžyvańnia patrabuje vialikich namahańniaŭ i enierhii dla vychavańnia kožnaha asobnaha dziciaci, tamu maci krytyčna nieabchodnaja dapamoha ŭ zdabyvańni ježy i abaronie.
Bijałohija dyktuje svaje ŭmovy: kab samiec aktyŭna ŭkładaŭsia ŭ patomstva, jon pavinien być upeŭnieny ŭ svaim baćkoŭstvie. Mienavita raźvićcio manahamii zabiaśpiečyła hetuju ŭpeŭnienaść, pieratvaryŭšy ludziej u adnych z samych kłapatlivych baćkoŭ u žyviolnym śviecie.
Kamientary