Źjaviŭsia biaspłatny servis pa pošuku volnych zaradnych stancyj dla elektramabilaŭ
Servis Belcharge.by stvaryła sietka BatteryFly. Anłajn-karta pakazvaje najbližejšyja volnyja i zaniatyja stancyi dla elektramabilaŭ, paviedamlaje abw.by.
Servis adsočvaje status zaradnych stancyj bujnych płatformaŭ: BatteryFly, Malanka, Evika. Tut ža pakazanyja i stancyi mabilnaj prahramy charge&go. Usie jany raźmieščanyja na karcie ŭ vyhladzie kružkoŭ z łahatypam apieratara. Kali nacisnuć na jaho, to źjavicca infarmacyja pra kankretnaje miescaznachodžańnie, jakaja ŭklučaje typy kaniektaraŭ i mahutnaść stancyi.
Pa kožnaj stancyi servis pakazvaje kolkaść volnych miescaŭ, pryvodzić taryfy, jakija dziejničajuć na abranaj stancyi, jany ŭ zaležnaści ad času sutak mohuć adroźnivacca. Taksama možna zabraniravać miesca: pry naciskańni na knopku «zaradzisia anłajn» sistema adpravić u prahramu taho ci inšaha apieratara.
U servis taksama ŭbudavanaja opcyja vystrojvańnia maršrutu z płanavańniem prypynkaŭ dla zaradki z ulikam mahčymaściaŭ elektramabila. Heta zručna pry dalokich pajezdkach, u tym liku ź Minska ŭ Brest, Viciebsk ci Brasłaŭ.
Na karcie Belcharge.by pakazanyja zaradnyja stancyi pa ŭsioj Biełarusi. U opcyjach možna vybrać demanstracyju stancyj z patrebnymi raźjomami, taryfam abo volnych na biahučy momant.
Servis abiacajuć raźvivać. Jak čakajecca, śledam za bujnymi płatformami da jaho dałučacca i inšyja sietki zaradnych stancyj. Źjaviacca i novyja funkcyi. Belcharge.by ciapier dastupny ŭ farmacie veb-sajta.
Kamientary