«Poŭny zaniapad u Litvie, Łatvii i Estonii». Pra što niedahavorvaje Ryžankoŭ

Kali źviarnucca da adkrytych ličbaŭ Jeŭrastata, Biełstata i Suśvietnaha banka, vyśviatlajecca, što karcina zusim nie takaja.

Demahrafija: u Litvie i Estonii rost, u Biełarusi i Łatvii pravał 

Usie 90-ja i 2000-ja krainy Bałtyi hublali nasielnictva — praz emihracyju (spačatku savieckich mihrantaŭ, a paśla — praz adkrytyja miežy ES) i pieravyšeńnie śmiarotnaści nad naradžalnaściu. Ale apošnija hady adbyłosia istotnaje źmianieńnie.

Litva z 2019 hoda maje stanoŭčy mihracyjny bałans: u krainu pačało ŭjazdžać bolš ludziej, čym vyjazdžać. Z hetaha ž hoda pačała raści ahulnaja kolkaść nasielnictva.

Estonija vyjšła na dadatnaje salda mihracyi jašče raniej — z 2015 hoda, i z taho času demahrafija tam stabilnaja. U 2024 hodzie dadatny bałans skłaŭ 1374 čałavieka.

Łatvija dasiahnuła dadatnaha bałansu ŭ 2022 hodzie — z-za pryjomu ŭkrainskich uciekačoŭ. Adnak bałans u nastupnych hadach byŭ admoŭny. U 2024 hodzie — minus 4610. 

U Biełarusi mihracyjny bałans byŭ dadatnym da 2019 hoda. Ale z 2020 hoda adbyvajecca masavy adtok hramadzian — asabliva moładzi i śpiecyjalistaŭ. Praŭda, aficyjnaja statystyka hetyja ličby chavaje.

Na sajcie Biełstata možna znajści danyja za kožny hod pa 2019 (plus 13870 čałaviek) uklučna. Zatym — pravał na čatyry hady. Novyja źviestki pryviedzieny tolki za 2024 hod. Admietna, što pakazčyk 2024 hoda (plus 9488) Biełarusi značna nižejšy, čym u susiedniaj Litvie (plus 23140).

Jaki zarobak?

U 2024 hodzie siaredni zarobak u naminalnym vyražeńni (da padatkaŭ) skłaŭ: u Litvie kala 2330 jeŭra ŭ miesiac, Łatvii — 1685 jeŭra, Estonii — 1981 jeŭra. 

Pavialičyć

Paśla vyliku padatkaŭ hetyja sumy składali — u Litvie — 1407 jeŭra, Łatvii — 1221, Estonii — 1450.

U Biełarusi siaredni naličany zarobak za 2024 hod skłaŭ amal 2272 rubloŭ, heta pryblizna 630 jeŭra.

Kali adniać padatki i adličeńni, to jon składzie prykładna 1950 rubloŭ ci 542 jeŭra.

Jaki parytet kupčaj zdolnaści

Ale prosty pieravod u jeŭra nie adlustroŭvaje realny ŭzrovień žyćcia. U roznych krainach roznyja ceny na ježu, kamunałku, miedycynu. Kab paraŭnoŭvać abjektyŭna, ekanamisty vykarystoŭvajuć paniaćcie parytetu pakupnickaj zdolnaści (PPZ, anhł. PPP — purchasing power parity) — heta značyć, kolki tavaraŭ i pasłuh čałaviek moža nabyć u svajoj krainie za svaju zarpłatu.

Indeks kupčaj zdolnaści vyražajecca ŭ tak zvanych «mižnarodnych dalarach» (Int$) — umoŭnaj valucie, jakaja pakazvaje, kolki vy možacie sabie dazvolić na svaje hrošy, kali b ceny va ŭsim śviecie byli jak u ZŠA.

Pavodle Suśvietnaha banka, PPZ u Biełarusi na 2023 byŭ 0,77. Takim čynam siaredni zarobak u 1950 rubloŭ za 2024 hod u mižnarodnych dalarach skłaŭ 2532 (1950 ÷ 0,77 = 2532 Int$.) Heta značyć, na biełaruskuju zarpłatu my mahli sabie dazvolić prykładna toje ž, što amierykaniec na 2532 dalary.

Pavialičyć

Takim čynam, žychar Biełarusi vyhladaje trochi bahaciejšym za žychara Estonii i Łatvii, ale adstaje ad žychara Litvy.

VUP na dušu nasielnictva

Heta jašče adzin pakazčyk, jaki adlustroŭvaje ekanamičny ŭzrovień — kolki pradukcyi (hrošaj, dabaŭlenaj vartaści) prypadaje na adnaho žychara.

VUP Biełarusi na dušu nasielnictva pa parytetu pakupnickaj zdolnaści pa infarmacyi sajta Worldeconomics.com u 2024 hodzie skłaŭ 29 147 Int$.

U krainach Bałtyi pa infarmacyi taho ž sajta VUP na dušu nasielnictva pa PPZ skłaŭ: u Łatvii — 38640 Int$, Litvie — 47581 Int$, Estonii — 41826 Int$.

Jak bačym, pa hetym pakazčyku Biełaruś značna adstaje ad usich krain Bałtyi.

Pavialičyć

Takim čynam, krainy Bałtyi zusim nie ŭ zaniapadzie. Jany demanstrujuć stabilny rost ekanomiki, pavieličeńnie zarobkaŭ i źmianieńnie demahrafičnych tendencyj (u Litvie i Estonii), jakija raniej sapraŭdy byli niehatyŭnymi.

• 12
• 0
• 4
• 7
• 1
• 0
• 0
• 1