U Polščy ŭ biełaruskaj siamji zabrali dziaciej z-za praterminoŭki ŭ afarmleńni dakumientaŭ. Sud viarnuŭ dziaciej dadomu
Rajonny sud u Ščacinku pastanaviŭ viarnuć dvuch dziaciej biełaruskaj siamji, u jakoj ich raniej zabrali z-za niesvoječasovaha afarmleńnia karty naradžeńnia małodšaha dziciaci, piša Most.
Hałoŭnaj pryčynaj zabrańnia dziaciej stała niesvoječasovaje afarmleńnie i pieradača karty naradžeńnia. Heta mahło zdarycca z-za pamyłak miedycynskaha piersanału i niedastatkovaj infarmavanaści baćkoŭ ab polskim zakanadaŭstvie.
U studzieni 2025 hoda ŭ biełaruskaj siamji, što pražyvaje ŭ Polščy, naradziŭsia syn.
Baćki nie viedali, što pavodle zakona doktar ci akušerka pavinny aformić kartu naradžeńnia dziciaci na praciahu troch dzion. Niahledziačy na sproby atrymać dakumient u balnicy i zarehistravać syna ŭ ZAHSie, skančeńnie ŭstanoŭlenaha terminu zrabiła heta niemahčymym.
U Polščy paśla naradžeńnia dziciaci doktar abo akušerka abaviazanyja na praciahu 3 dzion aformić kartu naradžeńnia, a baćki — na praciahu 21 dnia zarehistravać dzicia va Upravie zapisaŭ aktaŭ hramadzianskaha stanu (USC) asabista abo anłajn praz partał gov.pl. Pry rehistracyi dziciaci prysvojvajecca numar PESEL i afarmlajecca prapiska (meldunek). Niesvoječasovaja padača dakumientaŭ moža pryvieści da administracyjnych nastupstvaŭ i ŭskładnić atrymańnie dapamohi, miedycynskaha absłuhoŭvańnia — a ŭ niekatorych vypadkach navat da adabrańnia dziciaci.
Uładalnik kvatery, ź jakim siamja mieła kanflikt, paviedamiŭ pra situacyju ŭ haradski Centr dapamohi siamji. Nieŭzabavie ŭ dom pryjšła palicyja i zabrała abodvuch dziaciej — miesiačnaha chłopčyka i trochhadovuju dziaŭčynku. Heta adbyłosia bolš čym praź miesiac paśla naradžeńnia syna. Dziaciej źmiaścili ŭ siamiejny dziciačy dom.
Jurydyčnaja dapamoha
Siamji dapamahli jurysty ź Instytuta Ordo Iuris. Jany padali ŭ sud chadajnictva ab źmienie mier pa spravie i pra składańnie akta naradžeńnia chłopčyka, pakazaŭšy, što baćki zdolnyja zabiaśpiečyć dzieciam hodnyja ŭmovy žyćcia i da adabrańnia naležna pra ich kłapacilisia.
9 lipienia Akruhovy sud u Ščacinku zaćvierdziŭ akt naradžeńnia dziciaci. A ŭžo 24 lipienia sud vynies rašeńnie ab viartańni dziaciej u baćkoŭski dom.
Siamja budzie znachodzicca pad nahladam sudovaha kuratara i abaviazana supracoŭničać ź siamiejnym asistentam. Raz na paŭhoda baćki pavinny pradstaŭlać kurataru źviestki pra stan zdaroŭja dziaciej.
Ciapier čytajuć
Stała viadoma, što za 200 tysiač jeŭra prapanoŭvali Siarhieju Cichanoŭskamu «biełaruskija biznesmieny»27
Kamientary